Kọ Whọ Riẹ?

Fikieme Jesu ọ rọ rehọ ẹmẹrera rovie aro ọzae nọ o tuaro na?

Ma rẹ jọ Mak 8:22-26 se kpahe epanọ Jesu o ro rovie aro ọzae jọ nọ o tuaro eva Bẹtsaida. Ikuigbe na e ta nọ Jesu ọ kaki nwo eya ku obọ ro gbe ibiaro ọzae na, kẹsena ọ tẹ nọe sọ ọ ruẹ oware jọ. Uyo nọ ọzae na ọ kẹ u dhesẹ nọ eware e jariẹ aro gede gede, ọ ta nọ: “Mẹ ruẹ ahwo; rekọ mẹ ruẹ erai wọhọ ire, nọ [e be] nya.” Jesu ọ tẹ wariẹ dhobọ te ibiaro ọzae na, ọzae na “o te ri gaga, . . . ọ tẹ ruẹ eware kpobi vevẹ.” O jọ vevẹ inọ ẹmẹrera Jesu o ro rovie aro ọzae na. Fikieme?

Ebaibol e nwane ta ugogo oware nọ o soriẹ hẹ, rekọ ma sai roro kpahe oware jọ nọ o rẹ sae wọhọ nọ o lẹliẹ Jesu ru ere. Re ohwo nọ o tuaro kri no—hayo nọ o tuaro no eva ze—o mu ude họ ẹruẹ, yọ enwene ologbo kẹ ibiaro na. Wọhọ oriruo: U wo enyenya jọ nọ a jẹ hai ro ru iruo evaọ egọdọ nọ a rẹ jọ tọ eware wọhọ igoru. Ebi na ọ reria enyenya na oma te epanọ o rọ rehọ okpẹdoke soso re elo uvo o tẹ te wariẹ reria ae oma nọ a si ai no egọdọ na ze. Rọkẹ ohwo nọ o tuaro, o rẹ tubẹ rehọ oke viere re elo uvo o tẹ reriae aro. Evaọ oke mai na, ewena oma-obẹrọ a sai fi obọ họ kpọ ebẹbẹ ibiaro umutho ahwo jọ nọ a jẹ ruẹ ude vẹre he vi no nọ a ro mu ude họ ẹruẹ. Dede na, eware nọ ẹro na ọ ruẹ ẹsiẹvo nọ i kpeze se ẹvori na o ga hrọ kẹ ibuobu rai. Fikinọ a ruẹ ekọlọ buobu, eware sa-sa, te ilogbo gbe esese, te enọ e kẹle rai gbe enọ e rrọ ugbo ẹsiẹvo, aro o te reghe ai nọ a gbẹ sai vuhu eware nọ a riẹ vẹre he. Nọ oke o be nyaharo na, ẹvori na ọ tẹ te riẹ epanọ o re ro vuhu eware nọ ibiaro na e ruẹ.

O wọhọ nọ fiki ororokẹ nọ o wo kẹ ọzae na oye o wọ Jesu nọ ọ rọ rehọ ẹmẹrera rovie aro ọzae na. Ukuhọ riẹ, ọzae na “ọ tẹ ruẹ eware kpobi vevẹ,” nabi vuhu eware kpobi nọ ọ ruẹ.

Fikieme O gbẹ rọ Jọ Okolo-Iruo Ho Re A Rovie Uko-Obe Se Evaọ Oke Jesu?

Eware nọ a jẹ hai ro ru iko-ebe eva oke Jesu e jẹ hai theri te enwenọ urula, jẹ kẹre vi ubro urula. A jẹ hae rọ egọmo ta ewẹ sa-sa kugbe hayo rọ olulu ko ai kugbe tofẹ tofẹ. A jẹ hae rehọ ewẹ nọ i theri vi ere ru iko-ebe ẹsejọ re. Eviẹ-arao ikpegbihrẹ nọ uthethe rai u te enwenọ irula udhegbene a ro ru Uko obe Aizaya nọ a ruẹ evaọ Abade Owhowhu na. O wọhọ nọ ere ọvona uko obe Aizaya nọ Jesu o se noze evaọ uwou-egagọ obọ Nazarẹt na u theri te re.—Luk 4:16, 17.

Obe na Discoveries From the Time of Jesus o ta kpahe onana nọ: “Ohwo nọ o bi se [uko] obe na o re kru rie họ obọ, rehọ ẹkpẹlobọ rovie iei, jẹ rehọ emamobọ kpiri onọ o rovie no zihe nọ o bi sei no ẹwẹ te ẹwẹ na. U muẹro inọ Jesu o rovie uko na unuẹse buobu jẹ wariẹ kpiri ofẹ nọ o rovie no zihe re o te te uzou avọ 61 orọ obe Aizaya nọ o se evaọ uwou-egagọ na.”

Evaọ oke yena yọ a re te ghale obe Aizaya fihọ izou gbe awọ họ, wọhọ epanọ ma wo rie nẹnẹ na. Okenọ a rehọ uko obe Aizaya na kẹ Jesu evaọ uwou-egagọ evaọ obọ Nazarẹt, o rovie uko na gwọlọ oria ikere nọ ma jọ Ebaibol mai wo enẹna wọhọ Aizaya 61:1, 2 na. O raha oke he re Jesu ọ tẹ “ruẹ oria” ikere na, nọ u dhesẹ nọ ọ riẹ Ikereakere na ziezi.