Uzou Avọ 21
Evaọ Uwou-Egagọ Ẹwho Obọ Jesu
AVRO ọ riẹ hẹ inọ okenọ Jesu o te uwou oghọghọ o jọ evaọ Nazarẹt. Taure ọ tẹ te nyabru Jọn kẹ ame-ọhọ ole ukpe ovo nọ o vrẹ, a riẹ Jesu wọhọ ọwena. Rekọ enẹna a riẹ riẹ thabọ jẹ kẹre no wọhọ oruiruo eware igbunu. Emotọ ẹwho na a rọ ọwhọwhọ re a ruẹ nọ o ru oware igbunu jọ evaọ udevie rai.
Okpakpa rai o tẹ ga viere nọ Jesu, wọhọ epanọ uruemu riẹ o rọ, ọ ruọ uwou-egagọ na. Evaọ etoke iruẹru egagọ na, ọ tẹ kparoma re o se, a tẹ rehọ uko-obe Aizaya ọruaro na kẹe. Ọ tẹ ruẹ oria nọ o ta kpahe Ọnọ a rọ ẹzi Jihova kẹ na, oria nọ o rọ uzou 61 evaọ Ebaibol mai nẹnẹ na.
Nọ o se no kpahe oghẹrẹ nọ Ohwo ọnana ọ te rọ ta usiuwoma obusino kẹ enọ e rọ igbo, aruorovie kẹ enọ i tuaro, jẹ kpahe ukpe ọjẹrehọ Jihova, Jesu o te zihe uko-obe na kẹ odibo na ọ tẹ keria. Ahwo na kpobi a tẹ tẹro vi ei. Kẹsena ọ tẹ t’ẹme, ẹsejọhọ dina thethei, ru ei vevẹ nọ: “Nẹnẹna ekere na ọgba eva ezọ rai.”
“Ẹme ezi” riẹ o te gbe ahwo kpobi unu a tẹ be ta kẹ ohwohwo nọ: “Nọ ọmọzae Josẹf na?” Rekọ nọ ọ riẹ nọ a gwọlọ re o ru eware igbunu, Jesu ọ tẹ ta haro nọ: “Wha re ghine ti bru ohare onana kẹ omẹ nọ, ‘Ọbo, si oma ra’; koware koware nọ ma yo nọ a ru eva Kapaniọm, jọ etenẹ ẹwho ra ru ere re.’ ” U re vevẹ, erivẹ Jesu vẹre a roro nọ usiwo ọ rẹ kake jọ uwou muhọ, re erere na o kake jọ kẹ ahwo riẹ. Fikiere a te roro nọ Jesu o rri rai vo.
Nọ ọ riẹ iroro rai, Jesu o te gbiku jọ nọ u fo kẹ ai. Eyao-uku buobu e jọ Izrẹl evaọ edẹ Elaeja, ere o muẹrohọ, rekọ a vi Elaeja bru ọvuọvo enana ha. Ukpoye, ọ tẹ nya bru aye nọ ọ rọ ohwo Izrẹl he evaọ Saidọn, oria nọ o je ru oware igbunu uzuazọ. Yọ evaọ edẹ Elaesha, emoti buobu e jariẹ, rekọ Neaman ohwo Siria ọvo Elaesha o siwi.
Avọ evedha ọrọ ẹwawọ ikuigbe onana nọ u dhesẹ oriobọ gbe ababọ ẹrọwọ rai via na, ahwo nọ a rọ uwou-egagọ na a tẹ kparoma a te si Jesu họrọ ruọ otafe okpẹwho na. Evaọ obei, eva ẹroro ugbehru nọ a bọ Nazarẹt fihọ na, a tẹ gwọlọ nọ a re gbolo ei fihọ otọ. Rekọ Jesu ọ tẹ dhẹ vae abọ ababọ enwoma. Luk 4:16-30; 1 Ivie 17:8-16; 2 Ivie 5:8-14.
▪ Fikieme oghọghọ ulogbo o jẹ jọ Nazarẹt?
▪ Ẹvẹ ahwo na a rri eme Jesu, rekọ eme ọ wha evedha se ai?
▪ Eme ahwo na a daoma gwọlọ ru Jesu?