Enọ Ahwo nọ A s’Ebe
Fikieme Elaesha ọ rọ yare “akuava” ọ ẹzi Elaeja?
Taure Elaeja o te ti ku iruo riẹ họ wọhọ ọruẹaro evaọ Izrẹl, Elaesha, ọruẹaro nọ o muhọ obọ na, ọ tẹ yare iẹe nọ: “Mẹ lẹ owhẹ, re akuava okẹ ẹzi ra o te omẹ obọ.” (2 Ivie 2:9) A tẹ rehọ ubiẹro abọ-ẹzi rri ẹme na, Elaesha ọ be gwọlọ akuava ukuoriọ wọhọ onọ a rẹ rọ kẹ ọmọ ọtuyẹ. (Iziewariẹ 21:17) Ma tẹ roma totọ roro kpahe ikuigbe na ziezi u ti ru ei vẹ k’omai je fi obọ họ k’omai rehọ iwuhrẹ jọ no oware nọ o via na ze.
Nya lele ọkpọvio Jihova, Elaeja ọruẹaro na o te wholo Elaesha wọhọ ọnọ ọ te rehọ ẹta riẹ. (1 Ivie 19:19-21) Evaọ ikpe ezeza, Elaesha o ruiruo wọhọ odibo ẹrọwọ Elaeja yọ ọ gba riẹ mu inọ o re ru ere rite urere. Makọ evaọ ẹdẹ urere Elaeja wọhọ ọruẹaro evaọ Izrẹl, Elaesha ọ talamu ọga riẹ. Dede nọ Elaeja ọ tuduhọ Elaesha awọ inọ o gbe lele ei hi, isiasa ọruẹaro ọkpokpọ na ọ ta nnọ: “Mẹ sae se owhẹ ba ha.” (2 Ivie 2:2, 4, 6; 3:11) Evaọ uzẹme, Elaesha o rri ọruẹaro nọ o kri no na wọhọ ọsẹ abọ-ẹzi riẹ.—2 Ivie 2:12.
Dede na, orọnikọ Elaesha ọvo họ ọmọ abọ-ẹzi ọ Elaeja ha. Elaeja avọ Elaesha a jọ usu kugbe utu ezae jọ nọ a re se “emọ eruẹaro” na. (2 Ivie 2:3) Ikuigbe nọ e rrọ obe Ivie Avivẹ i dhesẹ inọ “emọ” nana a wo usu okpekpe kugbe ọsẹ abọ-ẹzi rai re, Elaeja. (2 Ivie 2:3, 5, 7, 15-17) Ghele na, wọhọ ọnọ a wholo re ọ rehọ ẹta riẹ, Elaesha ọ jọ aro evaọ usu emọ abọ-ẹzi ọ Elaeja na—ọ jọ wọhọ ọmọ ọtuyẹ. Evaọ Izrẹl anwae, ọmọ ọtuyẹ o re wo akuava ukuoriọ ọsẹ riẹ, emọ edekọ omomọvo a ve wo ẹko ọvo. Fikiere, Elaesha ọ be yare akuava ọrọ ukuoriọ abọ-ẹzi ọ Elaeja.
Fikieme Elaesha o ro ru ayare nana eva uzedhe oke oyena? Keme ọ be te wọ iruo ilogbo fihọ uzou—ẹrehọ ẹta Elaeja wọhọ ọruẹaro evaọ Izrẹl. Elaesha ọ riẹ inọ re ọ sai ru ewha-iruo use-abọ nana gba, ọ gwọlọ ẹgba abọ-ẹzi nọ o kpehru gaga vi ẹgba obọ riẹ, ẹgba nọ Jihova ọvo ọ rẹ sae kẹ. O gwọlọ nnọ ọ rẹ wharo wọhọ epanọ Elaeja ọ jọ. (2 Ivie 1:3, 4, 15, 16) Fikiere, ọ yare akuava ẹzi Elaeja, ẹzi aruọwha gbe onọ ọ rẹ rọ re “ihri gaga fiki ỌNOWO na”—ekwakwa ezi nọ ẹzi Ọghẹnẹ ọ rẹ mọ. (1 Ivie 19:10, 14) Eme Elaeja o ru?
Elaeja ọ riẹ nnọ ọ rẹ sae kẹ Elaesha oware nọ ọ be yare na ha, ajokpa ọ Ọghẹnẹ ọvo. Fikiere Elaeja avọ omarokpotọ ọ tẹ k’uyo nọ: “Oware nọ whọ yare na o rẹ gaga, yọ otẹrọnọ whọ ruẹ omẹ nọ a te rehọ omẹ vrẹ se owhẹ ba, o rẹ ghinẹ jọ ere kẹ owhẹ.” (2 Ivie 2:10) Yọ ere o ghinẹ via, Jihova o ru re Elaesha ọ ruẹ Elaeja nọ o bi tovrẹ evaọ okpofou na. (2 Ivie 2:11, 12) A kẹ Elaesha ẹgwọlọ riẹ. Jihova ọ kẹ riẹ ẹzi nọ ọ gwọlọ kẹ owha-iruo okpokpọ riẹ na re ọ jẹ rọ ovao dhe edawọ obaro.
Nẹnẹ, Ileleikristi nọ a wholo (enọ a re se ẹsejọ wọhọ utu Elaesha na) gbe idibo Ọghẹnẹ kpobi a rẹ sai wo uduotahawọ gaga no ikuigbe Ebaibol nana ze. Ẹsejọ, oma o rẹ sae lọhọ omai je roro nnọ ma te he okenọ a tẹ k’omai ọkwa-iruo jọ, hayo udu u re n’omai awọ evaọ iruo usiuwoma ota Uvie na nọ ma tẹ rẹriẹ ovao ku ababọ-isiuru hayo ọwọsuọ evaọ ẹkwotọ mai. Ghele na, ma tẹ lẹ Jihova kẹ uketha riẹ, ọ te k’omai ẹzi ọfuafo keme ma gwọlọ e riẹ re ma sae rọ udu dhe use-abọ gbe iyero nọ i bi nwene. (Luk 11:13; 2 Ahwo Kọrint 4:7; Ahwo Filipai 4:13) Ẹhẹ, wọhọ epanọ Jihova ọ kẹ Elaesha ẹgba kẹ ewha-iruo egbẹgbẹdẹ riẹ na, o ti fi obọ họ k’omai kpobi, te emaha te ekpako, re ma ru odibọgba mai gba.—2 Timoti 4:5.