Ono Ọ Te Zọ Vrẹ ‘Ẹdẹ Jihova’?

“Didi oghẹrẹ ohwo wha hẹ jọ eva uzuazọ ẹfuọ gbe orọ Ọghẹnẹ, nọ owha be hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ [na]!”—2 PITA 3:11, 12.

1. Amono a rehọ ẹzi gbe ogaga Elaeja ruiruo no?

JIHOVA ỌGHẸNẸ ọ jọ udevie ahwo-akpọ salọ ibe ereuku kugbe Ọmọ riẹ no, Jesu Kristi, evaọ Uvie obọ odhiwu. (Ahwo Rom 8:16, 17) Okenọ a gbẹ jọ otọakpọ, Ileleikristi nọ a kẹ ẹzi a rehọ ẹzi gbe ogaga Elaeja ruiruo. (Luk 1:17) Evaọ uwuhrẹ n’ukpo na, ma muẹrohọ ithatho jọ evaọ iruo rai gbe erọ Elaeja ọruẹaro na. Kọ ẹvẹ kpahe iruo ohwo nọ ọ rehọ ẹta Elaeja, Elaesha ọruẹaro na?—1 Ivie 19:15, 16.

2. (a) Eme họ oware igbunu urere nọ Elaeja o ru, gbe orọ ọsosuọ Elaesha? (b) Didi imuẹro e riẹ inọ Elaeja o kpohọ odhiwu hu?

² Oware igbunu urere nọ Elaeja o ru họ ewu iruo riẹ nọ ọ rọ tehe ame Ethẹ Jọdan, ame na ọ tẹ hẹriẹ. Onana o tẹ lẹliẹ Elaeja avọ Elaesha fa vrẹ evaọ otọ oyaya. Okenọ a jẹ nyavrẹ evaọ ofẹ ovatha-ọre ethẹ na, ofou-ọwhibo ọ tẹ wọ Elaeja kpohọ abọ ọfa evaọ akpọ na. (Rri ẹkpẹti nọ ọ rọ ẹwẹ-obe avọ 14 na nọ uzoẹme riẹ o rọ “Idhiwu Vẹ Elaeja Ọ Kparoma Kpohọ?”) Elaeja ọ nyasiọ ewu iruo riẹ ba. Okenọ Elaesha ọ rehọ iẹe tehe Jọdan na, ame riẹ ọ tẹ wariẹ hẹriẹ, o tẹ lẹliẹe zihe kpozi evaọ otọ oyaya. Oware igbunu onana u te ru ei vevẹ inọ Elaesha họ ọnọ ọ rehọ ẹta Elaeja evaọ ẹwhaharo egagọ uzẹme evaọ Izrẹl.—2 Ivie 2:6-15.

Ekwakwa Ọghẹnẹ E r’Oja

3. Eme Pọl avọ Pita a ta kpahe ọzino Jesu gbe ‘ẹdẹ Jihova’?

³ Ikpe-udhusoi buobu nọ edẹ Elaeja avọ Elaesha e vrẹ no, ikọ na Pọl avọ Pita a tẹ rehọ ‘ẹdẹ Jihova’ nọ ọ be tha na t’ẹme kpahe ọzino Jesu Kristi kugbe “ihru ekpokpọ avọ akpọ ọkpokpọ” obaro okiọye na. (2 Ahwo Tẹsalonika 2:1, 2; 2 Pita 3:10-13) Re ohwo ọ zọ vrẹ ẹdẹ ologbo Jihova—okenọ Ọghẹnẹ ọ te raha ewegrẹ riẹ o ve siwi ahwo riẹ na—ma rẹ gwọlọ Jihova je dhesẹ omarokpotọ gbe ẹrẹreokie. (Zefanaya 2:1-3) Rekọ ekwakwa efa i dhesẹ oma via nọ ma bi roro kpahe eware nọ e via kẹ Elaesha ọruẹaro na.

4. Didi abọ ọwhọ o wo evaọ iruo Jihova?

⁴ Ọwhọ kẹ iruo Ọghẹnẹ o r’oja otẹrọnọ ma rẹ zọ vrẹ ‘ẹdẹ Jihova.’ Elaeja avọ Elaesha a wo ọwhọ kẹ iruo Jihova. Avọ oghẹrẹ ọwhọ ọvo na, ikiọkotọ Ileleikristi inẹnẹ nọ a kẹ ẹzi na a be gọ Jihova a tẹ jẹ be k’obaro evaọ ẹta usiuwoma na.a No anwọ udevie etoke ikpe 1930 ze, a rọ uduotahawọ kẹ ahwo nọ e be jẹ ovuẹ Uvie na rehọ gbe enọ i wo ẹruore ẹria bẹdẹ bẹdẹ evaọ otọakpọ re a roma rai mudhe kẹ Jihova a vẹ jẹ họ-ame. (Mak 8:34; 1 Pita 3:21) Ima ahwo buobu a kuyo ziezi no kẹ uduotahawọ onana. Okejọ o jariẹ nọ a jọ ebi ẹzi a te je whu no evaọ uzioraha, rekọ enẹna a wuhrẹ uzẹme Ọghẹnẹ no, a dede uzuazọ ebẹdẹ bẹdẹ rehọ no evaọ aparadase otọakpọ, a te je wo ọwhọ evaọ iruo Jihova. (Olezi 37:29; Eviavia 21:3-5) Ẹkwoma ọwhọ rai, ẹmeoyo, ọghoruo, gbe iruo iwoma efa, a be wha omosasọ ologbo se inievo ẹzi Kristi enọ e gbẹ rọ otọakpọ na.—Matiu 25:31-46.

5. Fikieme u je woma re a ru emamọ oware kẹ “imoni” Jesu, kọ didi oriruo ma wo no edẹ Elaesha ze?

⁵ Ahwo nọ i ru eware iwoma kẹ “imoni” Jesu fikinọ enana nọ a kẹ ẹzi na a rọ ilele riẹ a re wo ẹruore ẹzọ vrẹ ‘ẹdẹ Jihova.’ Oghale ulogbo u te imava orọo jọ evaọ iwhre Shunẹm fikinọ a dhesẹ ẹwo jẹ ghọ Elaesha avọ odibo riẹ. Ọzae avọ aye nana a wo ọmọ họ, yọ ọzae na ọ kpako no. Rekọ Elaesha ọ tẹ yeyaa kẹ aye Shunẹm ọnana nọ o ti yẹ ọmọ, yọ ere o ghinẹ via. Okenọ ọmọ ọvo ọnana o whu evaọ obaro, Elaesha o te kpohọ Shunẹm nya e kpare iẹe ze. (2 Ivie 4:8-17, 32-37) Ẹvẹ osohwa na o rro te fikinọ a ghọ Elaesha!

6, 7. Didi oriruo Neaman o fihọ otọ, kọ didi abọ onana u wo kpahe ẹzọ vrẹ ‘ẹdẹ Jihova’?

⁶ O gwọlọ omarokpotọ re a jẹ ọkpọvio Ebaibol na rehọ no obọ ‘inievo’ Kristi ze avọ ẹruore ẹzọ vrẹ ẹdẹ Jihova. O gwọlọ omarokpotọ mi Neaman, olori egbaẹmo ohwo Siria nọ ọ rọ ọmoti, re o lele ohrẹ nọ ọmọtẹ ọrigbo Izrẹl ọ kẹ riẹ re ọ gwọlọ Elaesha kpohọ Izrẹl kẹ omusiwo. Ukpenọ o no evaọ uwou riẹ ze te ruẹ Neaman, Elaesha o te vi uwou ọnana sei: “Nya e họ isiahrẹ eva ethẹ Jọdan, uwo oma ra o rẹ te ruẹrẹ họ, whọ rẹ te fua.” (2 Ivie 5:10) Onana u te duobọ te omoya Neaman, eva e tẹ dhae, rekọ okenọ ọ rehọ omarokpotọ họ isiahrẹ no evaọ ethẹ Jọdan na, “a tẹ wariẹ oma riẹ ru wọhọ oma ọmọfofa, ọ tẹ fo.” (2 Ivie 5:14) Taure o te ti zihe kpo, Neaman ọ tẹ wariẹ zihe kpohọ ugbobọ Sameria nya i yere ọruẹaro Jihova. Avọ ọtamuo inọ o re wo erere no ogaga nọ Ọghẹnẹ ọ kẹ riẹ ze he, Elaesha ọ tẹ ruọ otafe ti zere Neaman rekọ o mi rie okẹ ọvuọvo ho. Neaman avọ omarokpotọ ọ tẹ ta kẹ Elaesha nọ: “Nọ umuo na vrẹ odibo ra o gbe dhidhe emahọ, hayo idhe efa kẹ ẹdhọ họ rekọ rọ kẹ [Jihova ọvo, NW ].”—2 Ivie 5:17.

⁷ Ẹkwoma omarokpotọ nọ a bi ro lele ohrẹ Ikereakere nọ a rehọ ẹzi kere na, ima ahwo buobu a wo eghale no nẹnẹ. Ofariẹ, ẹkwoma ẹrọwọ fihọ idhe ẹtanigbo Jesu, a ru ahwo udu-ezi enana fo no evaọ ẹzi. Enẹna a be reawere ọghọ nọ a rọ rọ egbẹnyusu Jihova Ọghẹnẹ gbe Jesu Kristi. (Olezi 15:1, 2; Luk 16:9) Yọ oma nọ a rọ kẹ Ọghẹnẹ gbe egagọ riẹ u ti wo osohwa evaọ esiwo rai no ọraha ebẹdẹ bẹdẹ ‘ẹdẹ Jihova’ nọ ọ be tha vẹrẹ vẹrẹ na onọ u ti te erahaizi omoya, enọ i kurẹriẹ hẹ oma.—Luk 13:24; 1 Jọn 1:7.

“Ono Ọrọ Abọ Mẹ? Ono?”

8. (a) Didi uruemu ahwo nọ a te zọ vrẹ ‘ẹdẹ Jihova’ a re wo kpahe eruo oreva Ọghẹnẹ? (b) Didi iruo a rọ kẹ Jehu? (c) Eme ọ te via kẹ Jezibẹl?

⁸ O rẹ jọ ọtamuo ahwo nọ a gwọlọ zọ vrẹ ‘ẹdẹ Jihova’ re a ru oreva Ọghẹnẹ. Elaeja avọ aruọwha ọ ruẹaro kpahe ọraha uviuwou Ehab Ovie na, ọnọ ọ rọ ojihẹ jẹ be gọ Ebale na. (1 Ivie 21:17-26) Taure a tẹ te wha ikpakpe na haro, Elaesha, ọnọ ọ rehọ ẹta Elaeja na, o wo iruo jọ nọ o re ru gba. (1 Ivie 19:15-17) Nọ oke Jihova u te, Elaesha o te vi odibo riẹ re ọ nya e rehọ Jehu, olori ọgbaẹmo, ro mu wọhọ ovie ọkpokpọ Izrẹl. Nọ o ku ewhri họ uzou Jehu no, ọwhovuẹ na ọ tẹ ta kẹe nọ: “Enẹ ỌNOWO, Ọghẹnẹ Izrẹl ọ tae, mẹ rehọ [owhẹ] mu ovie kẹ Izrẹl, ahwo ỌNOWO na. Who re ti kporo uwou Ehab, olori ra, re mẹ [ruẹse kioja] azẹ eruẹaro, idibo mẹ obọ Jezibẹl, gbe azẹ idibo ỌNOWO na kpobi. Keme uviuwou ehab ososo o re ti whẹ.” A ti gbolo Jezibẹl Ovie-Aye ọgeva na kẹ erakọ, a ti kiei emamọ ukio ho.—2 Ivie 9:1-10.

9, 10. Ẹvẹ eme ọ Elaeja e rọ jọ oma Jezibẹl rugba?

⁹ Ezae Jehu a vuhumu inọ eromuo riẹ na emamọ, fikiere a te whowho iei wọhọ ovie ọkpokpọ Izrẹl. Avọ emamọ owọ nọ ọ jẹ, Jehu ọ tẹ dhẹ kpohọ Jẹzrẹl re o muọ iruo riẹ họ ọrọ ekpe enọ e rọ obaro egagọ Ebale na. Ohwo ọsosuọ nọ Jehu o kpe họ Jehoram Ovie na, ọmọ Ehab. Ọ dhẹ no okpẹwho na ze re ọ nọ sọ ẹnyaze Jehu onya udhedhẹ. Jehu ọ tẹ kuyo nọ: “Didi udhedhẹ o rẹ ja riẹ, nọ igberedha avọ enua oni ra Jezibẹl e gbẹ rọ buobu na?” Kọ ere ose Jehu u ro duwu udu Jehoram lafi.—2 Ivie 9:22-24.

¹⁰ Eyae ahwo Ọghẹnẹ a rẹ raro kele Jezibẹl hayo oghẹrẹ ahwo itieye na ha. (Eviavia 2:18-23) Okenọ Jehu o te Jẹzrẹl, yọ ọ daoma gaga no re o ru oma riẹ siuru. Nọ o ri unwido jọ lafi, ọ tẹ be rehọ uyere whẹ idudu hiẹe oma. Ọ tẹ nọ idibo aye na nọ: “Ono ọrọ abọ mẹ? Ono?” Idudhe na, imava hayo imasa iletu riẹ a te rri otọ. Kọ abọ Jehu a ghinẹ rọ? Jehu ọ tẹ ta kẹ ae nọ: “Gele ei fihọ otọ.” A te ghine ru ere, gbolo Jezibẹl ọgeva na nya unwido vrẹ. Enyenya na a tẹ rọ ekothoawọ rai thihi ei kpe. Okenọ ahwo a nyaze re a kiei, ‘a ruẹ oware ovo ho ajokpa ekpe-uzou riẹ avọ awọ gbe evabọ riẹ ọvo.’ Ẹvẹ eme jaja Elaeja i rugba te: “Erakọ e rẹ te re oma Jezibẹl”!—2 Ivie 9:30-37.

Uketha Egagọ Uzẹme n’Eva Ze

11. Ono họ Jehonadab, kọ ẹvẹ o ro dhesẹ uketha riẹ kẹ egagọ uzẹme?

¹¹ Ahwo nọ a rẹro nọ a rẹ zọ vrẹ ‘ẹdẹ Jihova’ re a rria otọakpọ bẹdẹ bẹdẹ a rẹ rehọ udu rai kpobi tha egagọ uzẹme uke. A rẹ jọ wọhọ Jehonadab, hayo Jonadab, nọ ọrọ ohwo Izrẹl he nọ ọ gọ Jihova. Nọ Jehu ọ jẹ rehọ ọwhọ wha iruo riẹ haro, Jehonadab ọ tẹ gwọlọ nọ o re dhesẹ ọjẹrehọ gbe uketha riẹ. Fikiere ọ tẹ ruọ otafe bru ovie ọkpokpọ Izrẹl na, ọnọ ọ be dhẹ kpohọ Sameria re o kpe ahwo nọ i kiọkọ evaọ uwou Ehab. Nọ ọ ruẹ Jehonadab, Jehu ọ tẹ nọ nọ: “Who wo eva uzẹme kpahe omẹ wọhọ epanọ me wo kpahe owhẹ na?” Emamọ uyo nọ Jehonadab ọ kẹ o tẹ wọ Jehu nọ ọ rọ riobọ o te zizie Jehonadab rueva akẹkẹ ẹmo riẹ, ta nọ: “Lele omẹ re whọ ruẹ epanọ mẹ rọ kuvẹ kẹ ọkparesuọ Jihova ha.” (NW ) Ababọ okioraha, Jehonadab ọ tẹ jẹ uvẹ nọ ọ rẹ rọ thọ okpikpakpe nọ Jihova o wholo na uke.—2 Ivie 10:15-17.

12. Fikieme Jihova ọ jẹ gwọlọ egagọ mai kpobi?

¹² Re ohwo ọ rehọ udu riẹ kpobi thọ egagọ uzẹme u fo, keme Jihova họ Ọnọma na gbe Osu Ehrugbakpọ, ọnọ ọ gwọlọ je fo kẹ egagọ mai kpobi. O juzi kẹ emọ Izrẹl nọ: “Whọ kare ẹdhọ ọvuọvo kẹ oma ra ha, hayo ithatho oware nọ o rọ obọ ehru, hayo oware nọ o rọ obọ otọ akpọ, hayo oware nọ o rọ obọ otọ ame eva otọ akpọ; who ruwẹ kẹ ae he, whọ gọ ae gbe he; keme mẹ họ ỌNOWO na Ọghẹnẹ ra mẹ Ọghẹnẹ ọre-ihri.” (Ọnyano 20:4, 5) Ahwo nọ i wo irẹro ẹzọ vrẹ ‘ẹdẹ Jihova’ a rẹ gọe ọye ọvo, a rẹ rọ “ẹzi gbe uzẹme gọ e.” (Jọn 4:23, 24) A rẹ jọ gaga kẹ egagọ uzẹme, wọhọ Elaeja, Elaesha, gbe Jehonadab.

13. Epanọ udu Jehonadab o jọ kugbe Jehu na, amono a vuhu Ovie Mesaya na mu no, kọ ẹvẹ a bi ro dhesẹ iẹe?

¹³ Nọ o kpe uwou Ehab no, Jehu Ovie na ọ tẹ j’owọ ọfa re o vuhu egegagọ Ebale re o voro egagọ ọrue ọnana no Izrẹl no. (2 Ivie 10:18-28) Nẹnẹ, a rehọ Jesu Kristi, Ovie obọ odhiwu na mu no re o kpe ewegrẹ Jihova jẹ kpare esuo Riẹ kpehru. Epanọ udu Jehonadab o jọ kugbe Jehu na, “otu obuobu” ọrọ “igodẹ efa” Jesu inẹnẹ na a be rehọ udu kpobi wo ovuhumuo kẹ Kristi wọhọ Ovie Mesaya je yoẹme kẹ inievo ẹzi riẹ evaọ otọakpọ. (Eviavia 7:9, 10; Jọn 10:16) A be rehọ egagọ uzẹme rai dhesẹ onana via gbe ọwhọ nọ a bi dhesẹ ro wo abọ evaọ odibọgba Oleleikristi na, be vẹvẹ ewegrẹ Ọghẹnẹ unu kpahe ẹkẹle ‘ẹdẹ Jihova.’—Matiu 10:32, 33; Ahwo Rom 10:9, 10.

Ikpeware E Rọ Obaro Mai Kẹle Na!

14. Eme ọ rọ obaro be hẹrẹ egagọ erue?

¹⁴ Jehu ọ j’owọ re o si egagọ Ebale no Izrẹl no. Evaọ edẹ mai na, ẹkwoma Jehu Ologbo na, Ọghẹnẹ ọ Jesu Kristi ọ te rehọ ọraha Babilọn Ologbo na ze, isuẹsu egagọ ọrue akpọ na. Kẹle na ma te ruẹ orugba eme enjẹle na nọ ọ ta kẹ Jọn ukọ na nọ: “Izei ikpe nọ whọ [ruẹ] na, ae gbe arao na, a re ti mukpahe ogberẹ na [Babilọn Ologbo na]; a re ti fi ei họ ababọ avọ ẹbẹba, a rẹ te raha oma riẹ no, a vẹ rehọ erae mahe iẹ. Keme Ọghẹnẹ o fi ẹzi na họ ae eva re a ruẹse ru orọ eva riẹ, re ai kpobi a jọ eva evo, re a jẹ rehọ ogaga uvie rai rọ kẹ arao na, bẹsenọ eme Ọghẹnẹ erẹ te gbano.” (Eviavia 17:16, 17; 18:2-5) “Izei ikpe” na i dhesẹ egbaẹmo ogaga esuo nọ i bi su otọakpọ na. Dede nọ a wo usu ẹnwae-obro ẹzi obọnana kugbe Babilọn Ologbo na, oke riẹ o rẹ kpẹkpẹe. Isu akpọ ọnana a te raha egagọ erue no, yọ “arao na”—Okugbe Erẹwho na—o ti wo abọ ologbo kugbe “izei ikpe” na evaọ ẹraha riẹ.b Ẹvẹ onana o te jọ oke ajiri kẹ Jihova te!—Eviavia 19:1-6.

15. Eme ọ te via okenọ ahwo a tẹ daoma re a raha ukoko otọakpọ Ọghẹnẹ?

¹⁵ Nọ Jehu Ovie na ọ raha egagọ Ebale no, uwou uvie riẹ o tẹ rẹriẹ ova ku ewegrẹ esuo Izrẹl. Oghẹrẹ owọ ọvo na Jesu Kristi Ovie na ọ te jẹ re. Ogaga isuẹsu o te gbẹ jariẹ nọ egagọ erue nọ e wọhọ Ebale e tẹ raha no. Evaọ otọ okpomahọ Setan Ẹdhọ na, ewegrẹ esuo Jihova enana a te rọ ẹgba rai kpobi wọ ohọre ze evaọ omodawọ re a raha ukoko otọakpọ Ọghẹnẹ no. (Izikiẹl 38:14-16) Rekọ Jihova ọ te rehọ Jesu Kristi Ovie na tehe ai kpe eva Amagidọn, “ẹmo ologbo Ọghẹnẹ Erumeru na,” nọ o te jọ orugba ẹkpare kpehru esuo Jihova.—Eviavia 16:14, 16; 19:11-21; Izikiẹl 38:18-23.

Ẹgọ Avọ Oghẹrẹ Ọwhọ Elaesha

16, 17. (a) Ẹvẹ ma rọ riẹ nọ Elaesha o wo ọwhọ ri te ekuhọ uzuazọ riẹ? (b) Eme ma rẹ rehọ ese uzẹme na ru?

¹⁶ Taure ‘ẹdẹ Jihova’ ọ tẹ te rehọ eyero-akpọ omuomu Setan kpobi ze ekuhọ, idibo Ọghẹnẹ a ti wo aruọwha gbe ọwhọ wọhọ Elaesha. U te no iruo riẹ no wọhọ odibo Elaeja, Elaesha ọvo o je ruiruo wọhọ ọruẹaro Jihova bu vi ikpe 50! Yọ Elaesha o wo ọwhọ ri te ekuhọ uzuazọ uthethe riẹ. Taure o te ti whu, ọmọ-uruọmọ Jehu, Jehoash Ovie na, o weze bru rie. Elaesha ọ ta kẹe re ọ sa ose nya unwido vrẹ. Ose na o tẹ sa oria nọ a kpọ riẹ riwi, fikiere Elaesha o te bo nọ: “Ose obokparọ ỌNOWO na, Ose nọ arọ kpare obọ vi Siria! Keme wha ti lele ahwo Siria họra obọ Afek [bẹsenọ wha] re ro kpe ai no.” Eva ayare Elaesha, Jehoash ọ tẹ rọ ose na sa otọ. Rekọ o ru onana ababọ ọwhọ, ọ sa otọ na isiasa ọvo. Elaesha ọ tẹ ta nọ, fiki onana, isiasa ọvo Jehoash o ti fi Siria kparobọ, yọ ere o ghinẹ via. (2 Ivie 13:14-19, 25) Jehoash Ovie na o kpe ahwo Siria riẹriẹriẹ hẹ, ‘o kpe rai ovavo ho.’

¹⁷ Avọ ọwhọ wọhọ orọ Elaesha, ikiọkotọ nọ a kẹ ẹzi na a gbẹ be họre mukpahe egagọ erue. Egbẹnyusu rai nọ i wo ẹruore otọakpọ a bi ru epọvo na re. Ofariẹ, ahwo nọ a rẹro ẹzọ vrẹ ‘ẹdẹ Jihova’ kpobi a rẹ kareghẹhọ eme ọwhọ Elaesha kpahe ose nọ a rọ sa otọ na. Joma rehọ ese uzẹme re ma rehọ ọwhọ rehọ ai sa—ẹsẹsa ọvo—ẹhẹ, bẹsenọ Jihova ọ rẹ ta nọ iruo ese na evaọ obọ mai u te no.

18. Didi uyo ma rẹ rọ kẹ eme ọ 2 Pita 3:11, 12 na?

¹⁸ ‘Ẹdẹ Jihova’ ọ te rehọ eyero-akpọ omuemu ọnana te oba obọnana. Fikiere joma ru udu mai lọlọhọ re eme omosasọ Pita ukọ na e wọ omai. Pita ọ ta nọ: “Kinọ enana kpobi e rẹte ghinẹ raha no na, didi oghẹrẹ ahwo wha hẹ jọ eva uzuazọ ẹfuọ gbe orọ Ọghẹnẹ, nọ owha be hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ” na! (2 Pita 3:11, 12) Okenọ erae ofu Ọghẹnẹ ẹkwoma Jesu Kristi e tẹ raha eyero ọnana kpobi no, ahwo nọ i wo uruemu uwoma gbe orọ omarọkẹ Ọghẹnẹ ọvo a te dhẹ vabọ. Ẹfuọ uruemu gbe orọ ẹzi e rọ oja. Ere o rọ re kẹ uyoyou kẹ erivẹ, nọ a re dhesẹ ẹkwoma obufihọ kẹ ẹgwọlọ rai, maero evaọ edhere ẹzi ẹkwoma odibọgba Oleleikristi na.

19. Eme ma re ru hrọ re ma zọ vrẹ ‘ẹdẹ Jihova’ na?

¹⁹ Kọ ẹmeunu gbe iruẹru ra i bi dhesẹ owhẹ via wọhọ odibo ẹrọwọ ajọwha Ọghẹnẹ? Otẹrọ ere, whọ rẹ sai wo irẹro ẹzọ vrẹ ‘ẹdẹ Jihova’ kpohọ akpọ ọkpokpọ eyaa Ọghẹnẹ. Ẹhẹ, whọ rẹ zọ otẹrọnọ who ru ewoma kẹ inievo ẹzi Jesu fikinọ a rọ ilele riẹ, wọhọ epanọ ọzae avọ aye Shunẹm na a ghọ Elaesha na. Rọ kẹ azọ, whọ rẹ jẹ jọ wọhọ Neaman, ọnọ ọ rehọ omurokpotọ jẹ uthubro Ọghẹnẹ rehọ ọ tẹ gọ Jihova. O tẹ rọ isiuru ra re whọ rria bẹdẹ bẹdẹ evaọ aparadase otọakpọ, who re dhesẹ uketha ra kpobi kẹ egagọ uzẹme, wọhọ epanọ Jehonadab o ru. Kọ ere oruo whọ rẹ rọ jọ udevie idibo ẹrọwọ Jihova, enọ e te ruẹ orugba eme ọ Jesu kẹle na: “Wha nyaze, enọ Ọsẹ mẹ ọ ghale, wha te reuku uvie nọ a ruẹrẹ kẹ owhai nọ emuhọ akpọ na ze.”—Matiu 25:34.

[Footnotes]

Didi Uyo Whọ Te Kẹ?

◻ Didi ekwakwa jọ a gwọlọ re ma sae zọ vrẹ ‘ẹdẹ Jihova’?

◻ Didi oriruo imava-orọo obọ Shunẹm a dhesẹ evaọ edẹ Elaesha?

◻ Eme ma re wuhrẹ mi Neaman?

◻ Ẹvẹ ma sai ro lele oriruo Jehonadab?

◻ Ẹvẹ 2 Pita 3:11, 12 u ro kpomahọ omai?