Uzou Avọ 48
Eno Uwou Jairọs gbe Ẹwariẹ Zihe Kpohọ Nazarẹt
JESU o ruiruo buobu no evaọ ẹdẹ na—ubiokọ abade no Dẹkapọlis, esiwo aye nọ o je hwẹ azẹ, gbe ẹkpare ọmọtẹ Jairọs. Rekọ oke u ri kpo ho. Okenọ Jesu o je no uwou Jairọs ze, ezae ituaro ivẹ a te bi lele iei, bi bo nọ: “Ọmọ Devidi, ohrọ mai o re owhẹ.”
Ẹkwoma Jesu nọ a se “Ọmọ Devidi” na, ezae enana a te bi dhesẹ orọwọ rai inọ Jesu họ ọreuku agbara-uvie Devidi, inọ ọye họ Mesaya nọ a yeyaa riẹ na. Ghele na, Jesu o te ru epaọ ẹsenọ o bi yo edo ubo rai kẹ obufihọ họ, ẹsejọhọ re ọ ruẹ epanọ akothiwo rai ọ rro te. Rekọ o bẹ ezae na ha. A te lele Jesu te oria nọ ọ be rria, yọ nọ ọ rueva uwou na no, a te lele iei rueva.
Evaọ etẹe Jesu ọ tẹ nọ nọ: “Wha rọwo nọ mẹ rẹ sai ru onana?”
A te yo avọ ududu nọ: “E, Ọnowo.”
Fikiere, nọ ọ r’obọ te ai aro, Jesu ọ tẹ ta nọ: “Epanọ ẹrọwọ rai ọ rọ a ru ere kẹ owhai.” Idudhe na aro rai o te rovie! Jesu ọ tẹ vẹvẹ ai unu gaga nọ: “Ri, wha ru re ohwo ọvo ọ riẹ hẹ.” Rekọ fiki oghọghọ, a tẹ tehe ezọ di kẹ unuovẹvẹ Jesu a tẹ t’ẹme kpahe iẹe evaọ orẹwho na kpobi.
Nọ ezae enana a nwane ruọ otafe no, ahwo a tẹ rehọ ọzae nọ idhivẹri e roma ze ọnọ idhivẹri na i dienu no. Jesu o te le idhivẹri na noi oma, yọ idudhe na ọzae na o te mu ẹme họ ẹta. Eware igbunu enana i te gbe ogbotu na unu, anọ: “Ma te ruẹ utiona ẹdẹ ọvo eva Izrẹl he.”
Ahwo Farisi a ja riẹ re. A rẹ sae vro eware igbunu enana ha, rekọ evaọ avro omuomu rai a tẹ wariẹ eme ẹsọ rai kpahe ehri eware igbunu Jesu na, ta nọ: “Fiki olori ukumuomu o bi ro le izi iyoma no.”
U kri hi nọ eware enana e via no, Jesu o te zihe kpohọ Nazarẹt ẹwho riẹ, oke nana avọ ilele riẹ usu. Ole ukpe ọvo nọ u kpemu no, o kpohọ uwou-egagọ na ọ tẹ jọ obei wuhrẹ. Dede nọ eme awere riẹ e kake were ahwo na oma, ewuhrẹ riẹ ọ tẹ dhae eva uwhremu na a tẹ gwọlọ nọ a re kpei. Enẹna, avọ ohrọ, Jesu o te ru omodawọ ọfa re o fiobọhọ kẹ erivẹ ọsosuọ riẹ.
Okenọ ọ jọ eria efa ahwo a re su bru Jesu ze, o wọhọ nọ a jọ etenẹ su bru ei hi. Fikiere, evaọ Ẹdijala, o te kpohọ uwou-egagọ na nyai wuhrẹ. U te gbe ahwo buobu nọ a bi yo eme riẹ unu. A tẹ nọ nọ: ‘Bovẹ ohwo na o je wo areghẹ ọ nana gbe iruo ogaga enana? Kọ o gbẹ rọnọ ọmọ ọwena na? Kọ o gbẹ rọ ọnọ a re se oni riẹ Meri na? Gbe imoni riẹ Jemis gbe Josẹf gbe Saimọn gbe Judas na? Gbe imoni emetẹ riẹ kpobi ma gbẹrọ na? Kọ bovẹ ohwo na o je wo eware enana kpobi?’
Iroro rai họ: ‘Jesu yọ ohwo nọ ọ wọhọ omai. Ma rue riẹ no emaha ze, ma tẹ jẹ riẹ uviuwou riẹ. Ẹvẹ ọ sae rọ jọ Mesaya na?’ Fikiere makọ imuẹro na kpobi—areghẹ ologbo gbe eware igbunu riẹ—a tẹ siẹe. Fikinọ a riẹ riẹ hrọ, makọ imoni riẹ dede a tẹ siẹe, o tẹ suẹe ze nọ Jesu ọ rọ ta nọ: “Ọruẹaro ọ rọ ababọ adhẹ hẹ, ajokpa orẹwho obọriẹ, gbe udevie orua riẹ, gbe uwou obọ riẹ ovo.”
Evaọ uzẹme, ababọ ẹrọwọ rai u gbe Jesu unu. Fikiere ọ jọ etẹe ru oware igbunu ọvo ho ajokpa abọ nọ ọ rọ kpahe ahwo jọ nọ e jẹ mọ o te siwi ai. Matiu 9:27-34; 13:54-58; Mak 6:1-6; Aizaya 9:7.
▪ Ẹkwoma Jesu nọ a se “Ọmọ Devidi,” eme ezae ituaro na a dhesẹ nọ a rọwo?
▪ Didi eme otu Farisi na a suobọhọ kpahe eware igbunu Jesu?
▪ Fikieme o jẹ rọ oware ohrọ kẹ Jesu re o zihe nya i fiobọhọ kẹ ahwo nọ e rọ Nazarẹt?
▪ Didi odederehọ a kẹ Jesu evaọ Nazarẹt, kọ fikieme?