Jesu Ọkpare Enọ Iwhuno

ỌMỌTẸ nọ whọ rẹ ruẹ etenẹ na, ikpe 12 ọkpako te. Jesu o kru obọ riẹ, ọsẹ gbe oni riẹ ae a dikihẹ kẹle na. Kọ whọ riẹ onọ osoriẹ nọ a jẹ be ghọghọ tere? J’oma gwọlọ via.

Ọsẹ ọmọtẹ na ohwo ologbo odẹ riẹ họ Jairọs. Ẹdẹjọ ọmọtẹ riẹ ọ tẹ be mọ, a te fiei họ ehwa. Rekọ ọ sasa ghele he. Ẹmẹmọga ẹmẹmọga ọvo ọrọ. Jairọs avọ aye riẹ a tẹ be ruawa gaga, keme owọhọ nọ ọmọtẹ ọsese rai o bi ti whuẹ. Ọmọtẹ ọyena ọvo a woi. Fikiere Jairọs ọ tẹ be gwọlọ Jesu. O yo kpahe eware igbunu nọ Jesu o re ruo.

Okenọ Jairọs ọ ruẹ Jesu, yọ ogbotu buobu ọware riẹ họ. Rekọ Jairọs o te duwu uzou họ evie ogbotu na vrẹ o te kie fihọ awọ Jesu. Ọ tẹ ta nọ: ‘Ọmọtẹ mẹ ọ rẹ mọ gaga.’ Ọ tẹ lẹe nọ, ‘Iviena nyaze re who siyei.’ Jesu ọ tẹ ta nọ ọ be te nyaze.

Epanọ ogbotu na a be rọ nya na, a te muhọ ẹnwẹ re a kẹliẹe. Jesu ọ tẹ da oma ji idudhe. Ọ tẹ ta nọ, ‘Ono ọ rehọ obọ te omẹ na?’ Jesu ọ riẹ nọ ogaga uno rie oma, fikiere ọ tẹ riẹ nọ ohwo jọ ọ rehọ obọ tei. Kọ ono? Aye jọ nọ ọ be mọ gaga anwọ ikpe 12. Ọ nyaze ọ tẹ rehọ obọ te iwu Jesu a te siyei!

Onana otẹ liẹliẹ oma Jairọs sasa, keme ọ ruẹ epanọ ohwo osiwo ọlọhọ kẹ Jesu te. Rekọ udevie ere na ọnyaukọ ọ tẹ nyaze. Ọ tẹ vuẹ Jairọs nọ, ‘Who gbe kpokpo Jesu ofa ha, ọmọtẹ ra owhu no.’ Jesu o te yo onana ọ tẹ ta kẹ Jairọs nọ: ‘Whọ ruawa ha, ọ rẹ te sasa.’

Okenọ a ti te uwou Jairọs, yọ ahwo a be viẹ avọ uweri ulogbo. Rekọ Jesu ọ tẹ ta nọ: ‘Wha gbẹ viẹ hẹ. Ọmọ na owhu hu. Owezẹ ọvo ọrọ.’ Rekọ a tẹ hwẹ a te se Jesu ẹkoko, keme a riẹ nọ owhu no.

Koyehọ Jesu ọ tẹ rehọ ọsẹ ọmọtẹ na avọ oni riẹ gbe imasa ikọ riẹ kpobọ ukpẹ nọ ọmọ na ọrọ. O te kru ei obọ ọ tẹ ta nọ: ‘Kparoma!’ Ọ tẹ ze uzuazọ, wọhọ epanọ whọ rọ etenẹ ruẹ na. Ọ tẹ kparoma o te muhọ ẹnya kpenẹ avọ enẹ! Kọ oye osoriẹ nọ oni gbe ọsẹ riẹ a jẹ be ghọghọ gaga na.

Orọnikọ ọnana họ ohwo ọsosuọ nọ Jesu ọkpare no iwhuowhu ze he. Orọ ọsosuọ nọ Ebaibol igbiku kpahe họ ọmọzae aye uku nọ ọ be ria okpẹwhọ ọ Nein. Oke ofa, Jesu ọkpare Lazarọs oniọvo Meri gbe Mata, no iwhuowhu ze re. Okenọ Jesu o ti suẹ wọhọ ovie Ọghẹnẹ ọ te rehọ ahwo owhuowhu buobu buobu zihe ze uzuazọ. Kọ eva egbẹ were omai kpahe oyena?