Uzou Avọ 47
Irui-Oviẹ I Zihe Ruọ Oghọghọ Ulogbo
OKENỌ Jairọs ọ ruẹ epanọ a ro si aye nọ o je hwẹ azẹ na, ababọ avro evaifihọ riẹ kẹ ogaga nọ Jesu o re ro siwi o tẹ rro viere. Evaọ abọ emuhọ ẹdẹ ọyena, Jairọs o bru Jesu ze no vẹre re ọ nyaze ti siwi ọmọtẹ ikpe 12 oyoyou riẹ, ọnọ ọ kẹle uwhu no. Enẹna, oware nọ Jairọs ọ be mai brudu riẹ na o tẹ via. Nọ Jesu ọ gbẹ be t’ẹme kugbe aye na, ezae jọ a tẹ nyaze a tẹ lẹlẹ ta kẹ Jairọs nọ: “Ọmọtẹ ra o whu no; fikieme whọ jẹ gbẹ be lahiẹ owuhrẹ [na]?”
Ẹvẹ usi onana u yoma te! Dai roro kpahe iẹe: Ọzae ọnana, ọnọ ahwo kpobi a be kẹ adhẹẹ evaọ okegbe na, ọ rọ iyiyẹ nọ o yo kpahe uwhu ọmọtẹ riẹ. Ghele na, eme na i te fi ruọ Jesu ezọ. Fikiere, nọ ọ rẹriẹ aro ku Jairọs, ọ tẹ ta avọ uduotahawọ nọ: “Whọ dhẹ ozọ họ, thakpe rọwo.”
Jesu o te lele ọzae ọkora na kpohọ uwou riẹ. Nọ a te obei, a tẹ ruẹ edo oviẹ gbe uweri. Ahwo a koko họ no, yọ a be viẹ avọ uweri. Nọ Jesu ọ rueva, ọ tẹ nọ nọ: “Fikieme wha je bi ru edo gbe oviẹ? Ọmọ na o whu hu, rekọ ọ rọ owezẹ.”
Nọ a yo onana, ahwo na a tẹ be rehọ Jesu jijehwẹ keme a riẹ nọ ọmọtẹ na o ghine whu no. Ghele na, Jesu ọ ta nọ ọ be wezẹ gheghe. Ẹkwoma ogaga nọ Ọghẹnẹ ọ kẹ riẹ, o ti dhesẹ nọ a rẹ sae kpare ahwo ziọ uzuazọ lọlọhọ wọhọ epanọ a rẹ sae rọwo ai no owezẹ udidi ze na.
Jesu o te ru re a vi ahwo na kpobi ruọ otafe, ajokpa Pita, Jemis, Jọn, gbe ọsẹ gbe oni ọmọtẹ na. Ọ tẹ rehọ imasoi enana kpohọ oria nọ a rehọ ọmọtẹ ọboba na kiẹzẹ. Nọ o kru obọ riẹ, Jesu ọ tẹ ta nọ: “Tali-ta kumi,” nọ otofa riẹ o rọ: “Ọmọtẹ ọ kakao, mẹ ta kẹ owhẹ nọ kparoma.” Idudhe na ọmọtẹ na ọ tẹ kparoma o te mu onya họ! Ọsẹ gbe oni riẹ a jẹ te m’oruẹ no fiki oghọghọ ulogbo.
Nọ ọ ta kẹ ai no nọ a kẹ ọmọ na oware nọ ọ rẹ re, Jesu ọ tẹ ta kẹ Jairọs avọ aye riẹ nọ a fodẹ oware nọ o via na kẹ ohwo ọvo ho. Rekọ makọ oware nọ Jesu ọ ta, ẹme kpahe iẹe o tẹ vaha nya ofẹ oyena kpobi duwu. Onana họ ẹkparomatha avivẹ nọ Jesu o ru. Matiu 9:18-26; Mak 5:35-43; Luk 8:41-56.
▪ Didi usi u bru Jairọs ze, kọ ẹvẹ Jesu ọ rọ tudu họ iẹe awọ?
▪ Eme ọ jẹ via okenọ a te uwou Jairọs?
▪ Fikieme Jesu ọ jẹ ta nọ ọmọ owhuowhu na ọ rọ owezẹ gheghe?
▪ Amono họ imasoi nọ e jọ kugbe Jesu nọ e ruẹ ẹkparomatha na?