Jesu Ọ Kpare Ọmọtẹ Jọ No Uwhu Ze

Jairọs ọ jọ etẹe nọ Jesu o siwi aye nọ o je hwẹ azẹ na. Onana o kẹ riẹ imuẹro nọ Jesu ọ te sai fiobọhọ kẹ ọmọtẹ riẹ re, dede nọ o roro nọ ‘ọmọtẹ riẹ o ti whu no.’ (Matiu 9:18) Kọ Jesu ọ sai gine gbe fiobọhọ kẹe?

Nọ Jesu ọ be gbẹ ta ẹme kẹ aye nọ o siwi na, ezae jọ i te no obọ uwou Jairọs ze te ta kẹe nọ: “Ọmọtẹ ra o whu no!” A te fibae nọ: “Who gbe du kpokpo Owuhrẹ na ha.”—Mak 5:35.

Usi na u yoma kẹhẹ. Ọzae nana nọ ahwo a rẹ kẹ adhẹẹ gaga evaọ ẹwho na, iyẹ i yẹ riẹ no. Ọmọtẹ ọvo riẹ o whu no. Rekọ nọ ẹme nọ ahwo na a ta kẹe na o fi ruọ Jesu ozọ, ọ tẹ rẹriẹ ovao ku Jairọs jẹ tuduhọ iẹe awọ nọ: “Jọ ozọ u mu owhẹ hẹ; thakpi wo ẹrọwọ.”—Mak 5:36.

Jesu o te lele Jairọs te obọ uwou. Nọ a te obei, oria kpobi u duwu ku. Ahwo nọ a kuku etẹe a be viẹ, bi bo gaga. Nọ Jesu ọ ruọ uwou na ọ tẹ ta ẹme jọ nọ u gbe ahwo na kpobi unu, inọ: “Ọmọ na o whu hu rekọ ọ be wezẹ.” (Mak 5:39) Nọ ahwo a yo ẹme nana, a te mu Jesu họ ẹhwẹ. A riẹ nọ ọmọtẹ na o whu no. Rekọ Jesu o bi ti dhesẹ kẹ ae nọ ọ sae rọ ogaga nọ Ọghẹnẹ ọ kẹ riẹ rọ kpare ohwo no uwhu ze, wọhọ epanọ a rẹ rọwo ohwo no owezẹ udidi ze na.

Jesu o te vi ahwo na kpobi ruọ otafe, kiọkọ Pita, Jemis, Jọn, gbe ọsẹgboni ọmọtẹ nọ o whu na. Jesu avọ imasoi nana a tẹ nya kpohọ oria nọ ọmọ na ọ jọ. Jesu o te kru obọ ọmọ na, ọ tẹ ta nọ: “‘Talita kumi,’ onọ otofa riẹ o rrọ: ‘Ọmọtẹ ọsese, mẹ be ta kẹ owhẹ nọ, “Kpama!”’” (Mak 5:41) Ọmọtẹ na ọ tẹ nwane kpama je muhọ ẹnya. A rẹ ruẹ unu gbiku oghọghọ nọ o jọ Jairọs avọ aye riẹ oma ha nọ a ruẹ ọmọ rai nọ ọ kpama. Re u mu ohwo kpobi ẹro nọ ọmọ na ọ ginẹ rrọ uzuazọ, Jesu ọ tẹ ta nọ a kẹ ọmọ na emu re ọ re.

Jesu ọ tẹ ta kẹ ọsẹgboni ọmọ na nọ a vuẹ ohwo ọvo ho, wọhọ epanọ ọ rẹ ta kẹ ahwo nọ o siwi. Ghele na, ọsẹgboni nana nọ oghọghọ o da oma fia gbe amọfa a tẹ vaha usi nana “ruọ ubrotọ yena soso.” (Matiu 9:26) O hae jọnọ omoni ra hayo ogbẹnyusu ọkpekpe ra nọ o whu a kpare ze na, kọ whọ hae te fare unu ra? Ọmọtẹ Jairọs na họ ohwo avivẹ nọ Jesu ọ kpare no uwhu ze nọ a kere fihọ Ebaibol na.