Uzou Avọ 46

Ọ r’Obọ Te Ewu Riẹ

USI nnọ Jesu o no Dẹkapọlis ze no u te Kapaniọm no, yọ ogbotu obuobu a koko họ akotọ abade na no re a dede iei rehọ. Ababọ avro a yo no inọ ọ whọku ẹkporo o te je siwi ọzae nọ idhivẹri e j’oma. Enẹna, nọ ọ jowọ ruọ okpa no, a te su wariẹ iẹe, avọ ọwhọ gbe irẹro.

Usu ahwo nọ e be gwọlọ ruẹ Jesu avọ ọwhọ na họ Jairọs, okpohwo uwou-egagọ na. O te kie fihọ awọ Jesu o te dhei ẹlẹlẹ: “Ọmọtẹ ọkakao mẹ o biti se ẹwẹ họ no; mẹ lẹ owhẹ re whọ nyaze te rehọ obọ ra kpahiẹe, re ọ zọ.” Nọ o rọnọ ọmọtẹ ọnana ọvo họ ọmọ riẹ gbe nọ ikpe 12 ọvo ọ rọ na, ọ rọ ghaghae kẹ Jairọs gaga.

Jesu ọ tẹ gaviezọ kẹe, yọ avọ ogbotu na nọ i bi lele iei, o te muọ uwou Jairọs họ ekpohọ. Whọ rẹ sai roro kpahe ọwhọ nọ ọ rọ ahwo na oma keme a bi rẹro oware igbunu ọfa. Rekọ oware nọ o rọ aye jọ nọ ọ rọ ogbotu na oja họ ẹbẹbẹ ologbo riẹ.

Anwọ ikpe 12 na, aye ọnana ọ be ruẹ-uye azẹ-ohwẹ. Ọ nya bru edọkita sa-sa no, ọ tẹ jẹ raha ugho riẹ kpobi no fihọ imu. Rekọ o wo obufihọ họ; ukpoye, ẹyao na o bi dhe ẹgẹga.

Wọhọ epanọ whọ riẹ, u te no oma nọ o rẹ lọhọ iẹ no, ẹyao riẹ na o re je ru ohwo oma vo. Ohwo ọ rẹ jọ ogbotu fodẹ ẹyao otiọye he. Ofariẹ, evaọ Uzi Mosis na aye nọ o bi hwẹ azẹ ọ rọ gbegbe, yọ ohwo nọ ọ kaobọ tei kpobi hayo kaobọ te iwu riẹ nọ azẹ o wholo na u fo nọ ọ rẹ họ ọ vẹ jẹ jọ gbegbe bọwo owọwọ.

Aye na o yo kpahe eware igbunu Jesu no yọ enẹna ọ gwọlọ e riẹ via no. Fikinọ ọ rọ gbegbe, ọ tẹ lẹlẹ vivie oma ruọ udevie ogbotu na, be ta kẹ oma riẹ nọ: “Mẹ tẹ sidhẹ rehọ obọ te ewu riẹ, a re ti si omẹ.” Nọ o ru ere no, azẹ-ohwẹ riẹ ọ tẹ nwane ka!

“Ono ọ rọ obọ te omẹ na?” Ẹvẹ eme Jesu enana i bru aye ọnana udu te! Ẹvẹ ọ rọ riẹ? Pita o te sikẹ nọ, ‘Owuhrẹ, ahwo buobu a wariẹ owhẹ họ, be nwẹ owhẹ, whọ vẹ be ta nọ, “Ono ọ rehọ obọ te omẹ?” ’

Nọ o bi rri wariẹ gwọlọ aye na, Jesu ọ tẹ ta nọ: “Ohwo jọ ọ rọ obọ te omẹ, keme mẹ riẹ nọ, ogaga u no oma mẹ vrẹ.” Evaọ uzẹme, orọnikọ obọrote gheghe he, keme usiwo nọ u no rie ze o rehọ ogaga Jesu.

Nọ ọ ruẹ nọ ọ sae dhẹ vabọ họ, aye na ọ tẹ nyaze o te kie fihọ aro Jesu, avọ ozọ gbe eguegue. Evaọ iraro ahwo na kpobi, ọ tẹ ta uzẹme na kpobi kpahe ẹyao riẹ gbe oghẹrẹ nọ a ro siwi ei no obọnana.

Avọ ọdawẹ kẹ eva nọ ọ fa, Jesu ọ tẹ rehọ ohrọ sasa iẹe oma: ‘Ọmọtẹ, ẹrọwọ ra o si owhẹ no; nyawa tou, a si owhẹ no ẹmọ ra no.’ Ẹvẹ u woma te re ma riẹ nọ Ọnọ Ọghẹnẹ ọ salọ re o su otọakpọ na ọ rọ ohwo ọsasa, je wo ọdawẹ tere, ọnọ ọ rẹ sẹro ahwo je wo ogaga nọ o re ro fiobọhọ kẹ ai! Matiu 9:18-22; Mak 5:21-34; Luk 8:40-48; Iruo-Izerẹ 15:25-27.

▪ Ono họ Jairọs, kọ fikieme o je bru Jesu ze?

▪ Didi ẹbẹbẹ aye jọ o wo, kọ fikieme ẹnya bru Jesu ze kẹ obufihọ o jẹ rọ bẹbẹ kẹe?

▪ Ẹvẹ a ro si aye na, kọ ẹvẹ Jesu ọ rọ sasa iẹe oma?