Nọ Ọ rọ Obọ Te Ewu Jesu, Ẹyao Riẹ O te Kpo

Usi u do te ahwo Ju nọ a be rria ofẹ obọze ukiediwo-ọre Abade Galili oma, inọ Jesu o bi no obọ Dẹkapọlis ze. Ababọ avro, a yo epanọ Jesu o ro ru ẹkporo ọgaga nọ o je fi evaọ abade na kẹle na fọ, yọ ẹsejọhọ a yo kpahe epanọ o ro siwi ọzae nọ izi imuomu e jọ oma na. Fikiere “ogbotu ahwo buobu” a te kokohọ akotọ abade na, ẹsejọhọ evaọ Kapaniọm, re a dede Jesu. (Mak 5:21) Nọ ọ nwani te okpa, ahwo na kpobi a tẹ tẹrovi ei kiọkiọkiọ bi rẹro oware nọ o ti ru kẹ ae.

Ohwo jọ evaọ usu rai nọ oma o be kpakpa re ọ ruẹ Jesu họ Jairọs, omọvo enọ i wuzou evaọ uwou-egagọ na, ẹsejọhọ onọ o rrọ Kapaniọm. Nọ ọ ruẹ Jesu, o te kigwẹ fihọ aro riẹ, be lẹe gaga nọ: “Ọmọtẹ ọsese mẹ ọ be mọ gaga. Ivie nyaze whọ rọ abọ ra kpahe iẹe re ẹyao riẹ o kpo.” (Mak 5:23) Kọ eme Jesu o ti ru kpahe olẹ nọ ọzae nana ọ be lẹe na, inọ o siwi ọmọtẹ ọvo riẹ nọ ọ rrọ ikpe 12 nọ ọ rrọ ghaghae kẹe na?—Luk 8:42.

Nọ Jesu ọ rrọ edhere bi kpobọ uwou Jairọs na, ọ tẹ nyaku oware ofa jọ. Eva e be were ibuobu evaọ usu ahwo nọ a bi su lele Jesu na, a bi rẹro nọ Jesu o ti ru oware igbunu ofa nọ a te ruẹ. Rekọ aye jọ evaọ usu rai ọ tẹrovi ẹyao jọ nọ ọ riẹe oma nọ ọ be kẹe uye gaga.

Anwọ ikpe 12 ena nọ aye nana nọ ọ rrọ ohwo Ju na o bi ro hwẹ azẹ. Ọ dhẹ bru edọkita buobu no jẹ raha igho riẹ kpobi fihọ eware nọ a bi dhesẹ nọ e rẹ sai siwi ẹyao na. Rekọ ẹyao na ọ gbẹ rrọ etẹe. Evaọ uzẹme, ẹyao na ọ be “ga” ọvo.—Mak 5:26.

Ẹyao nana o re ru oma lọhọ ohwo gaga, yọ o re kpomovuọ họ ohwo oma. Orọnikọ ẹyao nana yọ ẹyao nọ ahwo a re mu ro gbiku hu. U te no ere no, Uzi nọ Ọghẹnẹ ọ rọ kẹ Mosis o ta nọ aye nọ o bi hwẹ azẹ ọ rẹ jọ gbegbe evaọ etoke yena. Ohwo kpobi nọ ọ rọ obọ tei hayo iwu riẹ nọ azẹ na o wholo ọ rẹ họ jẹ fọrọ iwu riẹ, ọ vẹ jẹ jọ gbegbe bọwo owọwọ.—Iruo-Izerẹ 15:25-27.

Aye nana o yo “eware nọ Jesu o bi ru,” oye o soriẹ nọ ọ be rọ gwọlọ iẹe na. Fiki oghẹrẹ ẹyao riẹ na u fo nọ ọ rẹ jọ udevie ahwo ho, rekọ ọ tẹ lẹlẹ ruọ udevie ogbotu na be daoma re o te Jesu oma, yọ ọ be ta kẹ omariẹ nọ: “Mẹ tẹ sae rọ obọ te ewu ehru riẹ ọvo dede, ẹyao mẹ o ti kpo.” Nọ ọ rọ obọ te ewu Jesu, ọ tẹ nwane seba ehwẹ. “Ẹyao nọ ọ be lahiẹ iẹe na o kpo no.”—Mak 5:27-29.

Kẹsena Jesu ọ tẹ ta nọ: “Ono ọ rọ obọ te omẹ?” Ẹvẹ who roro nọ o jọ aye na oma nọ o yo eme yena? Ẹme nọ Jesu ọ ta na o gbe Pita unu, fikiere ọ tẹ ta kẹ Jesu nọ: “Ogbotu na a wariẹ owhẹ họ je bi tunyẹ owhẹ.” Koyehọ Pita ọ be ta nọ, eme ọ be lẹliẹ Jesu ta nọ, “Ono ọ rọ obọ te omẹ?” Jesu o te ru ẹme na vẹ nọ: “Ohwo jọ ọ rọ obọ te omẹ, keme mẹ riẹ nọ ogaga u no omẹ oma.” (Luk 8:45, 46) Ẹhẹ, aye na nọ o siwi na o rehọ ogaga no Jesu oma.

Nọ aye na ọ ruẹ nọ Jesu ọ riẹ oware nọ o via, o te kigwẹ fihọ aro riẹ, avọ ozọ nọ u bi mu ei yọ o bi nuhu. Evaọ iraro ogbotu na, ọ tẹ ta uzẹme oware nọ o via, gbe nọ ẹyao riẹ o kpo no. Jesu ọ tẹ rọ unu uwowolẹ ta kẹe nọ: “Ọmọtẹ, ẹrọwọ ra o siwi owhẹ no. Nya kpo tou, jọ ẹyao na ọ gbẹ lahiẹ owhẹ ofa ha.”—Mak 5:34.

Avro ọ riẹ hẹ, Ọnọ Ọghẹnẹ ọ salọ nọ o ti su akpọ na ọ rrọ wowou avọ ohrọ, o te je wo ogaga nọ o re ro fiobọhọ kẹ ahwo nọ uye o be bẹ.