Si Kẹle Ọghẹnẹ
Ọ Riẹ Edada Mai
“ỌDAWẸ họ edada ra evaọ udu mẹ.” Enẹ omọvo Isẹri Jihova jọ nọ ọ kpako no nọ ọ jọ imishọnare vẹre o dhesẹ uruemu-aghae nana. Jihova Ọghẹnẹ họ ọnọ ọ mai wo ọdawẹ kparobọ. O rẹ dae nọ idibo riẹ e tẹ be ruẹ uye. Ẹvẹ oyena o sai ro mu omai ẹro? Oghẹrẹ nọ Jesu ọ rọ t’ẹme gbe oghẹrẹ uruemu nọ o dhesẹ evaọ okenọ ọ jọ otọakpọ o nabi dhesẹ oghẹrẹ ọdawẹ nọ Jihova o wo kẹ ahwo. (Jọn 5:19) Wọhọ oriruo, roro kpahe oware jọ nọ o via nọ a gbiku riẹ evaọ Jọn 11:33-35.
Okenọ uwhu idudhe u kpe Lazarọs ogbẹnyusu Jesu, Jesu o te kpobọ iwhre na. O jọ vevẹ inọ inievo-emetẹ Lazarọs, Meri avọ Mata a jọ uweri gaga. Jesu o you uviuwou nana gaga. (Jọn 11:5) Kọ eme Jesu o ti ru na? Ikuigbe na e ta nọ: “Nọ Jesu ọ rue [Meri] nọ ọ be viẹ, gbe ahwo Ju nọ a lele irie nyaze a be viẹ re, o te dimẹ eva ẹzi, ọ tẹ rọ ẹrova. Ọ tẹ ta nọ, ‘Bovẹ wha wọ riẹ fihọ?’ A tẹ ta kẹ e nọ, ‘Olori, nyaze whọ ruẹ.’ Jesu ọ tẹ viẹ.” (Jọn 11:33-35) Fikieme Jesu ọ rọ viẹ? Uzẹme inọ Lazarọs ogbẹnyusu oyoyou riẹ o whu, rekọ Jesu ọ bẹ te kpare iẹe. (Jọn 11:41-44) Kọ u gbe wo oware ofa jọ nọ u duobọte Jesu udu re?
Wariẹ rri ikere nọ e rrọ obehru na. Muẹrohọ inọ okenọ ọ ruẹ Meri gbe ahwo nọ a jọ kugbei nọ a jẹ viẹ, Jesu “o te dimẹ eva ẹzi” jẹ “rọ ẹrova.” Otofa ẹme Griki ọsosuọ nọ a rọ ta ẹme evaọ etenẹ na u dhesẹ oware nọ o da ohwo te enwa.a Oware nọ Jesu ọ ruẹ u duobọ tei udu. Ọdawẹ odidi nọ o wo kẹ ahwo na u dhesẹ oma via evaọ irui-oviẹ nọ i no rie aro ze. U re vevẹ inọ edada nọ i te amọfa e kẹ Jesu uye gaga. Kọ whọ viẹ no ẹdẹjọ fikinọ whọ ruẹ ohwo jọ nọ who you nọ ọ be viẹ?—Ahwo Rom 12:15.
Ọdawẹ Jesu o fi obọ họ kẹ omai riẹ uruemu-aghae gbe idhere Jihova, Ọsẹ riẹ. Kareghẹhọ inọ Jesu o dhesẹ iruemu-aghae Ọsẹ riẹ via gbagba te epanọ ọ rọ ta nọ: “Ọ nọ ọ ruẹ omẹ ọ ruẹ Ọsẹ na.” (Jọn 14:9) Fikiere nọ ma jọ Ebaibol se nọ “Jesu ọ tẹ viẹ,” u re mu omai ẹro inọ o rẹ da Jihova gaga nọ idibo riẹ a tẹ rrọ edada. Evaọ uzẹme, amọfa jọ nọ a kere Ebaibol a kẹ imuẹro onana. (Aizaya 63:9; Zekaraya 2:8) Ọdawẹ nọ Jihova Ọghẹnẹ o wo ọ rro kẹhẹ!
Ohwo nọ o wo ọdawẹ o re si amọfa urru. Nọ oma o tẹ lọhọ omai hayo nọ ma tẹ rrọ ọkora, ohwo nọ ọ rẹ sai vuhu edada mai mu je dhesẹ ororokẹ ma re si kẹle. Ẹvẹ oma o rẹ wọ omai si kẹle Jihova te, Ọghẹnẹ ohrọ nọ edada mai e rẹ yawo oma, ọnọ o wo otoriẹ oware nọ ma jẹ be viẹ!—Olezi 56:8.
[Oruvẹ-obotọ]
a Ẹsibuobu otofa ẹme Griki nọ a fa nọ “ọ tẹ viẹ” na u re dhesẹ “oviẹ nọ a rẹ viẹ fihọ eva,” rekọ ẹme nọ a ro dhesẹ oviẹ Meri gbe amọfa nọ a jọ kugbei na o rẹ sai dhesẹ “oviẹ enu-okuo, nọ a rẹ jọ bo.”