Kọ Whọ Sai Dhesẹ Orọwọ Ra Vevẹ Kẹ Amọfa?
KỌ O gb’owhẹ họ no ẹdẹjọ re whọ ta ẹme kẹ ahwo kpahe orọwọ ra? Roro kpahe oware nọ o via kẹ Susana, oniọvo-ọmọtẹ ikpe 16 evaọ obọ Paraguay. Evaọ ẹdẹjọ nọ a jọ eklase je wuhrẹ kpahe uruemu, a tẹ ta nọ Isẹri Jihova a rọwo “Ọvọ Anwae” na ha, a rọwo Jesu Kristi hayo Meri hi. A tẹ jẹ ta nnọ Isẹri Jihova a wọ egagọ họ uzou te epanọ a rẹ rọ gwọlọ whu ukpenọ a rẹ rehọ umu. O hae jọnọ whọ jọ etẹe, eme whọ hai ru?
Nọ Susana ọ lẹ se Jihova no, ọ tẹ kpare obọ. Kiọkọ omojọ re iticha na o kuhọ kugbe ai, Susana ọ tẹ ta kẹ iticha riẹ inọ o fi oke jọ họ kẹe nọ ọ rẹ rọ t’ẹme kpahe eware nọ ọ rọwo wọhọ omọvo Isẹri Jihova. Iticha na o te gine fi oke họ kẹe. Susana ọ tẹ rehọ eka ivẹ nọ i lele i rie ruẹrẹ oma kpahe ẹkwoma ibroshọ na Isẹri Jihova—Oghẹrẹ Ahwo Vẹ A Rrọ? Eme A Rọwo?
Ẹdẹ nọ ọ te rọ kẹ ovuẹ na u te ti te. Susana o te dhesẹ epanọ ma ro wo odẹ na Isẹri Jihova. Ọ tẹ jẹ ta kpahe ẹruore mai gbe oware nọ ma gbe ro se azẹ fihọ oma ha. Kẹsena ọ tẹ ta kẹ emọ eklase na inọ ọnọ o wo onọ ọ sae nọ. Ibuobu rai e tẹ kpare obọ. Eva e were iticha na gaga nọ ọ ruẹ oghẹrẹ nọ uzoge ọmọtẹ na ọ rọ rehọ Ebaibol kiyo enọ na.
Ọmọ-eklase na jọ ọ ta nọ, “Mẹ rueva Ọgwa Uvie jọ ẹdẹjọ, rekọ mẹ ruẹ uvumọ ẹmema ha.” Iticha na ọ tẹ gwọlọ riẹ oware nọ o jẹ rrọ ere. Susana o te se Olezi 115:4-8 gbe Ọnyano 20:4. Akpọ o gbe iticha na unu, ọ tẹ ta nọ, “Kọ fikieme emema e rọ vọ iwou ichọche mai kpakiyọ Ebaibol e ta inọ o thọ re a gọ emema?”
Ẹme nana nọ a be jọ nọ enọ jẹ kiyo na o rehọ iminiti 40. Nọ Susana ọ nọ emọ-eklase na sọ o te were ae re a rri ividio na No Blood—Medicine Meets the Challenge, aikpobi a te yo nnọ Ee. Fikiere iticha na ọ tẹ ta inọ okiokiọ riẹ a te rehọ oke nọ ọ hai ro wuhrẹ ai ro rri ividio na. Nọ a rri ividio na no, Susana o te dhesẹ idhere efa nọ Isẹri Jihova jọ a gwọlọ nọ a ro siwi ai ababọ azẹ-osefihọ oma. Kẹsena, iticha na ọ tẹ ta nọ: “Mẹ riẹ vẹre he inọ idhere buobu e riẹ nọ a re ro siwi ohwo ababọ azẹ; yọ mẹ riẹ irere nọ i re no usiwo ababọ azẹ-osefihọ oma ze anwẹdẹ hẹ. Kọ Isẹri Jihova ọvo eghẹrẹ usiwo enana e rrọ kẹ?” Nọ a ta kẹe nọ uvẹ usiwo itienana u rovie fihọ kẹ ahwo kpobi, iticha na ọ tẹ ta nọ, “Ẹdẹfa nọ Isẹri Jihova a tẹ ziọ uwou mẹ, me ti lele ae tẹme.”
Ẹme iminiti 20 nọ Susana ọ ruẹrẹ oma kpahe kẹ vẹre na, o rehọ euwa esa. Oka nọ u lele i rie, emọ-eklase na efa a tẹ jẹ kẹ ovuẹ kpahe iwuhrẹ ichọche rai. Nọ a ku ẹme rai họ no, a tẹ nọ ae enọ buobu, rekọ a sae za enọ na ha. Iticha na ọ tẹ nọ ae nọ, “Fikieme wha gbẹ sai ro dhesẹ eware nọ wha rọwo vevẹ hẹ wọhọ epanọ ibe ọmọ-eklase rai nọ ọ rrọ omọvo Isẹri Jihova o ru na?”
A tẹ kuyo nọ: “Isẹri Jihova a re wuhrẹ Ebaibol gaga. Rekọ ma re wuhrẹ hẹ.”
Iticha na ọ tẹ ta kẹ Susana nọ: “Wha bi gine wuhrẹ Ebaibol na jẹ daoma ru oware nọ o ta. Wha fo ejiro.”
Okenọ ẹme na ọ roma via, Susana ọ hẹ sai fibo. Rekọ ọ daoma kpọ iroro ethọthọ rai vi, ọ tẹ rọ enẹ raro kele emamọ oriruo ọmọtẹ Izrẹl nọ a fodẹ odẹ riẹ hẹ nọ ahwo Siria a mu kpo. Ọmọtẹ yena ọ jọ uwou oletu-ẹmo Siria nọ a re se Neaman, nọ o wo ẹyao oti. Ọmọtẹ Izrẹl na ọ ta kẹ oni-uwou riẹ nọ: ‘Ohẹ jọ nọ olori mẹ, ọ sae nya bru ọruẹaro nọ ọ rọ obọ Sameria na, o he siwi oti riẹ na.” Ọmọtẹ na ọ sae gba oma riẹ re ọ se isẹri ba ese kpahe Ọghẹnẹ uzẹme na ha. Onana o wha riẹ ze nọ olori riẹ Neaman o ro zihe ruọ odibo Jihova.—2 Iv. 5:3, 17.
Epọvo na re, Susana ọ faunu hu, rekọ o se isẹri kpahe Jihova gbe ahwo riẹ. Ẹme nọ Susana ọ ta okenọ a ta eme iyoma kpahe egagọ riẹ, u dhesẹ nọ o yoẹme kẹ ujaje Ebaibol na inọ: “Jọ eva ra rọ adhẹẹ kẹ Kristi rọ Ọnowo. Kẹse kẹse hẹ thọ-oma vẹra re whọ ta unu ra vevẹ kẹ kohwo kohwo nọ o se owhẹ re who gbe-iku ẹruore nọ ọrọ eva ra kẹe, otẹrọ ere dede, rọ udhedhẹ avọ [oma-urokpotọ] ruei.” (1 Pita 3:15) Kọ whọ ruẹrẹ oma kpahe no re whọ ta ẹme kpahe egagọ ra jẹ rọ unevaze ru ere okenọ uvẹ na u te rovie?
[Uwoho nọ e rrọ ẹwẹ-obe avọ 17]
Ekwakwa nana e rẹ sai fi obọ họ kẹ owhẹ dhesẹ orọwọ ra via