Ileta nọ I No Obọ Nicaragua Ze

“Whọ tẹ Dhẹ te Ethẹ Coco, Wẹriẹ Obọze”

“WHỌ rẹ dhẹ omoto ọgaga nọ ọ rẹ sai zue ọloho gbe egọdọ, wha ejake nọ a rẹ rọ kpare omoto n’otọ, gbe egalọno epẹtiro jọ lele oma. Ruẹrẹ oma kpahe inọ who bi ti zue ọloho nọ o re ruru etẹ omoto kpobi no. Whọ tẹ dhẹ te ethẹ Coco, wẹriẹ obọze.”

Uzẹme riẹ họ, eme yena nọ ibe imishọnare mẹ ọ ta kẹ omẹ na e kẹ omẹ uduotahawọ họ. Ghele na, evaọ ohiohiẹ Edivẹ-Oka jọ, mẹ tẹ ruọ edhere bi kpohọ okokohọ evaọ obọ Wamblán, ẹwho ọsese jọ nọ ọ rrọ ẹkpẹlobọ ovatha-ọre Nicaragua.

Irioke mẹ rọ ruọ edhere avọ omoto ọgaga mẹ nọ o kri-akpọ no, evaọ edhere ọprẹprẹrẹ nọ a re se Pan-American Highway. Nọ mẹ dhẹ te ẹwho ọ Jinotega, mẹ tẹ ruọ edhere ẹkpẹ nọ ahwo ẹwho na a re se feo, nọ otofa riẹ o rrọ whọhọ whọhọ. Mẹ jẹ dhẹ ẹwho na vrẹ, me muẹrohọ iwou-eki ivẹ jọ, a kere fihọ ọjọ nọ, Iruo Igbunu Ọghẹnẹ, ọdekọ kọ Ẹkparomatha Na.

Edhere na ọ jọ whaliẹ whaliẹ, avọ igbehru gbe ikiekpotọ. Ohwo owotọ dede o siawọ vi omẹ nọ me te eria nana. Mẹ dhẹ akotọ awa jọ vrẹ nọ igbehru nọ igrigri i ruru e rrọ tofẹ tofẹ riẹ. Evaọ udevie igrigri na, mẹ ruẹ ire avọ idodo iwoma nọ e wariẹ e rai họ.

Evaọ oria edhere na jọ nọ o gẹle gaga, mẹ avọ omoto ọfa nọ ọ be dhẹ oko edhere ze ma joma duruọ ohwohwo. Iwiri riẹ i ruru edhere na soso, yọ etẹ riẹ e be frẹ ibitho edhere na. Evaọ Nicaragua, whọ rẹ ruẹ odẹ-oheri edraeva egeva nọ a kere fihọ ighẹgbe imoto rai wọhọ: Ọgba, Ọwhọhro-Omuomu, Ogbo, hayo Ozuẹ.

Udevie uvo me ro te Otọ-Opraprara Pantasma. Mẹ dhẹ aro uwou-ire jọ nọ a hwere fihọ fuafo vrẹ. Mẹ jọ aro uwou na ruẹ ọkpọkuọzae nọ ọ keria akpala othethei, arakọ nọ o kiẹzẹ otọ ure gbe iruẹ ivẹ jọ nọ a gba fihọ akẹkẹ nọ o wo etẹ ure. Evaọ ẹwho ọsese jọ, mẹ ruẹ emọ nọ i bi zurie no isukulu kpo. Who te rri rai avọ iwu ekọlọ iburu rai nọ a bi su evaọ iyẹrẹ na, a wọhọ ẹkporo nọ o bi fi ziọ unueri.

Uvo na o jọ gaga nọ me te Wiwilí, ẹsiẹe mẹ rọ kparo ruẹ ethẹ Coco. Ethẹ na ọ joma rehọ ofẹ jọ ẹwho na kpobi avọ ame riẹ nọ o bi su ẹsikpobi. Mẹ tẹ kareghẹhọ oware nọ a vuẹ omẹ, jẹ wẹriẹ obọze ruọ edhere emaele 23 nọ o mu ozọ gaga nọ o kpohọ Wamblán.

Mẹ dhẹ igbehru gbe egọdọ vrẹ je zue ito gbe iko-ame nọ i te eree hayo izii vrẹ. Ovu ọ jẹ ra lele omẹ nọ mẹ bawọ sa egọdọ na re etẹ omoto mẹ e siọ ai ba ẹruọ. Ẹhẹ, “mẹ da ovu veva,” wọhọ epaọ odẹme ahwo ẹwho na. Me te ti te oka edhere na, jẹ kparo ruẹ ẹwho nọ me bi kpohọ na, Wamblán, nọ ọ rrọ ukiekpotọ avọ ire nọ e wariẹ e riẹ họ.

Oma ighọjọ ene gbe ubro evaọ okiokiọ riẹ, who re yo edo ahwo nọ a kpama no wọhọ ẹsenọ oke o ke no. Edo irifẹ nọ i bi bo e rrọwo omẹ no vẹre, mẹ tẹ jẹ nya iyẹrẹ na no oka duoka. Ore awere ebrẹdi nọ a bi there o da oria kpobi fia.

Whọ rẹ jọ eria buobu ruẹ iwoho aparadase nọ ọwena jọ evaọ ẹwho na ọ drọ nọ a fihọ igbẹhẹ. A ta eware mu iwou-eki nọ a bi ro whowho oghẹrẹ idi elọlọhọ sa-sa nọ a be zẹ. Ebe nọ a je ro whowho egọmeti esa nọ i su vrẹ no gbe eware nọ a yaa nọ a ti ru e gbẹ rrọ eria avọ eria. Whọ rẹ ruẹ imiwou ame-okuo nọ a rọ idhe tehe, nọ a rehọ isimeti ru otọ rai.

Nọ mẹ tẹ nyaku ahwo, mẹ ọ jẹ kake rọ ẹvẹrẹ Nicaragua yere ai inọ Adiós. Ahwo na a ve bi kpohwẹ ku agba je lele omẹ ta ẹme sasasa. Ma jẹ ta ẹme do gaga omojọ fiki edo awọ enyenya avọ ekẹtẹkẹtẹ nọ e be dhẹ iyẹrẹ na.

Eva owọwọ Edisoi-Oka, iviuwou sa-sa a te muhọ ẹnyaze kẹ okokohọ edẹ ivẹ na. Ejọ e nya otọ, ejọ e dhẹ anyenya, efa kọ imoto. Emaha jọ a nya owotọ euwa ezeza soso avọ eviẹ irọba nọ a kuhọ. A fa ithẹ sa-sa vrẹ dede nọ ebọmbo nọ a tọ họ otọ gbe ezozo e jọ eria itienana. Ahwo jọ nọ a no ugbothabọ ze a wha umutho emu ọvo lele oma—isikapa nọ a rehọ iwhri-esi there. Eme ọ lẹliẹ e rai kpobi nyaze?

A nyaze te bọ ẹruore rai ọrọ emamọ obaro-akpọ ga. A nyaze te gaviezọ kẹ uwuhrẹ Ebaibol. A nyaze te gọ Ọghẹnẹ.

Ẹdẹ-Ọmaha o te ti te. Ahwo nọ a bu vi egba-esa (300) a keria ekpala ithethei gbe egbara irọba eva otọ ọgwa nọ a rọ idhe tehe ehru riẹ. Iniemọ a be kẹ emọ rai evie. Ma je yo edo isi gbe irifẹ nọ e jọ oria nọ a be jọ thuru erao nọ o kẹle etẹe.

Uvo na o tẹ te ga te epanọ ẹroro na ọ rọ ga thesiwa. Ghele na, ogbotu na ọ jẹ gaviezọ ziezi kẹ ehrẹ gbe ithubro nọ a je yo. A je rovie lele ọkovuẹ na nọ o je se oria Ebaibol kpobi, a so ile nọ a rehọ uzoẹme rai no Ebaibol ze, jẹ gaviezọ ziezi kẹ elẹ nọ a lẹ evaọ okokohọ na.

Nọ okokohọ na o kuhọ no, mẹ avọ amọfa jọ ma te kuomagbe emaha na jẹ zaha arozaha usiagbo. Kẹsena ma tẹ jẹ kiẹ eware nọ emaha na i kere fihotọ evaọ etoke okokohọ na riwi. Me dhesẹ iwoho isi gbe eko-isi nọ me fihọ ekọmputa mẹ kẹ ai. Eva e were emọ na gbe esẹgbini rai gaga.

O da omai kẹhẹ inọ okokohọ na ọ nwani kuhọ no, ahwo kpobi a te mu owọ ukpo họ ẹwọ. Okiokiọ riẹ mẹ tẹ ruọ edhere, avọ eva nọ e be were omẹ fiki egbẹnyusu iyoyou ekpokpọ nọ me wo gbe eware nọ mẹ rẹro ruẹ. Mẹ gba riẹ mu inọ mẹ rẹ raro kele ai wuhrẹ epanọ utho nọ me wo o rẹ rọ da omẹ ẹro jẹ rẹro so Ọghẹnẹ.

[Iwoho nọ e rrọ ẹwẹ-obe avọ 29]

Iviuwou sa-sa a no ugbo emaele buobu ziọ okokohọ evaọ Wamblán