Enọ Ahwo nọ A s’Ebe

Evaọ ileta riẹ se ahwo Hibru, Pọl ukọ na ọ t’ẹme kpahe “abọrọ kpahe uzou.” Kọ eromuo ekpako ọ jẹ ta kpahe na manikọ oware ofa jọ?—Hib. 6:2.

Ma rẹ sae nwane r’obọ s’udu kuyo onọ nana ha, rekọ o wọhọ nnọ Pọl ọ jẹ ta kpahe obọ nọ a rẹ rọ kpahe ahwo uzou re a ruẹsi wo okẹ ẹzi na.

Re a ruẹse rehọ ohwo mu kẹ iruo Ọghẹnẹ, Ebaibol e ta kpahe obọ nọ a rẹ rọ kpahe ohwo na uzou. Mosis ọ “rehọ abọ riẹ kpahe” Joshua okenọ ọ jẹ rehọ iẹe mu re ọ rehọ ẹta riẹ. (Izie. 34:9) Evaọ ukoko Ileleikristi na, a rehọ ezae jọ nọ i te mu ẹkwoma abọ nọ a rọ kpahe ae uzou. (Iruẹru 6:6; 1 Tim. 4:14) Pọl ọ kẹ ohrẹ inọ a rehọ ọwhọwhọ rọ abọ kpahe ohwo uzou hu.—1 Tim. 5:22.

Rekọ Pọl ọ ta udu họ Ileleikristi obọ Hibru na awọ inọ a ‘daoma te ekpako’ enẹna nọ a nya siọ ‘uwuhrẹ oboba’ ba no na. Ọ tẹ fodẹ eware wọhọ ekurẹriẹ no iruo “iwhuowhu gbe orọwọ kpahọ Ọghẹnẹ, gbe oghrẹ kpahọ ame-ọhọ, avọ abọrọ kpahe uzou.” (Hib. 6:1, 2) Kọ ohwo nọ a re ro mu ọkpako yọ oware oboba nọ Ileleikristi a rẹ daoma nya seba? Ijo. Re ohwo ọ jọ ọkpako ukoko yọ utee nọ inievo nọ i te ziezi a re le, a vẹ jẹ rehọ ọkwa-iruo na ghaghae nọ a te woi no.—1 Tim. 3:1.

Rekọ a rehọ obọ nọ a rẹ rọ kpahe ohwo uzou na ta ẹme evaọ edhere ọfa. Evaọ ikpe-udhusoi ọsosuọ, Jihova ọ siọ orẹwho Izrẹl ọ tẹ salọ Izrẹl abọ-ẹzi re a jọ ahwo riẹ, koyehọ ukoko Ileleikristi nọ a wholo na. (Mat. 21:43; Iruẹru 15:14; Gal. 6:16) Ekẹ igbunu erọ ẹzi na, wọhọ okẹ evẹravẹrẹ, o jọ imuẹro enwene yena. (1 Kọr. 12:4-11) Okenọ Kọniliọs avọ uviuwou riẹ a kurẹriẹ, a kẹ rai okẹ ẹzi ọfuafo na, yọ ‘ẹrọo-unu’ nọ a jẹ ta o kẹ imuẹro onana.—Iruẹru 10:44-46.

Ẹsejọ obọ nọ a rọ kpahe ohwo uzou o rẹ lẹliẹ ohwo wo ekẹ igbunu. Okenọ Filip ọ ta usiuwoma na evaọ Sameria, ahwo buobu a họ-ame. Ugboma esuo na o te vi ikọ na Pita avọ Jọn nya. Fikieme? Ikere na e ta nọ: “Kẹsena nọ [ikọ ivẹ nana] a te rọ abọ rai kpahọ [ahwo nana nọ a họ-ame obọ na] uzou no, a te wo Ẹzi Ẹri na.” Onana u dhesẹ inọ a wo okẹ ẹzi na, onọ a je ro ru eware nọ amọfa a jẹ ruẹ. Ma riẹ onana keme Saimọn, ọnọ o je kporo ẹbo vẹre, ọ ruẹ iruo igbunu nọ ikọ na a jẹ rehọ okẹ ẹzi na ru, ọ tẹ gwọlọ inọ ọ rẹ rehọ ugho dẹ ogaga nọ ọ rẹ rọ rehọ obọ kpahe amọfa uzou re a wo ẹzi ọfuafo na onọ a re ro ru eware igbunu re. (Iruẹru 8:5-20) Uwhremu na, a tẹ họ ahwo 12 ame evaọ Ẹfẹsọs. Ikere na e ta nọ: “Nọ Pọl ọ rehọ abọ riẹ kpahe ae uzou no, Ẹzi Ẹri ọ tẹ ruọ ae oma; a tẹ jẹ rehọ [ẹrọo] jẹ evẹravẹrẹ a tẹ jẹ ruẹaro.”—Iruẹru 19:1-7; wawo 2 Timoti 1:6.

Fikiere, eva Ahwo Hibru 6:2, o wọhọ nnọ Pọl ọ jẹ t’ẹme kpahe abọ nọ a rẹ rọ kpahe ilele ekpokpọ uzou re a ruẹsi wo okẹ ẹzi na.