Si Kẹle Ọghẹnẹ
Obruoziẹ nọ O re Ru Oware nọ O Gba Ẹsikpobi
UVI-OZIẸ. Ababọ-okienyẹ. Ababọ-ọriẹwẹ. Kọ iruemu-aghae nana e gbẹ be hai si owhẹ urru? Wọhọ ẹkoma ohwo-akpọ, o rẹ were omai re amọfa a rọ ababọ-ọriẹwẹ lele omai yeri. U yoma kẹhẹ, akpọ inẹnẹ ọ kare uvi-oziẹ. Dede na, obruoziẹ jọ ọ riẹ nọ ma rẹ sai fi eva họ—Jihova Ọghẹnẹ. O re ru oware nọ o gba ẹsikpobi. Onana u dhesẹ oma via evaọ eme nọ Abraham o lele Jihova ta wọhọ epanọ o rrọ Emuhọ 18:22-32.a
Nọ Jihova ọ ta kẹ odibo riẹ Abraham inọ ọ be te kiẹ Sọdọm avọ Gomora rri, Abraham ọ tẹ jẹ ruawa epanọ ahwo nọ i kiẹrẹe evaọ ewho ivẹ na, kugbe Lọt ọmọ oniọvo riẹ a te rọ zọ. Abraham ọ tẹ nọ Jihova nọ: “[Whọ] rẹ te ghinẹ raha ikiẹrẹe na kugbe iru-umuomu? O tẹrọnọ udhahwo uvẹ gbe ikpe e rọ okpẹwho na nọ i kiẹrẹe; kọ whọ gbẹ se ẹwho na ba fiki udhahwo uvẹ gbe ikpe na?” (Owọ avọ 23, 24) Ọghẹnẹ ọ ta kẹe nọ ọ te se ewho na ba otẹrọnọ a jarai ruẹ udhahwo uvẹ gbe ikpe nọ i kiẹrẹe. Abraham ọ yare Jihova isiasoi efa, yọ unuẹse nana kpobi nọ ọ yare na o je si unu ahwo na kpotọ bẹsenọ u ro te imakpe. Evaọ unuẹse nọ ọ yare na kpobi, Ọghẹnẹ ọ rọwo kẹe inọ ọ te raha ikpẹwho na ha nọ ọ te jarai ruẹ unu ahwo nọ Abraham ọ be fodẹ na.
Kọ ma sae ta nọ Abraham o je lele Ọghẹnẹ vro avro? Vievie! O hae jọ ere kiyọ ọdẹjẹ. Eme nọ i je no Abraham unu ze i dhesẹ omaurokpotọ gbe ọwhewhe nọ o wo kẹ Ọghẹnẹ. Abraham ọ ta nọ ọyomariẹ yọ “ovu gbe enwo” gheghe. Isiava ọ ta kẹ Ọghẹnẹ nọ “ivie” avọ adhẹẹ. (Owọ avọ 27, 30-32) Ofariẹ, eme Abraham na i dhesẹ evaifihọ nọ o wo kpahe Jihova inọ o wo okienyẹ hẹ. Kpahe iroro na inọ Ọghẹnẹ ọ rẹ raha ikiẹrẹe kugbe irumuemu, Abraham ọ ta nọ “o thowhẹwa!” Ọzae nana nọ ọ vọ avọ ẹrọwọ na ọ ta imuẹro nọ o wo via inọ “obruoziẹ akpọ na” o re “ru kiẹrẹe.”—Owọ avọ 25.
Kọ eme nọ Abraham ọ ta na e gba? Ma rẹ sai yo nọ Ee, gbe ijo. O rri thọ nọ o je ro roro inọ ahwo nọ a kiẹrẹe evaọ Sọdọm avọ Gomora a te imakpe. Rekọ ọ ta gba nọ ọ ta inọ Ọghẹnẹ ọ rẹ “raha ikiẹrẹe na kugbe iru-umuomu” vievie he. Nọ Ọghẹnẹ ọ ginẹ raha ewho ivẹ na, ukọ-odhiwu o fi obọ họ kẹ ọzae okiẹrẹe na Lọt avọ emetẹ ivẹ riẹ dhẹ nọ oware ovuọvo u gbe ro ru ai hi.—2 Pita 2:7-9.
Eme oware nana nọ o via na u wuhrẹ omai kpahe Jihova? Nọ Jihova ọvo ọ vuẹ Abraham inọ ọ gwọlọ kiẹ ewho na riwi na, koyehọ ọ gwọlọ nọ Abraham ọ ta eriwo riẹ kpahe ẹme na. Kẹsena ọ tẹ jẹ gaviezọ kẹ Abraham ogbẹnyusu riẹ avọ odiri nọ ọ jẹ ta eriwo riẹ via. (Aizaya 41:8) Onana u wuhrẹ omai inọ Jihova yọ Ọghẹnẹ nọ ọ vọ avọ omaurokpotọ, ọnọ o re bru ọghọ họ idibo riẹ nọ e rrọ otọakpọ oma! Ẹme na o re vevẹ, ma wo ẹjiroro kpobi nọ ma re ro fi eva họ Jihova riẹriẹriẹ, Obruoziẹ nọ o re ru oware nọ o gba ẹsikpobi na.
[Oruvẹ-obotọ]
a Evaọ ẹme nọ o lele Abraham ta na, ukọ-odhiwu ọye Jihova ọ rọ tẹme. Rọkẹ oriruo ọfa, rri Emuhọ 16:7-11, 13.
[Uwoho nọ o rrọ ẹwẹ-obe avọ 20]
Abraham ọ lẹ Jihova kpahe Sodọm avọ Gomora