Enọ I Bi Se Ebe Mai A Nọ Inọ . . .

Kọ oghẹrẹ uvẹ ovona ahwo kpobi a wo nọ a rẹ rọ riẹ Ọghẹnẹ?

▪ Nọ a nọe kpahe uzi nọ o mae rro, Jesu ọ kuyo nọ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra.” (Matiu 22:37) Dede na, taure ahwo a sai you Ọghẹnẹ, o gwọlọ nọ a re wo eriariẹ egbagba kpahe iẹe. (Jọn 17:3) Kọ oghẹrẹ uvẹ ovona ahwo kpobi a wo nọ a re ro wo eriariẹ nana?

Ebaibol na họ ugogo obe nọ ma sai jo wo eriariẹ kpahe Ọghẹnẹ. (2 Timoti 3:16) Ahwo buobu a be rria eria nọ a sai jo wo Ebaibol lọlọhọ. Yọ ẹsejọhọ a zizie ahwo otiọye na unuẹse buobu no re a wo eriariẹ egbagba Ọghẹnẹ ẹkwoma uwuhrẹ Ebaibol. (Matiu 28:19) U wo ahwo jọ nọ i wo esẹgbini Ileleikristi, enọ i bi ru uvẹ họ kẹ ae kẹdẹ kẹdẹ nọ a sai ro wuhrẹ kpahe Ọghẹnẹ.—Iziewariẹ 6:6, 7; Ahwo Ẹfẹsọs 6:4.

Dede na, o lọhọ kẹ amọfa jọ ere he. A yọrọ otujọ evaọ iviuwou nọ esẹgbini a re jo dhuaro ku emọ rai. (2 Timoti 3:1-5) O sae jọ bẹbẹ kẹ ahwo nọ a yọrọ evaọ iviuwou itieye re a rri Ọghẹnẹ wọhọ Ọsẹ oyoyou nọ ọ rrọ obọ odhiwu. Ahwo jọ a kpohọ isukulu tere he, fikiere o rrọ bẹbẹ kẹ ae re a se Ebaibol na. U te no ere no, iwuhrẹ egagọ erue i wuhu iroro ahwo jọ di no, yọ otujọ ọ be rria iviuwou, ewho hayo erẹwho nọ a jọ kuvẹ kẹ ewhowho uzẹme Ebaibol na ha. (2 Ahwo Kọrint 4:4) Kọ uyero ahwo otiọye na u dhesẹ nọ a gbe wo uvẹ nọ a re ro wuhrẹ kpahe Ọghẹnẹ je wo uyoyou kẹe he?

Jesu ọ ta nọ uyero ahwo jọ u ti ru ei bẹbẹ kẹ ae re a you Ọghẹnẹ je yoẹme kẹe. (Matiu 19:23, 24) Dede na, ọ kareghẹhọ ilele riẹ inọ o tẹ make rọnọ ezadhe jọ e rẹ sae wọhọ eware nọ a sai fi kparobọ họ evaọ eriwo ohwo-akpọ, “eware kpobi e rẹ lọlọhọ eva obọ Ọghẹnẹ.”—Matiu 19:25, 26.

Roro kpahe onana: Jihova Ọghẹnẹ o ru rie lọhọ no re Ẹme riẹ Ebaibol na o jọ obe nọ a mae vaha kpaobọ no evaọ akpọ na soso. Ebaibol na e ta nọ a rẹ te jọ “akpọ na kpobi” whowho emamọ usi kpahe Ọghẹnẹ gbe ẹjiroro riẹ rọkẹ otọakpọ na. (Matiu 24:14) Nẹnẹ, Isẹri Jihova a be jọ ekwotọ nọ i bu vi egba ivẹ gbe ikpe esa (230) whowho emamọ usi yena je bi kere ebe nọ e ta kpahe Ebaibol na evaọ evẹrẹ nọ i bu te egba isoi (500). Makọ ahwo nọ a wo Ebaibol dede he, a sai wuhrẹ eware buobu kpahe Ọghẹnẹ ẹkwoma eroro kpahe eware nọ ọ ma.—Ahwo Rom 1:20.

Ofariẹ, Ẹme Ọghẹnẹ ọ ta nọ: “ỌNOWO ọ rẹ kiẹ otọ eva ahwo kpobi, ọ vẹ riẹ oma gbe iroro ahwo. Otẹrọnọ whọ gwọle riẹ, whọ rẹ te rue riẹ.” (1 Iruẹru-Ivie 28:9) Fikiere, dede nọ Jihova ọ nwane ya eyaa inọ ahwo kpobi a ti wo oghẹrẹ uvẹ ovona ha, o bi ru ei lọhọ re ahwo evezi kpobi a wo uvẹ nọ a rẹ rọ riẹe. Ọ te tubẹ ruẹ nọ ahwo nọ a sai wo uvẹ wuhrẹ kpahe iẹe vievie he a wo uvẹ yena ẹkwoma uzuazọ nọ ọ te kpare ae ze evaọ akpọ ọkpokpọ nọ ẹrẹreokie ọ te jọ.—Iruẹru Ikọ Na 24:15.