Kọ Whọ Kareghẹhọ?

Kọ whọ reawere ese Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

• Eme ọ rẹ sai fi obọ họ kẹ owhẹ yọrọ emọ re a sae jọ uvi ahwo?

Fi “oriruo” ọrọ uvi uruemu hotọ kẹ emọ ra. (Jọn 13:15) Who rẹro mi ọmọ vrẹta ha; nọ ọ be kpako na, whọ rẹ sai ru ei riẹ inọ o wo owha-iruo nọ ọ rẹ rọ rẹrote oma riẹ fuafo, jọ ohwo nọ o re koko oke, jẹ rẹrote iruo obọ isukulu riẹ. Kẹ ugogo ekpọvio nọ i re fi obọ họ kẹ ọmọ ra rẹrote owha-iruo riẹ.—7/1, ẹwẹ-obe avọ 19-20.

• Fikieme Ọghẹnẹ ọ gbẹ rọ kẹ Erọn uye he okenọ o ru ọmọ-eruẹ oro?

Erọn ọ ginẹ thọ uzi nọ Ọghẹnẹ o jie kpahe ẹdhọgọ. (Ọny. 20:3-5) Rekọ Mosis ọ lẹ Ọghẹnẹ inọ ọ rọ vrẹ Erọn, yọ olẹ riẹ u “ru iruo ilogbo.” (Jem. 5:16) Erọn o yeri uzuazọ ẹgbakiete no ugbo anwẹdẹ ze. Ofariẹ, dede nọ ahwo a tu rie họ ru ọmọ-eruẹ na, uwhremu na o dhesẹ via inọ oware nọ o ru na u gine noi eva ze he keme o kuomagbe emọ Livai dikihẹ abọ Jihova whawha. (Ọny. 32:25-29)—5/15, ẹwẹ-obe avọ 21.

• Eme ọ rẹ sai fi obọ họ kẹ ohwo thihakọ nọ ọrivẹ-orọo riẹ o te bi yeri uzuazọ agbava?

Otẹrọnọ ọnọ ọ riẹ onahona ha na ọ be daoma rria lele ehri-izi Ebaibol, u du fo ho re ọ fuọ omariẹ rọkẹ ẹnwae-obro ọrivẹ-orọo riẹ. Ọghẹnẹ ọ riẹ nọ whọ gwọlọ uduotahawọ gbe omosasọ. Ọ rẹ sae rọ ẹkwoma ibe Ileleikristi kẹ owhẹ omosasọ.—6/15, ẹwẹ-obe avọ 30-31.

• Fikieme ma jẹ whaha ekielele eriwo ogbotu?

Orọnikọ eriwo Jihova kpahe oware nọ u kiehọ gbe onọ o thọ oye eriwo ogbotu o rẹ rọ karo ho. Wọhọ Ileleikristi, ma rẹ raro kele Osu mai Jesu Kristi, ọnọ ọ rọ adhẹẹ kẹ eriwo Ọsẹ obọ odhiwu riẹ, “ọ daozọ omovuọ họ” nọ a kare iẹe fihọ ure oja. (Hib. 12:2)—8/15, ẹwẹ-obe avọ 3.

• Ẹvẹ whọ sae rọ bọ isiuru isase họ udu emọ ra?

Uyoyou gbe oriruo ọsẹgboni u re fi obọ họ kẹ emọ wo isiuru kẹ isase. Ofariẹ, u fo nọ a rẹ kẹ ae ebe nọ a gbẹ rrọ emaha na. Hai se dovia kẹ ae ẹsikpobi. Ta udu họ ae awọ re a kuomagbe owhẹ evaọ isase na re wha jẹ ta kpahe oware nọ wha se na. Ta kẹ emọ inọ a se kẹ owhẹ, jẹ ta udu họ ae awọ inọ a nọ enọ.—7/15, ẹwẹ-obe avọ 26.

• Fikieme Jesu ọ rọ ta kẹ aye jọ nọ a jọ ẹwho soso riẹ wọhọ ọrahauzi inọ a rehọ izieraha riẹ vrẹe no?

Nọ imava-orọo ọsosuọ na a wọso no, eruẹaruẹ ọsosuọ evaọ Ebaibol na e ta kpahe ẹjiroro Jihova nọ ọ te rọ rehọ ‘ubi’ jọ hayo Mesaya ze. (Emu. 3:15) Nọ orọnọ oware ovo o rẹ sae whaha Jihova erugba ẹjiroro riẹ hẹ na, nọ ọ nwane ta ẹme nọ a kere fihọ Emuhọ 3:15 na no, o tẹ wọhọ ẹsenọ a hwa osa ẹtanigbo na no evaọ aro riẹ. Dede nọ a ri dhe idhe na evaọ oke yena ha, u muẹro inọ o te seba ẹvia ha, onana o tẹ whae ze nọ o sae rọ lọhọ re a rọ izieraha ahwo nọ i kurẹriẹ, wọhọ aye yena, rọ vrẹ ae.—8/15, ẹwẹ-obe avọ 6.