“U bi Fi Obọ họ kẹ Omẹ Nyate Udu Ahwo”
OKEJỌ nọ u kpemu, ahwo a ziọ ẹgwae akpọ-soso jọ evaọ okpẹwho nọ a re se Porto Alegre, nọ o rrọ ofẹ obọze ovatha-ọre Brazil. Ahwo buobu a no erẹwho udhozeza gbe ikpegbisoi (135) ziọ ẹgwae na. Utu Isẹri jọ evaọ ukoko jọ nọ o rrọ Porto Alegre a nya bru erara na buobu evaọ etoke eriosehọ rai re a ruẹsi whowho ovuẹ Uvie na no Ebaibol ze kẹ ae. Ẹvẹ inievo na a jẹ sai ro lele erara na ta ẹme?
Ọkobaro jọ nọ a re se Elizabete ọ ta nọ, “Omobe Emamọ Usi kẹ Ahwo Erẹwho Kpobi na ma ro ru iruo.” Ọ ta re inọ: “Erara na buobu a ri ti yo emamọ usi Uvie na ẹdọvo ho, rekọ a gaviezọ kẹ ovuẹ mai ziezi. Ma ta ẹme kugbe ahwo nọ a no Bolivia, China, France, India, Izrẹl, gbe Nigeria ze. Ma wo ebe nọ a kere no Ebaibol ze evaọ evẹrẹ otujọ, yọ a mi omai enana avọ evawere.”
Evaọ obọ Mexico, ọkobaro jọ nọ a re se Raúl ọ rehọ omobe nana ru iruo avọ emamọ iyẹrẹ nọ i no rie ze. Okejọ nọ u kpemu, ọ nyaku ọzae jọ nọ ọ kpako te ikpe udhone no, ohwo Arab nọ aye riẹ o whu obọ. Nọ ọzae na o se ovuẹ Uvie na evaọ ẹwẹ-obe nọ a rọ ẹvẹrẹ Arab kere no, eva e were riẹ te epanọ ame o ro su noi aro ze. Fikieme? Eyaa Ọghẹnẹ nọ e rrọ obe Eviavia 21:3, 4 inọ uwhu o gbẹ te jọ họ u duobọtei udu nọ o sei evaọ ẹvẹrẹ riẹ. Evaọ oke ofa jọ nọ Raúl ọ jẹ ta usiuwoma oke-gheghe, ọ ta ẹme kugbe ọzae jọ nọ ọ rrọ ohwo Portugal. Ọmọ o whu ku ọzae na re. Raúl ọ tẹ rehọ omobe na kẹe re o se oria ẹwẹ-obe nọ a rọ ẹvẹrẹ ahwo Portugal kere. Nọ o sei no, ọzae na ọ tẹ ta inọ ọ gwọlọ gbe wuhrẹ kpahe Ebaibol na, kẹsena ọ tẹ jẹ uwuhrẹ Ebaibol rehọ.
Raúl ọ rehọ omobe Emamọ Usi kẹ Ahwo Erẹwho Kpobi na ta usiuwoma kẹ ahwo nọ a rẹ jẹ ẹvẹrẹ ahwo Armenia no, China, Oyibo, France, Germany, Korea, Mexico, Pasia, Russia, ẹvẹrẹ ahwo ofẹ ẹkpẹlobọ ovatha-ọre India nọ a re se Hindi, gbe ẹvẹrẹ ahwo America jọ nọ a re se Zapotec. Raúl ọ ta nọ: “Mẹ ruẹ epanọ u wuzou te no re mẹ rọ omobe nana ru iruo evaọ odibọgba mẹ. U bi fi obọ họ kẹ omẹ nyate udu ahwo o tẹ make rọnọ mẹ riẹ ẹvẹrẹ rai ẹta ha.”
Nọ ahwo buobu a bi no erẹwho rai kpohọ ukane evaọ erẹwho efa na, ma rẹ sae nyaku ahwo nọ a be jẹ ẹvẹrẹ ọfa nọ ma riẹ ẹta ha. Ma rẹ sae rọ ẹkwoma omobe na Emamọ Usi kẹ Ahwo Erẹwho Kpobi ta usiuwoma Uvie na kẹ ae. Kọ whọ be hae wha omobe na lele oma?
[Iwoho nọ e rrọ ẹwẹ-obe avọ 32]
Raúl avọ omobe nọ u bi fi obọ họ kẹe nyate ahwo udu