Emamọ Usi Kẹ Ahwo Erẹwho Kpobi

“Wha ti . . . se isẹri mẹ . . . rite ọnyaba akpọ na.”—IRUẸRU 1:8.

1. Wọhọ enọ i bi wuhrẹ amọfa Ebaibol na, eme ma re muẹrohọ, kọ fikieme?

AHWO nọ a rrọ emamọ iwuhrẹ orọnikọ a re muẹrohọ eme nọ a rẹ ta kẹ emọ-uwuhrẹ rai ọvo ho rekọ a re je muẹrohọ oghẹrẹ nọ a rẹ rọ ta eme na. Wọhọ enọ i bi wuhrẹ amọfa uzẹme Ebaibol na, ma re ru epọvo na re. Ma re muẹrohọ ovuẹ nọ ma bi whowho gbe oghẹrẹ ona nọ ma bi ro whowho iei. Ovuẹ mai, emamọ usi Uvie Ọghẹnẹ, u re nwene he, rekọ ma re nwene ona mai kiehọ uyero sa-sa. Fikieme? Re ma sae nyate ibuobu oma.

2. Ma te bi nwene ona usiuwoma ota mai kiehọ uyero sa-sa, yọ ono ma be raro kele na?

² Ma te bi nwene ona usiuwoma ota mai ro kiehọ uyero sa-sa yọ ma be raro kele idibo Ọghẹnẹ erọ oke nọ u kpemu. Wọhọ oriruo, roro kpahe Pọl ukọ na. Ọ ta nọ: “Me ru oma mẹ wọhọ ohwo Ju [rọkẹ] ahwo Ju . . . Me ru oma mẹ wọhọ ọ nọ ọ rọ otọ uzi hi rọ kẹ e nọ e rọ otọ uzi hi . . . Rọ kẹ otu eyẹlẹ me zihe ruọ ọyẹlẹ re mẹ ruẹse si eyẹlẹ rehọ. Me zihe ruọ oghẹrẹ eware kẹ ahwo kpobi, re mẹ ruẹse siwi ahwo jọ.” (1 Ahwo Kọrint 9:19-23) Enwene nọ Pọl o je nwene ona riẹ o wha emamọ iyẹrẹ ze. Ma ti wo emamọ iyẹrẹ re otẹrọnọ ma re nwene ona usiuwoma ota mai re u kiehọ ahwo nọ ma be ta ẹme kẹ na.

Rite “Ọnyaba Akpọ Kpobi”

3. (a) Didi use-abọ ma rẹriẹ ovao ku evaọ iruo usiuwoma ota mai? (b) Ẹvẹ eme ọ Aizaya 45:22 i bi ro rugba nẹnẹ?

³ Use-abọ ulogbo jọ nọ enọ i bi whowho emamọ usi na a rẹriẹ ovao ku họ epanọ ẹkwotọ na ọ rro te—“akpọ na kpobi.” (Matiu 24:14) Evaọ ikpe-udhusoi nọ e vrẹ na, idibo Jihova buobu a ruiruo gaga re a nyate ekwotọ ekpokpọ re a ruẹsi whowho emamọ usi na. Eme o no rie ze? Ẹvi nọ ọ rrọ iruo na wariẹ akpọ-soso họ nọ u gbunu gaga. Evaọ emuhọ ikpe ọ 1900, umutho ekwotọ jọ ọvo a jẹ jọ ta usiuwoma na, rekọ evaọ inẹnẹ Isẹri Jihova a bi ruiruo evaọ ekwotọ 235! Evaọ uzẹme, a bi whowho emamọ usi Uvie na tubọ rite “ọnyaba akpọ kpobi!”—Aizaya 45:22.

4, 5. (a) Amono a fi obọ họ gaga no evaọ ewhowho emamọ usi na? (b) Didi eme iwou egha jọ e ta kpahe enọ i no erẹwho efa ze te ta usiuwoma evaọ ẹkwotọ uwou ogha na?

⁴ Eme ọ be wha ẹnyaharo otiọye na ze? Eware buobu. Imishọnare nọ a wuhrẹ evaọ Isukulu Ebaibol ọ Giliad ọrọ Watchtower gbe, kẹle na, inievo nọ i bu vi 20,000 nọ i nwrotọ no Isukulu Ewuhrẹ Odibọgba na ze a fi obọ họ gaga no. Yọ Isẹri buobu nọ e rehọ unevaze gbe araha obọrai kwa kpohọ ekwotọ nọ ẹgwọlọ kẹ iwhowho-uvie ọ mae jọ rro a fi obọ họ no re. Ileleikristi itieye nọ i wo ẹzi omolahiẹ kẹ amọfa na—te ezae te eyae, emaha te ekpako, enọ e rọo gbe enọ e rọo ho—a bi wo obọ gaga evaọ ewhowho ovuẹ Uvie na evaọ otọakpọ na soso. (Olezi 110:3; Ahwo Rom 10:18) A ghare omai ẹro gaga. Muẹrohọ oware nọ iwou egha jọ a kere kpahe ahwo nọ i no erẹwho efa ze nọ i bi ru iruo usiuwoma ota evaọ oria nọ ẹgwọlọ ọ mae jọ rro evaọ ẹkwotọ uwou ogha na.

⁵ “Isẹri eghaghae nana a be kobaro evaọ usiuwoma ota evaọ eria nọ i si oma no, fi obọ họ rehọ ikoko ekpokpọ mu, bi je fiba ẹnyaharo abọ-ẹzi ọrọ inievo nọ e rrọ eria nọ a kwa kpohọ na.” (Ecuador) “Otẹrọnọ inievo buobu nana nọ e rrọ erara nọ e rrọ ẹkwotọ mai na a te kpo, u ti kpomahọ ikoko na. O rrọ oghale kẹ omai nọ a rọ rrọ kugbe omai.” (Dominican Republic) “Evaọ ikoko mai buobu, inievo-emetẹ e mai bu, ẹsejọ 70 evaọ udhusoi kpobi. (Olezi 68:11) Ibuobu rai a ri kri evaọ ukoko na ha, rekọ inievo-emetẹ nọ e rrọ ekobaro nọ e re rọo ho nọ i no ekwotọ efa ze a bi fi obọ họ wuhrẹ inievo ekpokpọ itieye na. Inievo-emetẹ itieye nọ i no erẹwho efa ze na a rrọ uvi okẹ rọ kẹ omai!” (Orẹwho ofẹ Ovatha-Ọre Europe jọ) Kọ who roro kpahe ekpohọ orẹwho ofa rọkẹ iruo usiuwoma ota na no?a—Iruẹru 16:9, 10.

‘Imakpe no Kẹvẹrẹ Kẹvẹrẹ Ze’

6. Ẹvẹ Zekaraya 8:23 o rọ riobọhọ use-abọ evẹrẹ sa-sa nọ ma be rẹriẹ ovao dhe evaọ iruo usiuwoma ota mai na?

⁶ Use-abọ ulogbo ofa jọ họ evẹrẹ sa-sa nọ a be jọ otọakpọ na ta. Ebaibol e ruẹaro nọ: “Evaọ oke oyena imakpe i re ti no kẹvẹrẹ kẹvẹrẹ erẹwho kpobi tha te jẹ obọ họ iwu ahwo Iju, anọ, ‘Je oma lele owhai, keme ma yo nọ Ọghẹnẹ avọ owhai a gbẹrọ.’ ” (Zekaraya 8:23) Evaọ orugba ọgbọna ọrọ eruẹaruẹ nana, imakpe na i dikihẹ kẹ otu obuobu na, onọ a ruẹaro kpahe eva Eviavia 7:9 na. Rekọ, muẹrohọ nọ, wọhọ epanọ eruẹaruẹ Zekaraya na e ta, orọnikọ “imakpe” na a bi ti no erẹwho kpobi ze ọvo ho rekọ ‘no kẹvẹrẹ kẹvẹrẹ erẹwho kpobi ze.’ Kọ ma ruẹ orugba ọrọ obọdẹ eruẹaruẹ nana no? Ee.

7. Iriruo vẹ i dhesẹ nọ a be rehọ emamọ usi na nyate ahwo nọ a “no kẹvẹrẹ kẹvẹrẹ kpobi” ze oma?

⁷ Joma rri iriruo jọ. Ikpe 50 nọ e vrẹ, a je kere ebe mai evaọ evẹrẹ 90. Nẹnẹ, unu yena u bu vi 400 no. ‘Ọrigbo nọ o wo ẹrọwọ avọ areghẹ na’ a bi ru oware nọ a rẹ sai ru kpobi re a ruẹ nọ a kere ebe evaọ evẹrẹ jọ nọ umutho ahwo jọ ọvo dede a be jẹ. (Matiu 24:45) Wọhọ oriruo, a kere ebe mai fihọ ẹvẹrẹ ahwo Greenland no (nọ ahwo 47,000 a be jẹ), ẹvẹrẹ ahwo Palau (nọ ahwo 15,000 a be jẹ), gbe ẹvẹrẹ ahwo Yap (nọ ahwo nọ a bu te 7,000 hẹ a be jẹ).

“Ẹthẹ Iruo” nọ O Rovie Uvẹ Ọkpokpọ Fihọ

8, 9. Oware vẹ o lẹliẹ “ẹthẹ iruo” rovie fihọ kẹ omai no, kọ didi oware Isẹri buobu a ru kpahe iẹe no?

⁸ Rekọ, nẹnẹ na, u du gwọlọ nọ ma re kpohọ orẹwho ofa re ma te whowho emamọ usi na kẹ ahwo evẹrẹ kpobi hi. Evaọ ikpe jọ kẹle na, ima ahwo buobu nọ okpẹtu hayo oware ofa jọ o be wọ dhẹ kpohọ erẹwho nọ eware e mae jọ woma o lẹliẹ ahwo nọ e be jẹ evẹrẹ sa-sa vọ erẹwho itieye na no. Wọhọ oriruo, a be jọ evaọ Paris, France, jẹ evẹrẹ sa-sa nọ i bu te 100. Evaọ Toronto, Canada, a be jẹ evẹrẹ 125; yọ evaọ London, England, evẹrẹ erara nọ a be jẹ i bu vi 300! Ahwo nana nọ i no erẹwho efa ze nọ i zurie ruọ ekwotọ ikoko buobu no na u rovie “ẹthẹ iruo” ọkpokpọ fihọ no, onọ a re ro whowho emamọ usi na kẹ ahwo erẹwho kpobi.—1 Ahwo Kọrint 16:9.

⁹ Idu Isẹri buobu a be jẹ use-abọ na rehọ ẹkwoma ẹvẹrẹ ọfa nọ a bi wuhrẹ. Rọkẹ ibuobu rai, o re bẹbẹ; rekọ a te roro oghọghọ ọrọ obọ ufihọ kẹ erara gbe ahwo nọ a dhẹ no orẹwho rai ze re a wuhrẹ uzẹme Ẹme Ọghẹnẹ, a re gbe roro uye na ha. Evaọ ukpe jọ kẹle na, enwenọ ahwo 40 evaọ udhusoi kpobi ọrọ enọ e họ-ame evaọ okokohọ ubrotọ jọ nọ a jọ orẹwho Ukiediwo-Ọre Europe jọ ru a rrọ ahwo nọ a no orẹwho ofa ze.

10. Ẹvẹ whọ rehọ omobe na Good News for People of All Nations ru iruo no? (Rri ẹkpẹti na “Eware nọ E Rrọ Omobe na Good News for People of All Nations,” evaọ ẹwẹ-obe avọ 32.)

¹⁰ Uzẹme, uyero ibuobu mai o rẹ sae kẹ ae uvẹ wuhrẹ ẹvẹrẹ ọkpokpọ họ. O make rrọ ere, ma rẹ sai wo obọ evaọ obọ ufihọ kẹ erara ẹkwoma eroruiruo omobe okpokpọ nọ a siobọno kẹle na Good News for People of All Nations,b onọ u wo ovuẹ isiuru evaọ evẹrẹ buobu sa-sa. (Jọn 4:37) Kọ whọ be rehọ omobe nana ruiruo evaọ odibọgba na?

Nọ Ahwo A gbẹ be Kezọ kẹ Emamọ Usi na Ha

11. Use-abọ ofa vẹ ahwo a be rẹriẹ ovao ku evaọ ekwotọ jọ?

¹¹ Nọ Setan ọ rrọ otọakpọ na kpokpo vi epaọ ọsosuọ na, ma rẹriẹ ovao ku use-abọ ulogbo ofa—ahwo a be kezọ tere he evaọ ekwotọ jọ. Onana u bi gbe omai unu hu keme Jesu ọ ruẹaro riẹ no inọ uruemu utioye na o te jọ. Be ta kpahe edẹ mai na, ọ ta nọ: “Uyoyou ahwo buobu u re ti kiekpo.” (Matiu 24:12) Evaọ uzẹme, ẹrọwọ nọ a re fihọ Ọghẹnẹ gbe adhẹẹ rọkẹ Ebaibol na o kiekpo gaga no evaọ udevie ibuobu. (2 Pita 3:3, 4) Fikiere, evaọ abọjọ akpọ na, umutho ahwo jọ ọvo a bi zihe ruọ ilele ọ Kristi. Dede na, orọnikọ onana u dhesẹ nọ iruo inievo Ileleikristi eghaghae mai nọ e be ta usiuwoma evaọ ekwotọ yena nọ ahwo a bi jo kurẹriẹ hẹ na uvrẹvru hu. (Ahwo Hibru 6:10) Eme jabọ? Roro kpahe ẹme obotọ na.

12. Fiki ẹjiroro ivẹ vẹ ma be rọ ta usiuwoma?

¹² Usiuwoma ọ Matiu u fi elo họ ugogo ẹjiroro ivẹ nọ ma be rọ ta usiuwoma. Ovo jọ họ ma bi ‘ru ilele ahwo erẹwho na kpobi’ re a zihe ruọ ilele Jesu. (Matiu 28:19) Orọ avivẹ họ ovuẹ Uvie na yọ “isẹi” kẹ erẹwho na. (Matiu 24:14) Ẹjiroro ivẹ nana e roja, rekọ ọrọ avivẹ na o wo uvi otofa. Fikieme?

13, 14. (a) Eme họ abọ ologbo jọ ọrọ oka ọzino Kristi? (b) Eme ma re wo họ iroro, maero nọ ma tẹ be ta usiuwoma evaọ ekwotọ nọ a rẹ jọ gaviezọ tere he?

¹³ Matiu, omọvo enọ i kere Ebaibol na o kere inọ ikọ na a nọ Jesu nọ: “Eme ọ rẹ te jọ oka ẹtha ra gbe urere akpọ na?” (Matiu 24:3) Evaọ uyo, Jesu ọ ta nnọ abọ ologbo jọ ọrọ oka na o rẹ te jọ iruo usiuwoma ota wariẹ akpọ na soso. Kọ ẹme ilele-iruo ọ jẹ ta kpahe? Ijo. Ọ ta nọ: ‘A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi.’ (Matiu 24:14) Fikiere, Jesu ọ rehọ eme riẹ na dhesẹ nọ iruo usiuwoma ota na dẹẹ e be te jọ abọ ologbo ọrọ oka na.

¹⁴ Fikiere, nọ ma bi whowho emamọ usi Uvie na, ma rẹ kareghẹhọ nọ ma gbẹ maki ku uvumọ ohwo rẹriẹ hẹ, yọ ma se “isẹi” no. Oghẹrẹ nọ ahwo a rehọ ovuẹ na kpobi kẹhẹ, a riẹ oware nọ ma bi ru, yọ ere ma bi ro wo obọ evaọ erugba eruẹaruẹ Jesu na. (Aizaya 52:7; Eviavia 14:6, 7) Jordy, Osẹri ọmoha jọ evaọ ofẹ obọ Ukiediwo-Ọre Europe, ọ ta nọ: “O rẹ lẹliẹ omẹ were eva gaga nọ mẹ rọ riẹ nọ Jihova ọ be rehọ omẹ ruiruo evaọ orugba Matiu 24:14.” (2 Ahwo Kọrint 2:15-17) Ababọ avro, epọvo na o rrọ owhẹ oma.

Nọ A tẹ Be Wọso Ovuẹ Mai

15. (a) Eme Jesu ọ vẹvẹ ilele riẹ unu kpahe? (b) Eme o bi fi obọ họ kẹ omai ta usiuwoma ghelọ ọwọsuọ?

¹⁵ Ọwọsuọ yọ use-abọ ofa jọ kẹ ewhowho emamọ usi Uvie na. Jesu ọ vẹvẹ ilele riẹ unu kpahotọ nọ: “Erẹwho na kpobi i re ti mukpahe owhai fiki odẹ mẹ.” (Matiu 24:9) Wọhọ Ileleikristi ọsosuọ na, a mukpahe ilele Jesu no nẹnẹ, a wọso ae je kpokpo ae no. (Iruẹru 5:17, 18, 40; 2 Timoti 3:12; Eviavia 12:12, 17) Evaọ ekwotọ jọ, egọmeti ọ whaha iruo rai. Ghele na, evaọ ẹmeoyo kẹ Ọghẹnẹ, Ileleikristi uzẹme evaọ ekwotọ itieye na a gbe bi whowho emamọ usi Uvie na. (Emọs 3:8; Iruẹru 5:29; 1 Pita 2:21) Eme o bi fi obọ họ kẹ ae gbe Isẹri efa evaọ akpọ na soso ru ere? Jihova ọ be rehọ ẹkwoma ẹzi ọfuafo riẹ kẹ ae ẹgba.—Zekaraya 4:6; Ahwo Ẹfẹsọs 3:16; 2 Timoti 4:17.

16. Ẹvẹ Jesu o ro dhesẹ usu nọ o rrọ udevie iruo usiuwoma ota na gbe ẹzi Ọghẹnẹ?

¹⁶ Jesu o dhesẹ usu okpekpe nọ o rrọ udevie ẹzi Ọghẹnẹ gbe iruo usiuwoma ota na nọ ọ ta kẹ ilele riẹ nọ: “Nọ Ẹzi Ẹri ọ ruọ owhai oma no wha re ti wo ogaga nọ wha ti ro se isẹri mẹ . . . rite ọnyaba akpọ na.” (Iruẹru 1:8; Eviavia 22:17) Oghẹrẹ nọ eware ivẹ nọ a jọ etenẹ fodẹ na i lele ohwohwo u fo oware nọ a re muẹrohọ. Orọ ọsosuọ, ẹzi ọfuafo o te ikọ na obọ, a te mu iruo usiuwoma ota akpọ-soso na họ. Fiki uketha ẹzi Ọghẹnẹ ọvo a sai ro wo ẹgba nọ a re ro thihakọ evaọ iruo nọ a re ro se “isẹi kẹ erẹwho akpọ na kpobi.” (Matiu 24:13, 14; Aizaya 61:1, 2) Nwani fo na, Jesu o dhesẹ ẹzi ọfuafo na wọhọ “Ọthuke.” (Jọn 15:26) Ọ ta nọ ẹzi Ọghẹnẹ o ti wuhrẹ jẹ kpọ ilele riẹ.—Jọn 14:16, 26; 16:13.

17. Okenọ ma tẹ rẹriẹ ovao ku ọwọsuọ ọgaga, ẹvẹ ẹzi ọfuafo na o re ro fi obọ họ kẹ omai?

¹⁷ Idhere vẹ ẹzi Ọghẹnẹ o bi ro fi obọ họ kẹ omai nẹnẹ okenọ ma tẹ rẹriẹ ovao ku ukpokpoma ogaga evaọ ewhowho emamọ usi na? Ẹzi Ọghẹnẹ ọ rẹ kẹ omai ẹgba, o vẹ wọso enọ i bi kpokpo omai na. Re ma dhesẹ onana, roro kpahe oware jọ nọ o via evaọ uzuazọ Sọl Ovie na.

Ọwọsuọ no Obọ Ẹzi Ọghẹnẹ Ze

18. (a) Ẹvẹ Sọl o ti ro nwene kpohọ ohwo oyoma? (b) Idhere sa-sa vẹ Sọl o je ro kpokpo Devidi?

¹⁸ Sọl ọ riẹ muhọ wọhọ ovie ọsosuọ ọrọ Izrẹl, rekọ uwhremu na o te ti veghe uzou kẹ Jihova. (1 Samuẹle 10:1, 24; 11:14, 15; 15:17-23) Fikiere, ẹzi Ọghẹnẹ ọ gbẹ jọ kugbe ovie na ha. Eva e tẹ jẹ dha Sọl rororo kpahe Devidi, ọnọ a wholo no wọhọ ovie nọ ọ be te rehọ ẹta riẹ, yọ ọ jẹ reawere uketha ẹzi Ọghẹnẹ. (1 Samuẹle 16:1, 13, 14) Devidi ọ wọhọ ohwo nọ a rẹ sae vabọ tu lọlọhọ. Ẹhẹ, binọ urete ọvo o wo rekọ Sọl o wo ozuẹ. Fikiere ẹdẹjọ nọ Devidi o je kporo urete riẹ, “Sọl o te fi ozuẹ na, keme o roro nọ, ‘O re ti du yei yawo ugbẹhẹ,’ rekọ Devidi ọ va riẹ abọ isiava.” (1 Samuẹle 18:10, 11) Oyena o vrẹ no, Sọl ọ tẹ gaviezọ kẹ Jonatan ọmọzae riẹ, ogbẹnyusu Devidi, o te duwu iyowu nọ: “Epanọ ỌNOWO na ọ rọ na, a gbẹ sai kpe [Devidi] vievie he.” Rekọ, Sọl ọ tẹ jẹ wariẹ “gwọlọ nọ ọ rẹ rọ ozuẹ na duwu Devidi yawọ ugbẹhẹ na.” Rekọ Devidi “ọ tẹ rehọ areghẹ va Sọl abọ, fikiere ozuẹ [na] ọ tẹ nya ruọ ugbẹhẹ.” Devidi ọ tẹ dhẹ, Sọl ọ tẹ wọ lele iei. Eva oke yena, ẹzi Ọghẹnẹ ọ tẹ te wọso Sọl. Evaọ edhere vẹ?—1 Samuẹle 19:6, 10.

19. Ẹvẹ ẹzi Ọghẹnẹ ọ rọ thọ Devidi?

¹⁹ Devidi ọ tẹ dhẹ bru Samuẹle ọruẹaro na, rekọ Sọl o te vi ahwo riẹ re a nyai mu Devidi sei. Rekọ, nọ a te oria nọ Devidi o dhere, “Ẹzi Ọghẹnẹ o te vomu ikọ Sọl na, a te mu aro họ ẹruẹ.” Ẹzi Ọghẹnẹ ọ da rai oma fia te epanọ uwou nọ a vi rai o rọ thọ rai ẹro riẹriẹriẹ. Sọl ọ tẹ wariẹ vi ahwo isiava efa re a nyai mu Devidi ze, rekọ oware ovona o via kẹ ae. Ukuhọ riẹ, Sọl omariẹ ọ tẹ nya bru Devidi, rekọ Sọl omariẹ ọ sae roma za ẹgba ẹzi Ọghẹnẹ hẹ. Evaọ uzẹme, ẹzi ọfuafo na ọ gba riẹ fihọ otọ “ẹdẹ ọyena gbe aso ọyena soso”—Devidi o te wo uvẹ lelele nọ ọ rọ dhẹ.—1 Samuẹle 19:20-24.

20. Didi oware ma rẹ sai wuhrẹ no ikuigbe kpahe ukpokpoma nọ Sọl o ro te Devidi na ze?

²⁰ Ikuigbe Sọl avọ Devidi na i wo uwuhrẹ ọbọga jọ: Enọ i bi kpokpo idibo Ọghẹnẹ a rẹ sae kparobọ họ okenọ ẹzi Ọghẹnẹ ọ tẹ wọso ae. (Olezi 46:11; 125:2) Jihova ọ jiroro nọ Devidi ọ te jọ ovie kẹ Izrẹl. Uvumọ ohwo ọ rẹ sai nwene iei hi. Rọkẹ edẹ mai na, Jihova ọ jiroro no inọ ‘a rẹ te vuẹ ovuẹ usiuwoma Uvie na.’ Uvumọ ohwo ọ rẹ sae whaha iẹe he.—Iruẹru 5:40, 42.

21. (a) Didi uruemu otu ọwọsuọ jọ nẹnẹ a bi dhesẹ? (b) Didi evaifihọ ma wo?

²¹ Isu egagọ gbe erọ egọmeti jọ a be rehọ erue gbe ozighi dede daoma whaha iruo mai. Rekọ, wọhọ epanọ Jihova ọ thọ Devidi evaọ abọ-ẹzi na, ere Ọ te thọ ahwo Riẹ nẹnẹ. (Malakae 3:6) Fikiere, wọhọ Devidi, ma rẹ rehọ ududu ta nọ: “Ọghẹnẹ me fi eva họ ababọ ozọ. Kọ eme ohwo ọ rẹ sae ru omẹ?” (Olezi 56:11; 121:1-8; Ahwo Rom 8:31) Avọ obufihọ Jihova, joma gbẹ hae thihakọ use-abọ kpobi nọ ma be nya uwou nọ Ọghẹnẹ o vi omai re ma whowho emamọ usi Uvie na kẹ ahwo erẹwho kpobi.

[Oruvẹ-obotọ]

Kọ Whọ Sae Kareghẹhọ?

• Fikieme ma re ro nwene ona usiuwoma ota mai kiehọ uyero sa-sa?

• “Ẹthẹ iruo” vẹ nọ o bi su kpohọ uvẹ ọkpokpọ o rovie fihọ no?

• Eme iruo usiuwoma ota mai i bi rugba, makọ evaọ ekwotọ nọ a be jọ gaviezọ tere he?

• Fikieme otu ọwọsuọ a gbẹ sae rọ whaha ewhowho emamọ usi Uvie na ha?

[Ẹkpẹti nọ o rrọ ẹwẹ-obe avọ 28]

Uvi Evevọwẹ

“A be wereva jẹ reawere iruo rai kẹ Jihova.” Ere a rẹ sai dhesẹ uviuwou jọ nọ o kwa no Spen kpohọ Bolivia. Ọmọzae uviuwou na jọ ọ kwa kpohọ obei re o fi obọ họ kẹ utu etausiuwoma evaọ oria nọ u siomano. Oghọghọ nọ a jọ oma riẹ ruẹ o wọ ọsẹgboni riẹ te epanọ uviuwou na soso—onọ o kẹre te emezae ene nọ e rrọ ikpe 14 rite 25—a rọ kwa kpohọ obei kẹ usiuwoma ota. Emezae esa evaọ usu rai e rrọ ekobaro enẹna, yọ ọnọ ọ kake nya na o kpohọ Isukulu Ewuhrẹ Odibọgba na kẹle.

Enẹ Angelica, aye ikpe 30 nọ o no Canada ze, nọ ọ be ta usiuwoma evaọ ofẹ Ovatha-Ọre Europe, ọ ta: “Use-abọ na i re buobu, rekọ me bi wo evawere no obọ ufihọ kẹ ahwo evaọ odibọgba na ze. Oware ofa jọ nọ o be were omẹ gaga họ Isẹri nọ e rrọ emotọ ẹwho na nọ a bi yere omẹ fikinọ mẹ nyaze ti fi obọ họ kẹ ae.”

Inievo-emetẹ ivẹ obọ United States jọ nọ ọsẹgboni ọvo a yẹ nọ e kẹle ikpe 30 no nọ e be jọ Dominican Republic ta usiuwoma, a ta nọ: “Iruemu rai nọ i fo nọ ma re nwene kpohọ i bu kẹ hẹ. Rekọ, ma dadamu iruo mai, yọ emọ-uwuhrẹ Ebaibol ihrẹ mai a muọ iwuhrẹ họ ẹnya no.” Inievo ivẹ nana a fi obọ họ evaọ eromu utu iwhowho-uvie evaọ ẹwho nọ ukoko o rrọ họ.

Laura, oniọvo-ọmọtẹ nọ ọ kẹle ikpe 30 no, o kpohọ orẹwho ofa be ta usiuwoma anwọ ikpe ene nọ e vrẹ na. Ọ ta nọ: “Me keke aro fihọ ru uzuazọ-uyero mẹ lọhọ. Onana u fi obọ họ kẹ iwhowho-uvie na ruẹ nnọ ẹria uzuazọ olọlọhọ yọ oware nọ ohwo ọ rẹ rehọ udu obọriẹ gbe iroro egbagba salọ, orọnọ fiki uvuhu hu. Obọ nọ mẹ be sai fihọ kẹ amọfa, maero izoge na, o rrọ uvi oghọghọ kẹ omẹ nọ o be lẹliẹ omẹ kpairoro vrẹ ebẹbẹ nọ ekpohọ orẹwho ofa kẹ iruo usiuwoma ota o rẹ sae wha ze. Mẹ sae rehọ oghẹrẹ uzuazọ ofa nwene iruo nana nọ mẹ rrọ obonẹ ru na ha, yọ mẹ te jọ obonẹ kri te epanọ Jihova ọ kuvẹ riẹ.”

[Ẹkpẹti/Uwoho nọ o rrọ ẹwẹ-obe avọ 32]

Eware nọ E Rrọ Omobe na Good News for People of All Nations

Omobe na Good News for People of All Nations u wo ovuẹ ẹwẹ-obe ọvo nọ a kere evaọ evẹrẹ 92. A kere eme na do wọhọ ẹsenọ ọnọ ọ be ta usiuwoma na ọ be tae kẹ ọnọ o wo uwou na. Fikiere nọ ọnọ o wo uwou na o te se ovuẹ na, u re do wọhọ ẹsenọ whọ be ta ẹme kẹe.

Who te rovie ẹwẹ-obe ọsosuọ na, whọ rẹ ruẹ udhesẹ-oria akpọ na soso. Rehọ udhesẹ-oria nana ro muọ ẹme họ kugbe ọnọ o wo uwou na. Ẹsejọhọ whọ rẹ sae riobọhọ orẹwho nọ whọ be rria, who ve je dhesẹ nọ whọ gwọlọ riẹ oria nọ ohwo na o no ze. Evaọ edhere yena, whọ sai ru ei nọ ọ jẹ kpahe ẹme, ru ei rehọ owhẹ wọhọ ogbẹnyusu je ru udu kiei vi.

Eme nọ e karo evaọ omobe na e fodẹ eware sa-sa nọ ma re ru ro fi obọ họ kẹ enọ e rẹ jẹ ẹvẹrẹ nọ ma yo ho. Iviena roma totọ se je fi ai họ iruo ziezi.

Orọnikọ evẹrẹ sa-sa nọ a ro kere omobe na ọvo ẹwẹ-obe avọ esa gbe ọrọ avọ ene na e fodẹ hẹ rekọ te oka nọ u dikihẹ kẹ ẹvẹrẹ na. Onana u re fi obọ họ kẹ owhẹ vuhu oka ẹvẹrẹ nọ a kere fihọ emebe-evẹvẹ mai gbe ebe efa erọ evẹrẹ sa-sa.

[Uwoho]

Kọ whọ be rehọ omobe nana ruiruo evaọ odibọgba na?

[Iwoho nọ e rrọ ẹwẹ-obe avọ 29]

Ebe mai e rrọ evẹrẹ nọ i bu vi 400 enẹna

GHANA

PHILIPPINES

LAPLAND (SWEDEN)

[Iwoho nọ e rrọ ẹwẹ-obe avọ 30, 31]

Kọ whọ rẹ sai kpohọ oria nọ ẹgwọlọ rọkẹ iwhowho-uvie ọ mae jọ rro kẹ iruo usiuwoma na?

ECUADOR

DOMINICAN REPUBLIC