Oware Udidi 1

You Ahwo, Orọnọ Igho gbe Ekwakwa Ha

EME EBAIBOL NA O WUHRẸ? “Uyoyou kpahe igho oye họ owọ imuomu kpobi.”—1 Timoti 6:10.

USE-ABỌ VẸ O RIẸ? Ahwo nọ i re whowho eware nọ a be zẹ a re ru omai roro inọ eware nọ ma wo no vẹre i gbe fioka ha. A rẹ gwọlọ ru omai raha oke mai kpobi kọ okọ, re ma sae ruẹ igho dẹ eware ekpokpọ nọ i kie ze, nọ e mai woma jẹ mae rro. Ugho o rẹ lẹliẹ ohwo họ, o lọhọ gaga re ma you ugho. Dede na, Ebaibol e vẹvẹ unu inọ ohwo nọ o you efe o re wo edẹro vievie he. Solomọn ovie na o kere nọ: “Ohwo nọ o you ugho ugho o rẹ dae ẹro ho, ọnọ o you efe avọ erere o rẹ dae ẹro gbehe.”—Ọtausiuwoma Na 5:10.

EME WHỌ RẸ SAI RU? Raro kele Jesu, wuhrẹ epanọ who re ro you ahwo vi ekwakwa. U no Jesu eva ze re o si obọ no eware kpobi nọ o wo—makọ uzuazọ riẹ dede—fiki uyoyou nọ o wo kẹ ahwo. (Jọn 15:13) Ọ ta nọ: “Ẹkẹ oghale o mae rọ vi emio.” (Iruẹru Ikọ Na 20:35) Ma tẹ be hae rehọ oke gbe ekwakwa mai fi obọ họ kẹ amọfa, ahwo a ti ru kẹ omai re. Jesu ọ ta nọ: ‘Wha kẹ, a rẹ te kẹ owhai.’ (Luk 6:38) Ahwo nọ i re le igho gbe ekwakwa ibuobu, a rẹ wha edada gbe idhọvẹ se omarai. (1 Timoti 6:9, 10) Evaọ abọdekọ riẹ, uyoyou nọ ma re wo kẹ amọfa gbe uyoyou nọ amọfa a re wo kẹ omai oye o rẹ wha uvi edẹro ze.

Kọ whọ gbẹ kiẹ uyero ra riwi sọ eria jọ e riẹ nọ whọ sai jo ru uzuazọ ra lọhọ? Kọ whọ sai si obọ no eware jọ nọ who wo no hayo kpairoro vrẹ eware jọ nọ who bi le? Who te ru ere, whọ sae ruẹ nọ who ti wo oke buobu kẹ eware nọ e mai wuzou evaọ uzuazọ—obọ ufihọ kẹ amọfa gbe abọ owo evaọ egagọ Ọghẹnẹ, ọnọ ọ kẹ owhẹ eware kpobi nọ who wo na.—Matiu 6:24; Iruẹru Ikọ Na 17:28.

[Uwoho nọ o rrọ ẹwẹ-obe avọ 4]

“Wha kẹ, a rẹ te kẹ owhai”