Epanọ A Sae rọ Raha Ugho avọ Areghẹ

Mai kpobi ma gwọlọ ugho nọ ma rẹ rọ rẹrote uviuwou mai. (Itẹ 30:8) O rrọ ere keme, “ugho o rẹ thọ ohwo.” (Ọtausiuwoma Na 7:12, NW) O sae jọ bẹbẹ re ọzae avọ aye a ta ẹme kpahe ugho, rekọ ajọ oyena o wha ẹwhọ fihọ orọo rai hi. (Ahwo Ẹfisọs 4:32) Nọ ọzae avọ aye a tẹ be jiroro epanọ a te raha ugho, o gwọlọ nọ a re fievahọ ohwohwo je wo iroro evo.

1 ROMATOTỌ MA OMAA ARAHA

OWARE NỌ EBAIBOL NA Ọ TA: “Ono evaọ usu rai ọ rẹ gwọlọ bọ uwou nọ ọ rẹ kake keria tao ho re o roro araha na sọ ugho riẹ u ti tei bọe re?” (Luk 14:28) U wuzou re whai imava wha romatotọ ma omaa epanọ wha rẹ raha ugho. (Emọs 3:3) Wha jiroro oware nọ wha gwọlọ dẹ, je rri ugho nọ o rrọ owhai obọ. (Itẹ 31:16) Orọnikọ oware kpobi nọ whọ ruẹ whọ rẹ dẹ hẹ o tẹ make rọnọ who wo ugho na. Whaha esa-eriọ, whọ raha vrẹ onọ o rrọ owhẹ obọ họ.—Itẹ 21:5; 22:7.

OWARE NỌ WHỌ RẸ SAI RU:

• Otẹrọnọ ugho jọ u kuoma fiẹ evaọ urere amara na, wha jiroro oware nọ wha te rehọ iẹe ru

• Wha tẹ re vrẹ unuigho nọ wha ma omaa riẹ evaọ amara na, wha jiroro uzedhe oware nọ wha re ru re araha rai o kpotọ. Wọhọ oriruo, ukpenọ wha rẹ dẹ emu re, wha daoma there emu obọrai

2 WHA ROVIE EVA KẸ OHWOHWO

OWARE NỌ EBAIBOL NA Ọ TA: “Ru eware kpobi avọ oruọzewọ, orọnikọ evaọ aro Jihova ọvo ho, rekọ evaọ aro ahwo re.” (2 Ahwo Kọrint 8:21) Fodẹ uzedhe unuigho nọ whọ be hai wo evaọ amara kẹ ọzae hayo aye ra gbe unu nọ whọ be hae raha.

Hae nọ mi ọrivẹ ra tao otẹrọnọ whọ gwọlọ ru oware jọ nọ o te rehọ ugho buobu. (Itẹ 13:10) Nọ wha tẹ be hae jiroro na kugbe, udhedhẹ o te jọ uwou na. Who rri ugho nọ who bi wo wọhọ ora ọvo ho, rekọ orọ uviuwou na.—1 Timoti 5:8.

OWARE NỌ WHỌ RẸ SAI RU:

• Wha rọwo fihọ unuigho nọ whai omomọvo ọ rẹ sae raha ababọ ohwo nọ o kiọkọ nọ ọ rẹ ta kẹ tao

• Wha hẹrẹ re ẹwhọ ọ romavia no taure wha tẹ te ta epanọ wha rẹ raha ugho ho