Whọ rẹ Ruẹ Odẹ na Evaọ Ukiekpotọ Na
ST. MORITZ. Who yo odẹ yena no ẹdẹjọ? Oyena yọ odẹ oria jọ evaọ ukiekpotọ nọ a re se Engadine nọ o rrọ obọ Switzerland, oria nọ ahwo a re kpohọ kẹ eriosehọ nọ a tẹ rrọ ilivi. Rekọ, u te no St. Moritz na no, eria efa nọ i woma gaga e rrọ ukiekpotọ nana nọ o kẹle uwhru orẹwho Itali na. Yọ etẹe a rẹ jọ ruẹ Swiss National Park, oria nọ oghoghẹrẹ ekakọ gbe erao e rrọ nọ i bi jiri Jihova, Ọmemama Oride mai na. (Ol. 148:7-10) Yọ a rẹ jẹ jọ etẹe ruẹ eware jọ nọ ahwo a je ru kẹle ikpe egba ene (400) nọ i kpemu.
Whọ rẹ sae jọ ukiekpotọ nana muẹrohọ iwou buobu nọ a kere eware fihọ hayo drọ iwoho fihọ. Whọ rẹ jọ aro iwou jọ ruẹ odẹ Ọghẹnẹ, ẹsejọ evaọ ehru unuẹthẹ na. Evaọ ikpe buobu nọ i kpemu, o jọ uruemu ahwo na re a kere hayo drọ eware fihọ okafe iwou rai. Whọ rẹ jọ etenẹ ruẹ uwoho uwou jọ nọ o rrọ iwhre nọ a re se Bever. Otofa eme nọ a kere fihọ uwou na họ: “A bọ uwou nana evaọ ukpe 1715. Jihova họ emuhọ, yọ Jihova họ ekuhọ. Eware kpobi e rẹ sae lọhọ avọ ẹgba Ọghẹnẹ.” Ẹhẹ, odẹ Ọghẹnẹ o roma via isiava evaọ eme yena.
Uwou avivẹ (koyehọ, onọ o rrọ obehru) nọ a kere eme fihọ na a kake bọ. A bọ riẹ fihọ iwhre nọ a re se Madulain. Otofa eme nọ a kere fihọ uwou na họ: “Olezi avọ 127. Ajokpanọ Jihova ọ bọ uwou na, enọ e be bọe a be ruẹ uye kufiẹ. Lucius Rumedius. A bọ uwou na evaọ ukpe 1654.”
Fikieme a ro kere odẹ Ọghẹnẹ fihọ iwou nọ e rrọ ukiekpotọ nana tere? Evaọ okenọ Protẹstant ọ rọ hẹriẹ no ichọche Kathọlik, a fa Ebaibol na fihọ ẹvẹrẹ Romansh, ẹvẹrẹ nọ a rehọ no Latin ze nọ a jẹ ta evaọ Engadine. Evaọ uzẹme, Ebaibol họ obe ọsosuọ nọ a fa fihọ ẹvẹrẹ yena. Fikinọ eware nọ ahwo ẹwho yena a se no Ebaibol ze i duobọte ai udu, a tẹ jẹ hai kere eria Ebaibol nọ odẹ Ọghẹnẹ o rrọ fihọ inuethẹ rai, orọnikọ odẹ oma rai ọvo ho.
Ẹhẹ, rite inẹnẹ, eme yena i gbe bi whowho odẹ Jihova, je bi jiri ei, dede nọ ikpe buobu e vrẹ no nọ a ro kere ai. Eva e te were omai re erara gbe ahwo ẹwho na a gbe wuhrẹ kpahe Jihova, Ọghẹnẹ Oride na ẹkwoma eweze kpohọ uwou ofa nọ a kere odẹ riẹ fihọ, koyehọ Ọgwa Uvie ọrọ Isẹri Jihova nọ ọ rrọ Bever.
[Ọnọ o wo uwoho nọ o rrọ ẹwẹ-obe avọ 7]
© Stähli Rolf A/age fotostock