Tẹrovi Eware nọ Jihova O Ru kẹ Owhẹ No

NỌ JESU ọ nwane kparoma ze no, ilele ivẹ riẹ a te je no Jerusalẹm kpohọ Emeọs. Obe Luk o ta nọ: ‘Nọ ohwo ọ be ta kẹ ohwo na, yọ a nọ enọ na, Jesu omariẹ o te bi kẹle, o te lele ai nya. Rekọ a ru ilele na re a se iẹe ba evuhu.’ Jesu ọ tẹ ta kẹ ae nọ: “‘Nọ didi eme whai ohwo ọ be ta kẹ ohwo epanọ wha be nya na?’ A te dikihẹ, ovao rai avọ uweli.” Fikieme a rọ jọ uweri? Ilele na a je roro inọ Jesu o ti siwi ai no otọ esuo Egedhọ, rekọ oyena o re roma via ha. Ukpoye, a kpe Jesu no. Fiki onana a rọ rrọ uweri na.—Luk 24:15-21; Iruẹru 1:6.

Jesu o te mu ai iroro họ ẹjẹ kugbe. “Ọ tẹ rehọ Mosis muhọ ze ruọ eruẹaro kpobi, o te dhesẹ eware kpobi nọ a kere kpahe iẹ kẹ ae.” Ẹhẹ, eware igbunu buobu nọ e rẹ bọ ẹrọwọ ga e roma via evaọ etoke odibọgba Jesu. Nọ a be gaviezọ kẹ Jesu na, eva i te mu ai họ ẹwere. Uwhremu na, evaọ owọwọ yena, a tẹ ta nọ: “Kọ eva mai egbẹ ghariẹ okenọ ọ jẹ ta eme ko mai eva edhere, nọ o dhesẹ ikerakere na kẹ omai?” (Luk 24:27, 32) Eme ma rẹ sai wuhrẹ no oghẹrẹ nọ ilele Jesu a rehọ eme riẹ ze?

Ẹvẹ Eware nọ Ma Rẹro Rai nọ I Rugba Ha I re Kpomahọ Omai?

Ilele ivẹ nọ e jọ edhere Emeọs na a jọ ọkora keme eware nọ a rẹro rai e via ha. Oware nọ Ebaibol i dhesẹ fihọ Itẹ 13:12 na o via kẹ ae: “Oware nọ ohwo o rẹro riẹ nọ u te rie ei obọ họ o rẹ kẹ ẹe idhọvẹ.” Epọvo na, ejọ evaọ usu mai nọ e gọ Jihova ikpe buobu no, a roro inọ enẹ yọ ‘uye ulogbo’ na o nyaze jẹ vrẹ no. (Mat. 24:21; Evia. 7:14) Irẹro itieye nọ i ri rugba ha na e sae ginẹ wha ọkora se ohwo.

Rekọ kareghẹhọ inọ eva e wariẹ mu ilele ivẹ na họ ẹwere nọ Jesu o fi obọ họ kẹ ae riẹ eruẹaruẹ nọ i rugba no evaọ etoke rai na. Oriruo rai o rẹ sai fi obọ họ kẹ omai yọrọ oghọghọ mai je fi elọhoma kparobọ. Ọkpako ukoko jọ nọ a re se Michael ọ ta nọ: “Whọ tẹrovi eware nọ Jihova o ri ru hu hu. Ukpoye, tẹrovi eware nọ o ru no.” Emamọ ohrẹ ọ kẹ na!

Eware nọ Jihova O Ru No

Roro kpahe ikpeware jọ nọ Jihova o ru no. Jesu ọ ta nọ: “Ọ nọ ọ [rọwo] omẹ, iruo nọ me ru o re ti ruẹ re; o re ti ru iruo ilogbo nọ i vie enana.” (Jọn 14:12) Nẹnẹ, idibo Ọghẹnẹ a bi ru iruo nọ e mai wuzou kpobi gba. Ahwo nọ a bu vi ima ihrẹ a bi rẹro inọ a te zọ evaọ oke uye ulogbo na. U ri wo oke ovo ho nọ idibo Jihova nọ i bu t’enẹ a be rọ jọ ekwotọ buobu ta usiuwoma evaọ otọakpọ na soso. Jihova o ru no nọ eme ọ Jesu kpahe “iruo ilogbo nọ i vie enana” i ro rugba no.

Eme ọfa Jihova o ru kẹ omai no? O ru rie lọhọ nọ ahwo udu-oruọzewọ a ro no akpọ oyoma nana ziọ aparadase abọ-ẹzi na no. (2 Kọr. 12:1-4) Roro kpahe eware jọ erọ aparadase abọ-ẹzi na nọ ma wo nẹnẹ. Wọhọ oriruo, dai rri oria nọ who fi ebe ukoko na họ evaọ uwou ra hayo oria nọ a fi ebe ukoko rai họ evaọ obọ Ọgwa Uvie. Rovie Watch Tower Publications Index, hayo jọ ekọmputa rovie Watchtower Library. Kporo edrama ukoko na jọ. Jọ udu ra kareghẹhọ epanọ okokohọ jọ nọ whọ nya kẹle ọ jọ. Ofariẹ, roro kpahe usu nọ whọ be reawere riẹ nọ whọ tẹ rrọ kugbe inievo mai. Jihova o ru kẹhẹ nọ ọ be rọ kẹ omai emuore abọ-ẹzi buobu gbe okugbe-inievo iyoyou—enana kpobi ginọ aparadase abọ-ẹzi.

Devidi ọso-ilezi na ọ ta nọ: “Iruo ibuobu ra nọ who ru, O Ọnowo ỌGHẸNẸ mẹ, iruo igbenu who ru kẹ omai.” (Ol. 40:5) Ẹhẹ, nọ ma te roro kpahe eware igbunu nọ Jihova, Ọsẹ obọ odhiwu mai, o ru kẹ omai no gbe eware ezi nọ o bi ti ru kẹ omai evaọ obaro, e te kẹ omai ẹgba thihakọ evaọ egagọ riẹ.—Mat. 24:13.

[Uwoho nọ o rrọ ẹwẹ-obe avọ 31]

Jesu o fi obọ họ kẹ ilele riẹ roro kpahe eware nọ Jihova o ru kẹ ae no

[IUwoho nọ e rrọ ẹwẹ-obe avọ 32]

Jọ udu ra kareghẹhọ epanọ okokohọ jọ nọ whọ nya kẹle ọ jọ