Kọ Jihova Ọ be Ginẹ Daezọ Ra?

“Iroro ọ me-fioka-ha nọ me bi lele muabọ u bi ru nọ mẹ gbẹ be sai ro si kẹle Ọghẹnẹ hẹ.” Ere aye jọ nọ o roro nọ Ọghẹnẹ ọ be daezọ riẹ hẹ ọ ta. Kọ o rrọ owhẹ oma ere re? Ẹsejọhọ who re roro nọ, ‘Kọ Jihova ọ be ginẹ daezọ mai omomọvo?’ Uyo onọ na họ, Ee. Eme nọ Jesu ọ ta e kẹ omai imuẹro nọ Jihova ọ be daezọ mai.—Se Jọn 6:44.

Eme Jesu nọ ọ riẹ Jihova vi omọfa kpobi na ọ ta? (Luk 10:22) Jesu ọ ta nọ: “Ohwo ọvo ọ sai bru omẹ tha ha ajokpa nọ Ọsẹ nọ o vi omẹ ze o si rie.” Fikiere, Jihova o gbe si omai ziọ egagọ riẹ hẹ, ma rẹ sae jọ idibo riẹ hayo ilele Jesu hu. (2 Ahwo Tẹsalonika 2:13) Ma te wo otoriẹ oware nọ Jesu ọ be ta na ziezi, u ti mu omai ẹro nọ Ọghẹnẹ ọ be ginẹ daezọ mai.

Eme u dhesẹ re a ta nọ Jihova o si omai ze? Ẹme Griki nọ a fa nọ “si” na, u re je dhesẹ epanọ a re si ẹriri nọ iyei buobu i mu. (Jọn 21:6, 11) Kọ Jihova ọ rẹ gba omai họ re ma gọe, o tẹ make rọnọ u no omai eva ze he? Vievie. Jihova ọ kẹ omai uvẹ nọ ma rẹ rọ salọ sọ ma be gọe hayo ma be gọe he, ọ rẹ gba omai họ họ. (Iziewariẹ 30:19, 20) Jihova ọ be kiẹ eva ahwo kpobi riwi evaọ akpọ na soso, bi rri gwọlọ enọ i wo evezi. (1 Iruẹru-Ivie 28:9) Nọ ọ tẹ ruẹ nọ ohwo jọ o wo evezi, ọ vẹ jowọ re o si ei rehọ. Evaọ oghẹrẹ vẹ?

Jihova ọ rẹ rọ ẹmẹrera si ohwo otiọye nọ o wo evezi na ziọ egagọ uzẹme. (Iruẹru Ikọ Na 13:48) Idhere ivẹ Jihova o re ro ru onana, ẹkwoma usiuwoma uvie na nọ a bi whowho no Ebaibol na ze gbe ẹkwoma ẹzi ọfuafo riẹ. Jihova ọ tẹ ruẹ nọ ohwo ọ jẹ usiuwoma na rehọ, ọ vẹ rọ ẹzi ọfuafo riẹ fi obọ họ kẹe wo otoriẹ uzẹme na jẹ sai fi eware nọ o bi wuhrẹ na họ iruo. (1 Ahwo Kọrint 2:11, 12) Ababọ obufihọ Ọghẹnẹ, ma rẹ sae jọ uvi idibo riẹ hayo ilele Jesu hu.

Kọ eme ẹme nọ Jesu ọ ta evaọ obe Jọn 6:44 na o wuhrẹ omai kpahe Jihova? U wuhrẹ omai nọ oware uwoma jọ nọ Jihova ọ ruẹ evaọ oma ohwo, oye o rẹ lẹliẹe si ohwo na ziọ egagọ riẹ, gbe nọ ọ be daezọ mai omomọvo. Nọ aye nọ ma fodẹ evaọ obọ emuhọ uzoẹme na o wo otoriẹ onana vevẹ no, o te ti wo omosasọ. Ọ ta nọ: “Re ohwo ọ jọ odibo Jihova họ oware nọ o mai woma nọ ọ rẹ sai wo. Yọ nọ orọnọ Jihova ọ salọ omẹ re mẹ jọ odibo riẹ na, kiyọ mẹ rrọ ghaghae kẹe.” Kọ ẹvẹ kpahe owhẹ omara? Nọ whọ riẹ no nọ Jihova ọ be daezọ mai omomọvo na, kọ oma o gbẹ be were owhẹ re who si kẹle iẹe?