Obufihọ Kẹ Ahwo Re A Sikẹle Jihova
“Ohwo ọvo o bru Ọsẹ na ze he, rekọ fiki mẹ.”—JỌN 14:6.
1. Didi ujaje Jesu nọ ọ kparoma no na ọ kẹ ilele riẹ, kọ eme ọ via no nọ Isẹri Jihova a bi koko iei na?
JESU KRISTI o j’uzi kẹ ilele riẹ inọ a ‘ru ilele ahwo erẹwho kpobi, họ ae ame evaọ odẹ Ọsẹ gbe Ọmọ gbe ẹzi ẹri.’ (Matiu 28:19) Evaọ ikpe ikpe nọ i kpemu na, Isẹri Jihova a fiobọhọ kẹ ahwo nọ i bu vi ima esa no te riẹ Ọghẹnẹ, a tẹ te họ ae ame evaọ oka oma nọ a rọ kẹe re a ru oreva riẹ. Ẹvẹ eva e were omai te re ma fiobọhọ kẹ ae sikẹle Ọghẹnẹ!—Jemis 4:8.
2. Dede nọ ahwo kpokpọ buobu a be họ-ame, eme ọ via no?
2 Rekọ, evaọ ekwotọ jọ nọ ilele ekpokpọ buobu e jọ họ-ame no, ẹvi ọ riẹ tere he evaọ unu iwhowho Uvie. Dede na, ma rẹ sai kele enọ i whu no, omọvo o bi whu k’ukpe k’ukpe evaọ udhusoi. Ghele na, evaọ ikpe jọ nọ e vrẹ na, eware jọ i gele ejọ kie no. Fikieme? Uzoẹme nana gbe onọ o be tha na i ti duobọte epanọ a bi ro siwi ahwo bru Jihova ze gbe oware nọ ejọ i bi ro kie.
Ẹjiroro Usiuwoma Ota Mai
3. (a) Ẹvẹ uwou nọ a mu họ ilele Jesu obọ o rọ rọwo kugbe orọ ẹnjẹle nọ a fodẹ eva Eviavia 14:6 na? (b) Edhere jọ vẹ u w’iruo gaga no evaọ ẹkpare isiuru ahwo kẹ ovuẹ Uvie na, rekọ didi ẹbẹbẹ ọ r’otọ?
3 Evaọ “oke urere” nana, ilele Jesu a wo iruo ẹvaha ‘eriariẹ uzẹme’ kpahe “usiuwoma uvie na.” (Daniẹl 12:4; Matiu 24:14) Uwou nọ a vi rai o nwane rọwo kugbe orọ ẹnjẹle nọ o wo “usiuwoma ebẹdẹ bẹdẹ na nọ o re woro kẹ enọ e be ria eva akpọ na, rọkẹ erẹwho gbe erua gbe evẹrẹ gbe ahwo kpobi.” (Eviavia 14:6) Evaọ akpọ nana nọ ilale eware iwo e dafia na, edhere nọ ọ mai woma nọ a rẹ rọ lẹliẹ Uvie Ọghẹnẹ si ahwo urru je fiobọhọ kẹ ae sikẹle Jihova họ re a ta kẹ ae kpahe ẹruore uzuazọ ebẹdẹ bẹdẹ evaọ aparadase ọ otọakpọ. Dede nọ onana o thọ họ na, ahwo nọ e be nyusu kugbe ahwo Ọghẹnẹ fikiọ re a ruọ Aparadase na ọvo a dada awọ muotọ tere he evaọ edhere ọwhawha nọ o bi su kpohọ uzuazọ na.—Matiu 7:13, 14.
4. Wọhọ epanọ Jesu avọ ẹnjẹle nọ ọ rọ idedeghe ra na a ta, eme họ ẹjiroro iruo usiuwoma ota mai?
4 Jesu ọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.” (Jọn 17:3) Ẹnjẹle nọ ọ be jọ idedeghe ra na o bi whowho “usiuwoma ebẹdẹ bẹdẹ” jẹ be ta kẹ enọ e be rria otọakpọ na nọ: “Dhozọ Ọghẹnẹ jẹ rehọ oruaro kẹ e, keme oke oziẹobro riẹ o te no; wha jẹ gọ e, Ọnọ Ọ ma odhiwu gbe akpọ gbe abade, gbe iyeri ame.” (Eviavia 14:7) Fikiere, uzedhọ ẹjiroro usiuwoma ota mai họ re ma fiobọhọ kẹ ahwo sikẹle Jihova ẹkwoma Kristi Jesu.
Ẹkẹ-Abọ Mai Evaọ Iruo Jihova
5. Eme ọ Pọl avọ Jesu vẹ i dhesẹ nọ ma bi ru iruo Jihova, orọnikọ ọmai hi?
5 Okenọ o je kere se ibe Ileleikristi nọ a wholo, Pọl ukọ na ọ ta kpahe “iruo ahwo-ọruẹrẹhọ” ọ tẹ jẹ ta nọ Ọghẹnẹ ọ be ruẹrẹ ahwo họ kugbei ẹkwoma idhe ẹtanigbo Jesu Kristi. Pọl ọ ta nọ o wọhọ ẹsenọ “Ọghẹnẹ [ọ be] rehọ omai ta ẹme,” gbe nnọ “ma rehọ odẹ Kristi lẹ owhai re wha za oma bru Ọghẹnẹ ze.” Ẹvẹ eme enana e rọ omosasọ te! Makọ mai yọ “unuẹworo Kristi” hayo enyukọ avọ ẹruore otọakpọ, o rẹ thọrọ omai ẹro ho inọ onana yọ iruo Jihova, orọnikọ ọmai hi. (2 Ahwo Kọrint 5:18-20) Ghinọ Ọghẹnẹ họ ọnọ o bi si ahwo je bi wuhrẹ enọ i bru Kristi ze. Jesu ọ ta nọ: “Ohwo ọvo ọ sai bru omẹ tha ha ajokpa nọ Ọsẹ nọ o vi omẹ ze o si rie; mẹ rẹ te kpare iẹ eva ẹdẹ urere. A kere họ eva eruẹaro na nọ, ‘Ai kpobi Ọghẹnẹ o re ti wuhrẹ.’ Kohwo kohwo nọ o yo, je wuhrẹ [no] obọ Ọsẹ na ze, o bru omẹ ze.”—Jọn 6:44, 45.
6. Ẹvẹ Jihova o bi ro nuhu erẹwho na evaọ edhere ọsese, kọ eva okiọvo na, amono a be ruẹ omofọwẹ evaọ “uwou” egagọ riẹ?
6 Evaọ edẹ urere nana, ẹvẹ Jihova o bi ro si ahwo je bi “rovie ẹthẹ orọwọ” kẹ ae? (Iruẹru 14:27; 2 Timoti 3:1) Ugogo edhere jọ họ Isẹri riẹ nọ o bi ro whowho ovuẹ esiwo riẹ gbe ọrọ ẹdhoguo riẹ mukpahe uyerakpọ emuemu nana. (Aizaya 43:12; 61:1, 2) Ewhowho akpọ-soso nana o bi fi ọwhewhe họ erẹwho na oma—irẹro ẹdhoguo ọraha nọ ọ te tha kẹle. Eva okiovo na, a bi si ahwo nọ a wọhọ “efe” evaọ aro Ọghẹnẹ no uyerakpọ nana ze a tẹ be ruẹ omofọwẹ evaọ “uwou” egagọ efuafo riẹ. Kọ enẹ Jihova o bi ro ru eme eruẹaruẹ riẹ gba enọ Hagai o kere: “Me ve ti nyuhu erẹwho kpobi, efe erẹwho na kpobi e vẹ te ze, me ve ti ru uwou onana, o vẹ te vọ avọ eru ọnwranwra.”—Hagai 2:6, 7; Eviavia 7:9, 15.
7. Ẹvẹ Jihova o bi ro rovie idu ahwo je bi si ahwo gboma je bru Ọmọ riẹ ze?
7 Jihova o re rovie idu ọ enana nọ e be dhozọ Ọghẹnẹ na—“efe erẹwho na kpobi”—re a sae ‘kezọ kẹ eware nọ’ Isẹri riẹ e be ta na. (Hagai 2:7; Iruẹru 16:14) Wọhọ epanọ o jọ evaọ ikpe-udhusoi ọsosuọ, ẹsejọ Jihova ọ rẹ rọ enjẹle riẹ kpọ Isẹri riẹ bru ahwo eva efuafo enọ i bi bo sei kẹ obufihọ. (Iruẹru 8:26-31) Nọ ahwo a bi wuhrẹ eruẹrẹfihọ igbunu nọ Ọghẹnẹ o ru lọhọ kẹ ai ẹkwoma Ọmọ riẹ, Jesu Kristi na, uyoyou Jihova u ve si rai bru ei. (1 Jọn 4:9, 10) Ẹhẹ, Ọghẹnẹ o re si ahwo gboma je bru Ọmọ riẹ ẹkwoma “uyoyou-ẹwo,” hayo “uyoyou ọriẹruo” Riẹ.—Jerimaya 31:3, ẹme-otofa, NW.
Ono Jihova O re Si?
8. Didi oghẹrẹ ahwo Jihova o bi se?
8 Jihova o re si gboma je si bru Ọmọ riẹ enọ e be gwọlọ Iẹe. (Iruẹru 17:27) Enana i kugbe “ahwo nọ a bi dimẹ je bi bo fiki eware oma-uzue nọ a bi ruẹ” evaọ Kristẹndọm gbe evaọ akpọ na kpobi. (Izikiẹl 9:4) A wo “ẹgwọlọ kẹ abọ-ẹzi rai.” (Matiu 5:3, NW ) Uzẹme riẹ họ, ae họ “enọ e rọ oma kpotọ eva otọ na,” enọ e te rria otọakpọ aparadase na bẹdẹ bẹdẹ.—Zefanaya 2:3.
9. Ẹvẹ Jihova ọ rẹ rọ ruẹ sọ ahwo a ‘wo emamọ eva kẹ uzuazọ ebẹdẹ bẹdẹ,’ kọ ẹvẹ o bi ro si enana?
9 Jihova ọ rẹ riẹ oware nọ o rọ ohwo udu. Devidi ovie na ọ ta kẹ ọmọ riẹ Solomọn nọ: “ỌNOWO ọ rẹ kiẹ otọ eva ahwo kpobi, ọ vẹ riẹ oma gbe iroro ahwo. Otẹrọnọ whọ gwọle riẹ, whọ [rẹ] te rue riẹ.” (1 Iruẹru-Ivie 28:9) Fiki uyero udu hayo ẹzi ohwo, ẹgba uruemu riẹ, Jihova ọ rẹ sae ruẹ sọ ọ te j’owọ lele eruẹrẹfihotọ efuafo riẹ kẹ erọvrẹ izieraha gbe ẹruore uzuazọ ebẹdẹ bẹdẹ evaọ uyerakpọ okiẹrẹe okpokpọ Ọghẹnẹ na. (2 Pita 3:13) Ẹkwoma Ẹme riẹ, onọ Isẹri riẹ a bi whowho je wuhrẹ, Jihova o bi si gboma je si bru Ọmọ riẹ ‘enọ i wo emamọ eva kẹ uzuazọ ebẹdẹ bẹdẹ kpobi,’ enana e vẹ “rọwo.”—Iruẹru 13:48.
10. Eme o dhesẹ nọ Jihova nọ o bi si ejọ siọ ejọ ba u dhesẹ otatha ha?
10 Kọ uzẹme na nnọ Jihova o re si ejọ o ve vu edekọ wa u dhesẹ oghẹrẹ otatha jọ? Vievie! Ọghẹnẹ o re si ohwo u te no ohwo na eva ze. Ọ rẹ r’adhẹẹ kẹ unevaze rai. Ẹsalọ nọ Jihova o fihọ aro ahwo-akpọ nẹnẹ họ onọ o fihọ aro emọ Izrẹl bu vi ikpe 3,000 nọ e vrẹ, okenọ Mosis ọ ta nọ: “Nẹnẹ na me fi enana họ kẹ owhai, uzuazọ gbe ewoma, uwhu gbe eyoma. . . . Me se odhiwu gbe akpọ re a jọ isẹi kẹ owhai nẹnẹ na nọ, me fi uwhu gbe uzuazọ, oghale gbe eka họ kẹ owhai; fikiere wha rọ uzuazọ, re whai avọ emọ rai a ruẹse zọ, wha you ỌNOWO na Ọghẹnẹ rai, je yo uru riẹ, jẹ dhẹ gbalọ iẹe; oye na họ uzuazọ kẹ owhai gbe edẹ i krẹkri.”—Iziewariẹ 30:15-20.
11. Ẹvẹ emọ Izrẹl a rẹ rọ salọ uzuazọ?
11 Muẹrohọ nnọ emọ Izrẹl a rẹ salọ uzuazọ ‘ẹkwoma ỌNOWO na nọ a re you, eyo uru riẹ, re a dhẹ gbalọ iẹe.’ Okenọ a ta eme eyena, yọ ahwo Izrẹl a te rehọ Ẹkwotọ Eyaa na wọhọ ukuoriọ họ. Oke oyena a mudhe Otọ-Opaprara Moab, be ruẹrẹ oma kpahe re a fa Ethẹ Jọdan vrẹ rueva Kenan. Nọ o thọ họ re a roro kpahe “otọ okẹkẹe uwoma na, otọ nọ ame-ivie gbe ọnyọ i je bi suẹ” nọ u ti te ai obọ kẹle na, orugba irẹro rai e roma hwa uyoyou rai kẹ Jihova, eyo uru riẹ, re a jẹ dhẹ gbalọ iẹe. (Ọnyano 3:8) Mosis o ru onana vevẹ, ta nọ: “Wha te yo ẹme izi ỌNOWO na Ọghẹnẹ rai nọ me je kẹ owhai nẹnẹ na, re wha you ỌNOWO na Ọghẹnẹ rai, re wha jẹ nya evaọ idhere riẹ, je koko izi riẹ gbe ijaje riẹ gbe izi-ẹguae riẹ, kẹsena wha vẹ te zọ je vi, ỌNOWO na Ọghẹnẹ rai ọ vẹ te ghale owhai evaọ otọ nọ wha be te nyae rehọ na.”—Iziewariẹ 30:16, ẹjẹlẹ ibieme na ọmai.
12. Eme oriruo emọ Izrẹl o re wuhrẹ omai kpahe iruo usiuwoma ota gbe ewuhrẹ mai?
12 Kọ eme obehru na i gbe wuhrẹ omai oware jọ kpahe iruo usiuwoma ota gbe ewuhrẹ mai evaọ oke urere nana? Ma bi roro kpahe otọakpọ Aparadase nọ o be tha na jẹ be ta kpahe iẹe evaọ odibọgba mai. Rekọ t’omai te ilele nọ ma bi ru na a rẹ ruẹ orugba eyaa na ha otẹrọnọ ma be rehọ ẹjiroro oriobọ gọ Ọghẹnẹ. Wọhọ emọ Izrẹl na, t’omai te enọ ma bi wuhrẹ na ma re wuhrẹ re ma ‘you ỌNOWO na, yo uru riẹ, jẹ gbalọ iẹe.’ Ma tẹ kareghẹhọ onana okenọ ma tẹ rọ odibọgba mai, koyehọ ma bi ruiruo kugbe Ọghẹnẹ re ma si ahwo bru ei ze.
Ibe Iruiruo Ọghẹnẹ
13, 14. (a) Wọhọ epanọ 1 Ahwo Kọrint 3:5-9, o ta, ẹvẹ ma rẹ rọ jọ ibe iruiruo kugbe Ọghẹnẹ? (b) Ono a rẹ kẹ ọghọ na otẹrọnọ ẹvi jọ ọ riẹ, kọ fikieme?
13 Pọl o dhesẹ iruo i ru kugbe Ọghẹnẹ ẹkwoma ẹta kpahe ekporo udhu. O kere nọ: “Ono họ Apọlọs? Ono họ Pọl? Mai iruiruo nọ e rehọ owhai ze orọwọ na, epanọ Ọnowo ọ ghale kẹ omomọvo. Ẹkọ mẹ kọe, Apọlọs o te ku ame họ, rekọ Ọghẹnẹ o ru rie i ro. Fikiere ọ nọ ọ kọe te ọ nọ o ku ame họ a rọ oware ovo ho, rekọ ajokpa Ọghẹnẹ nọ o ru rie i nọ o jẹ ro. Ọ nọ ọ kọ te ọ nọ o ku ame họ ai kpobi iruo evo na, makinọ ọvuọ osa iruo riẹ a rẹ te rehọ na. Keme mai otu nọ i bi ru iruo kẹ Ọghẹnẹ; whai kọ udhu Ọghẹnẹ, whai uwou Ọghẹnẹ.”—1 Ahwo Kọrint 3:5-9.
14 Wọhọ ibe iruiruo Ọghẹnẹ, ma rẹ rọ ẹrọwọ kọ “ẹme uvie na” họ idu ahwo, ma vẹ rehọ izihebro gbe iwuhrẹ Ebaibol nọ ma ruẹrẹ oma kpahe kẹ ziezi ku ame họ isiuru nọ ma ruẹ kpobi. Otẹrọnọ otọ, hayo udu na, u woma, Jihova o re ru ẹkabọ riẹ ẹkwoma ubi uzẹme Ebaibol na nọ o re ru rro te okakọ ẹvi. (Matiu 13:19, 23) O ti si ohwo na gboma je bru Ọmọ riẹ. Evaọ ukuhọ riẹ, ẹvi nọ ma ruẹ kpobi evaọ unu iwhowho Uvie o rrọ fiki iruo Jihova evaọ idu ahwo, onọ o bi ro ru ubi uzẹme na rro je si ahwo otiọye na gboma je bru Ọmọ riẹ.
Iruo Ebabọ nọ I ti Kiọkọ
15. Didi ọtadhesẹ Pọl ọ fodẹ ro dhesẹ epanọ ma re ro fiobọhọ kẹ amọfa bọ ẹrọwọ?
15 Nọ ma be jọ ẹvi na ghọghọ na, ma ghinẹ gwọlọ ruẹ nọ ahwo na a gbe you Jihova, kezọ kẹ urru riẹ, jẹ gbalọ iẹe. O rẹ k’omai idhọvẹ okenọ otu jọ a te whrehe je kie no ukoko. Kọ ma sai ru oware jọ rọ whaha onana? Evaọ ọtadhesẹ ọfa, Pọl o dhesẹ epanọ ma sai ro fiobọhọ kẹ amọfa bọ ẹrọwọ. O kere nọ: “Keme otọhotọ ofa o rọ vi o nọ Jesu Kristi o fihọ no na ha. Otẹrọnọ ohwo jọ ọ be rehọ oro, idọlọ-efuafo, itho-ezi, ire, ẹkpẹ gbe ebiesa bọ họ ehru otọhotọ na—iruo ohwo kpobi e rẹ te via vevẹ; ẹdẹ oziẹobro na o re ti dhesiẹ e via, ẹdẹ ọyena ẹdẹ erae, keme erae a te rọ dawo iruo ohwo kpobi epanọ e rọ.”—1 Ahwo Kọrint 3:11-13.
16. (a) Ẹvẹ otofa etadhesẹ ivẹ Pọl na i ro wo ohẹriẹ? (b) Ẹvẹ iruo ebabọ mai e sae rọ jọ ethọthọ gbe onọ o sae da erae ji hi?
16 Evaọ ọtadhesẹ Pọl ọrọ udhu na, orro o roma hwa ekakọ eva-ezi, ame-okuhọ ẹsikpobi, gbe oghale Ọghẹnẹ. Ọtadhesẹ ọdekọ ọrọ ukọ na u dhesẹ owha-iruo ọgbodibo Oleleikristi kpahe ekuhọ iruo ebabọ riẹ. Kọ ọ bọ fihọ otọhotọ imuẹro avọ emamọ ekwakwa? Pọl ọ vẹvẹ unu nọ: “Jọ ohwo kpobi ọ yọrọ oma epanọ ọ rẹ bọ họ iẹe.” (1 Ahwo Kọrint 3:10) Okenọ ma tẹ kpare isiuru ohwo no ẹkwoma ẹta kpahe ẹruore uzuazọ ebẹdẹ bẹdẹ evaọ Aparadase, kọ ma be rehọ ewuhrẹ mai kpobi riwi igogo eriariẹ Ikereakere na ma vẹ rọ ovao kpobi riwi oware nọ ohwo na o re ru hrọ re o wo uzuazọ ebẹdẹ bẹdẹ? Kọ ewuhrẹ mai ọ rẹ gale ovao riwi onana ọvo: ‘Whọ tẹ gwọlọ rria bẹdẹ bẹdẹ evaọ Aparadase, who re wuhrẹ hrọ, kpohọ iwuhrẹ, je w’obọ evaọ iruo usiuwoma ota na’? Otẹrọ ere, koyehọ ma be bọ ẹrọwọ ohwo na họ emamọ otọhotọ họ, yọ oware nọ ma be bọ na o sae da erae edawọ ji hayo jọ krẹkri hi. Omodawọ re ma si ahwo bru Jihova ze ẹkwoma ẹruore uzuazọ evaọ Aparadase wọhọ osohwa kẹ umutho ikpe jọ nọ a gọ riẹ o wọhọ ẹsenọ a be rọ “ire, ẹkpẹ gbe ebiesa bọ.”
Ẹbọ Uyoyou kẹ Ọghẹnẹ gbe Kristi
17, 18. (a) Eme a re ru hrọ otẹrọnọ ẹrọwọ ohwo ọ rẹ jọ ọnọ ọ rẹ tọ? (b) Ẹvẹ ma sai ro fiobọhọ kẹ ohwo re o ru Kristi rria udu riẹ?
17 Re ẹrọwọ o tọ, u re wo ehri fihọ usu ohwo kugbe Jihova Ọghẹnẹ ẹkwoma Jesu Kristi. Wọhọ ahwo-akpọ sebaẹgba, ma rẹ sai wo usu udhedhẹ oyena kugbe Ọghẹnẹ ẹkwoma Ọmọ riẹ ọvo. (Ahwo Rom 5:10) Kareghẹhọ nọ Jesu ọ ta nọ: “Ohwo ọvo o bru Ọsẹ na ze he, rekọ fiki mẹ.” Re u fiobọhọ kẹ amọfa bọ ẹrọwọ, “otọhotọ ofa o rọ vi o nọ Jesu Kristi o fihọ no na ha.” Eme onana o gwọlọ?—Jọn 14:6; 1 Ahwo Kọrint 3:11.
18 Ẹbọ fihọ Kristi wọhọ otọhotọ na u dhesẹ ewuhrẹ evaọ edhere nọ ọmọ-uwuhrẹ Ebaibol na o re ro wo uyoyou udidi kẹ Jesu ẹkwoma eriariẹ evọvọ erọ ọkwa Riẹ wọhọ Ọtanigbo, Uzou ukoko na, Ozerẹ Okpehru oyoyou, gbe Ovie nọ o bi su. (Daniẹl 7:13, 14; Matiu 20:28; Ahwo Kọlọsi 1:18-20; Ahwo Hibru 4:14-16) U dhesẹ nọ a re ru Jesu vẹ kẹ ai te epanọ ọ rẹ rọ tubẹ rria evaọ idu rai. Olẹ mai kẹ ai o rẹ jọ wọhọ ayare Pọl kẹ Ileleikristi obọ Ẹfẹsọs. O kere nọ: “Mẹ rọ ighilawọ mẹ kieguẹ kẹ Ọsẹ na, . . . re o ru owhai . . . ru Kristi rria idu rai fiki ẹrọwọ rai avọ uyoyou; re wha wo owọ jẹ dọmu otọhotọ na.”—Ahwo Ẹfẹsọs 3:14-17, NW.
19. Eme ọ rẹ jọ iyẹrẹ ẹbọ uyoyou kẹ Kristi fihọ idu emọ-uwuhrẹ Ebaibol mai, rekọ eme ma re wuhrẹ ai hrọ?
19 Ma tẹ bọ evaọ edhere nọ uyoyou kẹ Kristi u ro wo owọ fihọ idu emọ-uwuhrẹ mai, onana o rẹ bọ ẹrọwọ kẹ Jihova Ọghẹnẹ. Uyoyou Jesu, iroro riẹ, gbe ohrọ riẹ e rọ ithatho ekwakwa Jihova. (Matiu 11:28-30; Mak 6:30-34; Jọn 15:13, 14; Ahwo Kọlọsi 1:15; Ahwo Hibru 1:3) Fikiere nọ ahwo a be riẹ je you Jesu na, a vẹ te riẹ je you Jihova.a (1 Jọn 4:14, 16, 19) U fo re ma wuhrẹ emọ-uwuhrẹ Ebaibol nnọ Jihova ọ rọ emu eware kpobi nọ Kristi o ru kẹ ahwo-akpọ jegbe nnọ ma re you Rie, jiri ei, jẹ gọe wọhọ “Ọghẹnẹ . . . usiwo mai.”—Olezi 68:19, 20; Aizaya 12:2-5; Jọn 3:16; 5:19.
20. (a) Ẹvẹ ma sai ro fiobọhọ kẹ ahwo sikẹle Ọghẹnẹ gbe Ọmọ riẹ? (b) Eme ma te ta kpahe evaọ uzoẹme n’otha na?
20 Wọhọ ibe iruiruo Ọghẹnẹ, j’oma fiobọhọ kẹ ahwo sikẹle iẹe gbe Ọmọ riẹ, fiobọhọ kẹ ae bọ uyoyou gbe ẹrọwọ evaọ idu rai. Fikiere Jihova ọ vẹ te jọ vevẹ kẹ ai. (Jọn 7:28) Ẹkwoma Kristi, a ve ti wo usu okpekpe kugbe Ọghẹnẹ, a ve ti you rie jẹ talamu ei. A vẹ te rọ uyoyou gọe nevaze, wo ẹrọwọ inọ eyaa igbunu Jihova i ti rugba evaọ ẹruoke riẹ. (Enuobruo 3:24-26; Ahwo Hibru 11:6) Rekọ, nọ ma bi fiobọhọ kẹ amọfa bọ ẹrọwọ, ẹruore, gbe uyoyou na, ma rẹ bọ ẹrọwọ mai ga re o jọ wọhọ okọ ogaga nọ o rẹ sae za ẹkporo ọgaga dhe. Ma te jọ uzoẹme n’otha na t’ẹme te onana.
[Footnotes]
a Obọdẹ edhere jọ nọ ma rẹ rọ riẹ Jesu viere, jẹ rọ fiki riẹ riẹ Ọsẹ riẹ, Jihova, họ ẹkwoma obe na The Greatest Man Who Ever Lived, onọ Watchtower Bible and Tract Society of New York, Inc., a kporo.
Evaọ Edhere ọ Ọkiẹkpemu
◻ Idhere vẹ ma be hae rọ kpare isiuru ahwo fihọ ovuẹ Uvie na, rekọ didi imuozọ e riẹ?
◻ Oghẹrẹ ahwo vẹ Jihova o re si gboma je bru Ọmọ riẹ?
◻ Re Izrẹl ọ rueva Ẹkwotọ Eyaa na o roma hwa eme, kọ eme ma rẹ jọ onana wuhrẹ?
◻ Didi abọ ma wo evaọ obufihọ kẹ ahwo re a sikẹle Jihova gbe Ọmọ riẹ?
[Picture on page 10]
Dede nọ ma rẹ fodẹ ẹruore uzuazọ ebẹdẹ bẹdẹ evaọ Aparadase kẹ ahwo, ugogo ute mai họ re ma si rai bru Jihova
[Pictures on page 13]
Izihebro mai i re w’iruo gaga ma tẹ ruẹrẹ oma kpahe ziezi