Ẹkpọvi Idabolo ọ Ababọ-ẹrẹrẹe

Kẹle na Ọnọma na ọ te rehọ ẹrẹrẹe nọ u bi si ahwo-akpọ urru na ze. Bọo oke oyena, ma rẹ sae daoma j’owọ re ma kpọ idabolo ababọ-ẹrẹrẹe nọ u kpomahọ omai gbe iviuwou mai na vi. Wọhọ epanọ Nelson Mandela, prẹsidẹnte ọ South Africa vẹre, o muẹrohọ, “oware nọ o rẹ hẹriẹ ohwo jọ nọ ọdekọ họ epanọ ma rehọ oware nọ ma wo ruiruo, orọnikọ onọ a k’omai hi.”

IKUIGBE i dhesẹ eme riẹ fihọ uzẹme. Ezae gbe eyae buobu a yẹ fihọ uyero ọ umutho eware, rekọ a tẹ rehọ oware nọ a wo ro ruiruo, a te wo obokparọ nọ o hẹriẹ e rai gaga no egbẹnyusu rai nọ e riakpọ n’otọ ze. Evaọ abọdekọ riẹ, amọfa nọ a yẹ fihọ akpọ ọruẹriọ a raha efe rai kufiẹ, a gbẹ rehọ efe rai ruiruo ziezi hi.

Rehọ Onọ Who Wo Ruiruo Ziezi!

O rọ isiuru Isẹri Jihova gaga re a fiobọhọ kẹ ahwo wo eriariẹ ẹjiroro Ọghẹnẹ ẹkwoma ewuhrẹ Ebaibol na. Rekọ a vuhumu nnọ re a wo erere ziezi no ovuẹ Ebaibol na ze, ahwo a rẹ riobe. Fikiere, Isẹri Jihova a wuhrẹ ahwo idu buobu no re a riẹ se je kere, kugbe ahwo 23,000 (evaọ udevie ikpe 1990) evaọ orẹwho Ukiediwo-Ọre Africa jọ ọvo. Be ta kpahe iruo ẹgbede nọ Isẹri Jihova a bi ru, San Francisco Examiner o muẹrohọ nnọ: “Whọ rẹ sai rri rai wọhọ emamọ emotọ. A rẹ hwa osa-uzou rai ziezi, rẹro te enọ e be mọ, họre ababọ-obeoriẹ.”

Fiba onana, ẹkwoma ewuhrẹ ẹsikpobi ọrọ ẹmeọta ẹgbede, Isẹri Jihova a wuhrẹ ahwo idu egba buobu no re a jọ eketa ẹme, enọ e rẹ sae jọ ẹgbede t’ẹme gbiae ziezi. Udevie idu enana họ ejọ enọ i wo ẹbẹbẹ ẹmeọta vẹre. Roro kpahe ọzae Obọze-Ọre Africa jọ ọnọ o kere nọ: “Ekọkọ mẹ e ga te epanọ mẹ gbẹ jẹ rọ kọhọ ahwo ho, ahwo a je fiobọhọ k’omẹ t’ẹme. . . . Okenọ mẹ ruọ Isukulu Odibọgba Ọghẹnẹ na no nọ me je se Ebaibol kẹ ogbotu ọsese jọ . . . , me bru ekọkọ te epanọ mẹ sai ro ru ẹme na re he. Okenọ ewuhrẹ na o kuhọ no [ọkohrẹ] na ọ tẹ kẹ omẹ ohrẹ obufihọ. Ọ tẹ jiroro nnọ mẹ hae jọ obọ uwou se do kẹ omobọ mẹ. Me te ru ere, jẹ raha oke kẹdẹ kẹdẹ, je se Ebaibol mẹ do gbe emagazini ọ Uwou-Eroro Na.” Ọzae nana ọ tẹ nyaharo ziezi te epanọ ọ be rọ kẹ ovuẹ ogbotu kẹ ahwo nọ a bu te udhusoi buobu, makọ idu ahwo buobu dede.

Awere-Ọriọ Ẹrẹrẹe Evaọ Udevie Inievo

Kpahe isukulu, ẹruọsa omokpokpọ, gbe edikihẹ ugho gbe uyerakpọ, iyero na e rọ oghẹrẹsa gaga evaọ udevie Isẹri Jihova. Ehẹriẹ enana e nwani dhesẹ uyero akpọ nana nọ ọ gba ha nọ a be rria na. Rekọ wo ohẹriẹ no ẹko egagọ efa, a si omohẹriẹ uyẹ, uyerakpọ, gbe ugho n’oma no.

A sai ru onana gba fiki oma nọ a be dawo ro fi eware nọ a bi wuhrẹ no Ebaibol ze h’iruo. A rehọ unevaze dede ehri-izi Ebaibol wọhọ enana rehọ: “ỌNOWO na o re riwẹ epaọ ohwo ho; eru oma ọye ohwo o re riwẹ, rekọ ỌNOWO na kọ obọ eva.” (1 Samuẹle 16:7) “Ọghẹnẹ ọ rọ ọriẹwẹ hẹ, rekọ evaọ korẹwho korẹwho ọnọ ọ dhozọ riẹ je ru onọ u kiẹrẹe ọ rẹ rehọ iẹe.” (Iruẹru 10:34, 35, NW ) “Wha rehọ eyoma hwosa eyoma kẹ ohwo ọvo ho, rekọ wha wo ẹjiroro eware nọ ikiehọ eva aro ahwo kpobi. Otẹ make bẹ, epa umutho nọ orọ owhai oma na, wha rehọ iẹ lele ahwo kpobi ria dhedhẹ.”—Ahwo Rom 12:17, 18; je rri 1 Timoti 6:17-19; Jemis 2:5, 9.

Fikinọ a roma kpotọ kẹ ehri-izi Ebaibol enana nọ e rẹ wha okugbe ze na, Isẹri Jihova a se re a jọ udevie rai kuvẹ edhesẹ ababọ-ẹrẹrẹe ọrọ ohẹriẹ uyẹ, uyerakpọ, hayo abọ ugho. Wọhọ oriruo, a re roro kpahe eware nana ha evaọ ohwo nọ a rẹ rọ ọkwa iruo kẹ evaọ ukoko Ileleikristi. A rẹ rehọ ekwa owha-iruo, wọhọ ewuhrẹ gbe ẹruọsa rọ kẹ fiki ete abọ-ẹzi.—1 Timoti 3:1-13; Taitọs 1:5-9.

Rọ kẹ ahwo nọ a ruẹ-uye no evaọ otọ ababọ-ẹrẹrẹe akpọ ọriẹwẹ na, ẹvẹ omosasọ riẹ o rro te re amọfa a yeri kugbe ai wọhọ inievo emezae gbe emetẹ nọ i wo edikihẹ ọvo na evaọ aro Ọnọma rai! Martina ọ rẹ sae kẹ imuẹro onana. Okenọ ọsẹ riẹ ọ dhẹ siọ uviuwou na ba, a tẹ yọrọ iẹe evaọ uwou oyogbere ọ ọyewọ-ọvo. Uvumọ ohwo ọ jẹ n’onọ riẹ hẹ, ọ jẹ hai rri oma riẹ kuẹku, yọ o jọ bẹbẹ kẹe re ọ jọ udevie ahwo. O te ti wo uruemu ọ wha-vu-omẹ-wa. Rekọ eware i te nwene nọ o muọ Ebaibol họ ewuhrẹ no je zihe ruọ omọvo Isẹri Jihova. Ọ ta nọ: “Mẹ be gbẹ họre iroro ethọthọ na, rekọ enẹna mẹ be sai yeri kugbe ẹbẹbẹ na woma viere. Me gbe bi rri oma mẹ kuẹku hu, yọ enẹna mẹ be t’ẹme avọ udu viere. Uzẹme na o kẹ omẹ iroro ewo owha-iruo no. Obọnana mẹ riẹ nọ Jihova o you omẹ gbe nnọ uzuazọ u fo ẹrria.”

Wọhọ ẹko Ileleikristi akpọ-soso, Isẹri Jihova evaọ bu vi erẹwho 230 a be reawere utho ẹrẹrẹe nọ o rọ obọdẹ gaga evaọ akpọ inẹnẹ na. Kọ ukoko egagọ ọfa jọ ọ sae r’obọ s’udu ta epọvo na re o ghine dhesẹ iẹe?

Uzẹme, Isẹri Jihova a vuhu oware nọ o rọ otọ na mu. A rọwo nnọ fikinọ a rọ akpọ nọ ọ gba ha, a riẹ nọ ae omarai a sai si ababọ-ẹrẹrẹe ohwo-akpọ n’otọ họ wọhọ epanọ o rọ kẹ ahwo nọ a daoma bẹ no evaọ ikpe-udhusoi buobu na—ababọ obokparọ. Ghele na, a be ghọghọ inọ evaọ udevie rai, a daoma bru idabolo riẹ abọ dhe gaga no. Yọ avọ ẹrọwọ ọgaga fihọ eyaa Ọghẹnẹ, a bi rri haro kpohọ akpọ ọkpokpọ ẹrẹreokie oria nọ a ti jo si ababọ-ẹrẹrẹe no bẹdẹ bẹdẹ.

Ẹhẹ, kẹle na a ti zihe ahwo-akpọ ẹmeoyo kpobi kpohọ ẹrẹrẹe “evaọ orro gbe ẹkẹ-uvẹ” nọ Ọnọma rai ọ jiroro riẹ kẹ ai nnọ a reawere riẹ no otọ ze na. Ẹvẹ eme eyena e were ezọ te! Oke onana o te ziọ uzẹme!

[Blurb/Picture on page 8]

Uzẹme Ebaibol u re fiobọhọ si omohẹriẹ uyẹ, uyerakpọ, gbe orọ ugho no

[Picture on page 7]

Isẹri Jihova a be họre ababọ-obeoriẹ ẹkwoma ewuhrẹ ahwo idu buobu epanọ a rẹ rọ riẹ se je kere