Ababọ-ẹrẹrẹe Kọ Ọghẹnẹ O Wo Rie h’Eva?

Uyo okpẹkpẹe riẹ họ ijo. Joma rri oware nọ ma rọ ta ere.

ẸJIRORO Ọghẹnẹ họ ahwo-akpọ kpobi a wo uvẹ ẹrẹrẹe nọ a rẹ rọ reawere uzuazọ gbe evawere. Kpahe ẹma ohwo, ma se nọ: “Kẹsena Ọghẹnẹ ọ tẹ ta nọ, ‘Ma ma ohwo rọ uwoho mai, re o tho omai, re o wuzou vi iyei obọ abade, gbe evra nọ e rọ obọ ehru, gbe iruẹ, gbe akpọ kpobi, gbe eware kpobi nọ i bi siẹ evaọ otọ akpọ na.’ ” Nọ ọ ma emama otọakpọ na re no, “Ọghẹnẹ ọ tẹ ruẹ nọ eware kpobi nọ ọ ma na i re wowoma.”—Emuhọ 1:26, 31.

Kọ Ọghẹnẹ ọ sae ta nọ uyerakpọ ababọ-ẹrẹrẹe inẹnẹ na “i re wowoma”? Vievie, keme “Ọghẹnẹ họ uyoyou.” (1 Jọn 4:8) A ta kpahe iẹe nnọ “ọ kare ọriẹwẹ avọ udioriọ” gbe nnọ “iruo riẹ i kiete, keme idhere riẹ kpobi i re wowoma. Ọghẹnẹ ọtẹruo nọ ọ kare eyoma, nọ o re wowoma je kiete.” (Iziewariẹ 10:17; 32:4; wawo Job 34:19.) Yọ Pita ukọ na o ku rie họ nnọ: “Evaọ uzẹme u muomẹ ẹro nọ Ọghẹnẹ ọ rọ ọriẹwẹ hẹ, rekọ evaọ korẹwho korẹwho ọnọ ọ dhozọ riẹ je ru onọ u kiẹrẹe ọ rẹ rehọ iẹe.”—Iruẹru 10:34, 35, NW.

Nọ Ọghẹnẹ ọ rọ yoyou, ababọ-ọriẹwẹ, gbagba, kiete, je kiẹrẹe na, kọ ẹvẹ ọ rẹ rọ ma ahwo-akpọ avọ ababọ-ẹrẹrẹe kpahe ẹkẹ-uvẹ rai nọ a rẹ rọ reawere evawere? Re ọ kuvẹ kẹ omohẹriẹ evaọ udevie ahwo je fi ae họ uyerakpọ ababọ-ẹrẹrẹe o rẹ wọso ẹkoma riẹ. Ẹjiroro riẹ họ re a “yẹ ahwo-akpọ kpobi avọ ufuoma gbe ẹrẹrẹe evaọ orro gbe ẹkẹ-uvẹ.” Ghele na, eware e rọ ere nẹnẹ hẹ. Eme jabọ?

Emuhọ Ababọ-Ẹrẹrẹe

Inọ Ọghẹnẹ ọ ma ahwo-akpọ re a jọ ẹrẹrẹe orọnikọ u dhesẹ nọ a rẹ jọ ẹrẹrẹe evaọ kabọ kabọ họ. A sae hẹrioma evaọ ona, isiuru, gbe uruemu. A sae jẹ hẹrioma evaọ ọkwa hayo udu-esuo. Wọhọ oriruo, t’ọzae t’aye a rọ ẹrẹrẹe he evaọ kabọ kabọ, rekọ Ọghẹnẹ ọ ma aye na wọhọ “ofiobọhọ” kẹ ọzae na. (Emuhọ 2:18) Esẹ gbe ini avọ emọ a wo udu-esuo ovo na ha. Dede na, makọ ehẹriẹ enana, ahwo kpobi—ezae, eyae, gbe emọ—a rẹ reawere uvẹ ẹrẹrẹe ovo nọ Ọghẹnẹ ọ kẹ re a sae nyate ugogo ẹgwọlọ evawere. Aikpobi a rẹ reawere orro gbe edikihẹ ẹrẹrẹe evaọ aro Ọghẹnẹ.

Epọvo na, emọ ẹzi Ọghẹnẹ, enọ a ma taure a tẹ te ma ahwo, a kẹ rai iruo gbe owha-iruo sasa. (Emuhọ 3:24; 16:7-11; Aizaya 6:6; Jud 9) Ghele na, evaọ uwhru iruo nọ a kẹ rai na, aikpobi a rẹ reawere eruẹrẹfihotọ Ọghẹnẹ kẹ uzuazọ avọ evawere ovo na. Fikiere a te dhesẹ ababọ-ọriẹwẹ Ọghẹnẹ via evaọ edhere igbunu.

U yoma kẹhẹ, ọruẹrẹfihotọ ababọ-ọriẹwẹ Ọghẹnẹ na o da omama ẹzi jọ ẹro ho. Ọ gwọlọ vi oware nọ Ọghẹnẹ ọ kẹ riẹ, o thokpuru ọkwa okpehru. Avọ iroro ethọthọ nana nọ o fihọ eva, ọ tẹ wọso Jihova, ọnọ o wo udu esuo kpobi wọhọ Ọnọma. Ọmọ ẹzi Ọghẹnẹ nana ọ tẹ te viẹ ahwo họ re a yare mi Ọghẹnẹ vi onọ Ọ kẹ rai. (Emuhọ 3:1-6; wawo Aizaya 14:12-14.) Fikiere, ọruẹrẹfihotọ Jihova kẹ ahwo-akpọ re a reawere uzuazọ gbe evawere o tẹ wọhọ nọ o vẹtu no. Ohwo ẹzi ọwọsuọ nana, ọnọ a jọ Eviavia 20:2 dhesẹ wọhọ “Setan hayo Ukumuomu” na, o te zihe ruọ ọnọ ọ wha ababọ ẹrẹrẹe ahwo-akpọ ze.

Kọ Eware I ti Nwene Ẹdẹjọ?

Uyo okpẹkpẹe riẹ họ E!

Rekọ ono ọ te wha inwene nọ ma gwọlọ na ze? Isu ahwo-akpọ, ejọ avọ udu oruọzewọ kpobi, a ya bẹ no evaọ ikpe-udhusoi buobu re a ru ere. A ti ru emamọ oware ovo via ha, onana o lẹliẹ ahwo buobu ku ei họ nnọ o kare-iroro re a rẹro nnọ ẹbẹbẹ ababọ-ẹrẹrẹe u ti kuhọ ẹdẹjọ. Rekọ a kere eriwo Ọghẹnẹ fihọ Aizaya 55:10, 11: “Jegbe wọhọ epanọ oso avọ ekpalekpa ame i re kie no obọ ehru tha, nọ i re zihe he bẹsenọ e rẹ kẹ otọ ame nọ o rẹ lẹliẹe dhẹ ẹbe jẹ mọ ibi, ibi nọ a rẹ kọ gbe emu nọ a rẹ ria, ere ẹme nọ o no unu mẹ ze ọ rọ; o re zihe bru omẹ tha ababọ họ, rekọ o re ru epanọ mẹ ta gba je ru oware nọ mẹ rehọ fiki riẹ vi ei na gba.”

Ẹvẹ o rọ omosasọ te inọ Jihova Ọghẹnẹ o whowho no nnọ o ti ru ẹjiroro ọsosuọ riẹ gba re ọ kẹ ahwo-akpọ kpobi uvẹ ẹrẹrẹe kẹ uzuazọ gbe evawere! Wọhọ Ọghẹnẹ uzẹme, ọ r’obọ s’udu nọ o ti ru oware nọ ọ y’eyaa riẹ gba. Avọ evawere, o wo unevaze na gbe ogaga nọ o re ro ru ere. Ẹvẹ o ti ro ru onana gba?

Uyo na o roma hwa Uvie nọ Jesu Kristi o wuhrẹ ilele riẹ kpobi nọ a lẹ kẹ na: “Ọsẹ mai nọ ọ rọ obọ odhiwu, . . . Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.” (Matiu 6:9, 10) Ẹhẹ, Uvie Ọghẹnẹ họ edhere nọ Jihova ọ te rọ “whọlọ ivie na kpobi [enọ e rọ nẹnẹ na] ọ vẹte rehọ ai ze oba, ọ vẹte jọ bẹdẹ.”—Daniẹl 2:44.

Evaọ otọ esuo Uvie odhiwu na, ukoko ahwo-akpọ okpokpọ o te roma via. Evaọ abọ nana, Jọn ukọ na o kere enẹ evaọ obe urere Ebaibol na, Eviavia, anọ: “Mẹ ruẹ odhiwu ọkpokpọ gbe akpọ ọkpokpọ. Keme odhiwu ọsosuọ avọ akpọ ọsosuọ e vrẹ no.” (Eviavia 21:1) Kabọ kabọ oyoma ababọ-ẹrẹrẹe kpobi e vẹ te vrẹ—uvuhu, ẹyao, ogbori, omohẹriẹ, gbe idabolo ahwo-akpọ efa.a

O vrẹ ikpe-udhusoi no nọ Isẹri Jihova a be rọ gale ovao ahwo kpohọ Uvie oyena. (Matiu 24:14) Ẹkwoma ebe nọ a bi kporo gbe obufihọ omobọ rai, a dawo ẹgba rai no re a fiobọhọ kẹ ahwo wo eriariẹ ẹjiroro Ọghẹnẹ nọ a kere fihọ Ebaibol na. Dede na, orọnikọ iruo ewuhrẹ akpọ-soso rai o kẹ ahwo ẹruore ẹrria evaọ ẹrẹrẹe gbe evawere obaro ọvo ho rekọ enẹna o kẹ erere no evaọ ẹwhaha idabolo ababọ-ẹrẹrẹe. Joma rri epanọ o rọ rrọ ere.

[Footnotes]

[Blurb on page 5]

Ọghẹnẹ ọ jiroro nọ ahwo-akpọ kpobi a wo uvẹ ovo na orọ uzuazọ gbe evawere