Kọ A te Sai Gine Rri Ahwo Ovioma Kpobi Ẹrẹrẹe Ẹdẹ Jọ?—Eme Ebaibol na Ọ Ta?

Ahwo buobu a roro nọ o te sae lọhọ họ re ahwo ovioma kpobi a jọ ẹrẹrẹe ẹdẹ jọ.

• “Evaọ akpọ na soso, ikoko gbe itu ahwo sa-sa a wo okugbe vievie he fikinọ ahwo a bi rri nọ ovioma rai o mai woma, yọ ẹbẹbẹ nana ọ be wha uye se oghẹrẹ ahwo kpobi. Onana u bi je ru nọ ahwo a bi ro kienyẹ amọfa.”—António Guterres, Ọnowuzou UN.

Kọ ahwo ovioma kpobi a te ginẹ jọ ẹrẹrẹe ẹdẹ jọ? Eme Ebaibol na ọ ta?

Oghẹrẹ nọ Ọghẹnẹ o bi rri ahwo ovioma sa-sa

Ebaibol na ọ vuẹ omai oghẹrẹ nọ Ọghẹnẹ o bi rri ahwo ovioma sa-sa.

• “[Ọghẹnẹ] ọ ma ahwo erẹwho na kpobi no oma ọzae ọvo ze re a rria otọakpọ na soso.”—Iruẹru Ikọ 17:26.

• “Ọghẹnẹ o wo ọriẹwẹ hẹ, rekọ evaọ orẹwho kpobi, ohwo nọ ọ be dhozọ riẹ je bi ru oware nọ u kiehọ ọ rẹ jẹe rehọ.”—Iruẹru Ikọ 10:34, 35.

Ebaibol na o dhesẹ nọ uviuwou ovona ahwo-akpọ kpobi a no ze, yọ Ọghẹnẹ ọ rẹ jẹ ahwo ovioma kpobi rehọ.

Okenọ ahwo ovioma kpobi a te rọ jọ ẹrẹrẹe

Uvie Ọghẹnẹ, koyehọ egọmeti riẹ nọ o rrọ obọ odhiwu u ti ru ahwo kpobi jọ ẹrẹrẹe. Egọmeti yena o ti wuhrẹ ahwo epanọ u fo nọ a re yerikugbe ohwohwo. Ahwo a ti wuhrẹ oware nọ u ti fiobọhọ kẹ ae nọ a gbe ti roro nọ a woma vi amọfa ha.

• “Ahwo nọ a be rria ẹkwotọ na a re wuhrẹ kpahe ẹrẹreokie.”—Aizaya 26:9.

• “Udhedhẹ họ oware nọ u ti no uvi ẹrẹreokie ze, yọ ibi nọ uvi ẹrẹreokie o te mọ họ udhedhẹ gbe omofọwẹ nọ o rẹ jọ ribri.”—Aizaya 32:17.

Nẹnẹ, ima ahwo buobu a be jọ Ebaibol na wuhrẹ epanọ a rẹ rọ kẹ amọfa ọghọ gbe adhẹẹ.

• Re who gbe wuhrẹ kpahe eware efa, se emagazini Awake! nọ uzoẹme riẹ o ta nọ “Is There a Cure for Prejudice?”

• Se uzoẹme na “Talking to Children About Racism” re whọ ruẹ epanọ esẹgbini a sae rọ jọ obọ uwou lele emọ rai ta ẹme kpahe uzoẹme nana.