Emamọ Usi Rọkẹ Ahwo Kpobi

Ẹkparomatha Jesu o lẹliẹ ilele riẹ wo ọwhọ kẹ iruo Uvie na. Pọl ukọ na ọ ta usiuwoma na evaọ erẹwho Esia Minor soso gbe Mediterenia be rọ ikoko mu, jẹ bọ inievo na ga re a sai dikihẹ ga nọ a tẹ rẹriẹ ovao dhe edawọ sa-sa. Ghelọ edawọ sa-sa nọ a jẹ rẹriẹ ovao dhe, ikoko na i je vihọ, yọ ahwo buobu a bi kurẹriẹ.

Uwhremu na, a te mu Pọl fihọ uwou-odi. Dede nọ ọ jọ uwou-odi, o je kere ileta uduotahawọ gbe ehrẹ se ikoko na. Ọ tube vẹvẹ ae unu kpahe ikọ-erue. Ọ rọ ẹkwoma ẹzi ọfuafo Ọghẹnẹ ta nọ “erao ijihẹ imuomu” e rẹ te ruọ udevie rai jẹ ta “eware nọ e rẹ liẹliẹ ahwo yoma, nọ a reti si ilele lele oma rai.”—Iruẹru Ikọ Na 20:29, 30.

Evaọ ekuhọ ikpe-udhusoi ọsosuọ na, ikọ-erue i te mu oma họ ẹrọvia. Oke nana, Jesu nọ a kpare no uwhu ze no na, ọ rọ kẹ Jọn ukọ na Eviavia kpahe eware nọ e te via evaọ obaro. Jọn o kere nọ ghelọ omadawọ ahwo ọwọsuọ gbe iwuhrẹ erue, Ọghẹnẹ o ti ru ẹjiroro nọ o wo kẹ ahwo-akpọ gbe otọakpọ na gba. Ahwo “erẹwho gbe erua gbe evẹrẹ” kpobi a ti yo usiuwoma Uvie Ọghẹnẹ. (Eviavia 14:6) A te wariẹ zihe otọakpọ ruọ aparadase nọ ahwo kpobi nọ a ru oreva Ọghẹnẹ a te rria.

Kọ oyena o gbẹ rrọ emamọ usi? O tẹ rrọ ere, gbe se Ebaibol na re whọ ruẹ irere nọ i re te owhẹ enẹna gbe evaọ obaro.

Whọ rẹ sae jọ www.jw.org se Ebaibol na evaọ enwenọ evẹrẹ 50. Whọ sae jọ oria evuẹ Itanẹte nana se ibroshọ ọ Ebaibol Na—Ovuẹ Vẹ O Riẹ Eva?, Emamọ Usi nọ U No Obọ Ọghẹnẹ Ze! gbe obe na Eme Ebaibol na O Gine Wuhrẹ? Yọ whọ rẹ sae jọ etẹe ruẹ ebe efa nọ e ta kpahe oware nọ ma je fievahọ Ebaibol na, gbe epanọ mai gbe ahwo uviuwou mai ma sai ro fi ehrẹ Ebaibol na họ iruo evaọ uzuazọ. Hayo whọ sae jẹ ta kẹ Isẹri Jihova re a wuhrẹ Ebaibol na kugbe owhẹ.

​—Whọ rẹ ruẹ iku nana se evaọ obe Iruẹru Ikọ Na, Ahwo Ẹfẹsọs, Ahwo Filipai, Ahwo Kọlọsi, Filimọn, 1 Jọn, Eviavia.