Eware Iyoma E Da Oria Kpobi Fia!

A riẹ aye jọ nọ a re se Smita,a inọ ọ rrọ yoyou gaga. Ikpe 35 ọ jọ, yọ okpẹwho Dhaka evaọ orẹwho Bangladesh ọ jẹ rria. Aye na ọ jọ sasasa gaga, yọ ọ jẹ daoma rọ Ebaibol na fiobọhọ kẹ amọfa riẹ kpahe Ọghẹnẹ. U kri hi, o te kie ẹyao. Oware wọhọ ẹkpoka ọvo o te whu. Oware nana nọ o via na o kẹ imoni gbe egbẹnyusu Smita uye gaga.

Ọzae jọ nọ a re se James avọ aye riẹ nọ a kpako vrẹ ikpe 30 no, a wo ọkpọ uruemu nọ Smita o wo na re. Evaọ oke jọ, a te kpohọ obọ West Coast evaọ America nyae ruẹ egbẹnyusu rai jọ. A sai no erẹ na te uwou hu, keme nọ a jọ obei, a te wo asidẹnte nọ o wha uwhu se ai. Oware nana nọ o via na o wha uweri ulogbo se ahwo uviuwou rai, egbẹnyusu rai, gbe ahwo nọ a gbe je ru iruo.

Makọ oria kpobi nọ whọ rrọ kẹhẹ, whọ rẹ ruẹ nọ eyoma gbe uye-oruẹ o da fia. Ẹmo o bi kpe oghẹrẹ ahwo kpobi, te isoja te enọ e rrọ isoja ha. Makọ ahwo nọ a riẹ onahona ha, a be reoja fiki ozighi nọ ọ vọ oria kpobi. Te emaha te ekpako, te edafe te iyogbere, a bi whu fiki asidẹnte gbe oghẹrẹ eyao sa-sa. Okpẹtu nọ a rọ obọ so ho ọ be raha ewho jọ soso muotọ. Omohẹriẹ gbe okienyẹ e da oria kpobi fia. Ẹsejọhọ eware nana e via kẹ owhẹ no re.

Fikiere o thọ họ re a nọ enọ itienana:

• Fikieme eware iyoma e be rọ via kẹ ahwo owoma?

• Kọ Ọghẹnẹ ọ be wha eware nana ze?

• Kọ eware nana i bi mu via, manikọ ohwo-akpọ jọ ọ be wha ai ze?

• Kọ o sae jọnọ Karma?b

• Otẹrọnọ Ọghẹnẹ ọ ginẹ rrọ, fikieme ọ gbẹ rọ thọ ahwo owoma re eware iyoma e siọ ae ba ẹ via kẹ hẹ?

• Kọ uye-oruẹ avọ emuemu u ti kuhọ ẹdẹjọ?

Re ma sae kiyo enọ yena, u fo nọ ma re wo otoriẹ iyo enọ ivẹ nana: Fikieme eware iyoma e be tubẹ rọ via dede, kọ eme Ọghẹnẹ o ti ru kpahe onana?