“Eureka Drama” na U Fiobọhọ kẹ Ibuobu Duku Uzẹme Ebaibol

“EUREKA!” Otofa ẹme yena họ “Me duku ei no!” Evaọ etoke ikpe-udhusoi avọ 19 nọ ahwo a jẹ hai zurie nyae gwọlọ igoru evaọ obọ America, nọ ohwo ọ tẹ tọ ku ugoru o ve bo nọ, “Eureka!” Rekọ Charles Taze Russell avọ ibe Emọ-Uwuhrẹ Ebaibol riẹ a duku oware jọ nọ o ghare vi igoru kpekufiẹ, uzẹme Ebaibol. Yọ a jẹ gwọlọ nọ ahwo kpobi a riẹ kpahe iẹe.

Evaọ etoke uvewhru ọrọ ukpe 1914, ahwo buobu a jẹ hae jọ ikpewho ilogbo zurie nyai rri ifimu nọ a rẹ rọ euwa eree rri nọ Emọ-Uwuhrẹ Ebaibol na a ru nọ a re se “Photo-Drama of Creation.” Ifimu nana nọ a rọ ikuigbe Ebaibol ru na u wo iwoho nọ a ralọ wowoma, evuẹ gbe ikporakporo nọ a rekọdo fihọ iẹe, u dhesẹ ikuigbe sa-sa no oke emama rite ekuhọ Esuo Odu Ikpe Kristi.—Evia. 20:4.a

Kọ ahwo nọ a jẹ rria emewho esese gbe iwhre? Re ohwo kpobi ọ sai yo uzẹme Ebaibol na, evaọ Aria 1914, Emọ-Uwuhrẹ Ebaibol na a te ru ifimu ọsese ọfa jọ no orọ “Photo-Drama” na ze nọ a se “Eureka Drama,” onọ u wo abọ nọ a jọ dhesẹ edrama ha. Ifimu nana u wo eghẹrẹ esa nọ a ru fihọ evẹrẹ sa-sa. A re se ọjọ “Eureka X,” onọ u wo ovuẹ gbe ile nọ a rekọdo fihọ iẹe. Ofa kọ “Eureka Y,” onọ u wo ovuẹ, ile gbe iwoho nọ a fi ekọlọ sa-sa họ. Yọ a ru onọ a rẹ sai rri evaọ uwou, onọ a re se “Eureka Family Drama.” Onana u wo ovuẹ gbe ile egagọ nọ a so fihọ iẹe. Yọ a jẹ zẹ egramafonu gbe ẹkpẹti nọ a re ro dhesẹ ifimu na kẹ ahwo kuẹku.

Ababọ ẹkpẹti nọ a re ro dhesẹ isinima hayo ẹkpẹti-ughe ologbo, Emọ-Uwuhrẹ Ebaibol na a jẹ hai dhesẹ ifimu nana kẹ ahwo evaọ iwhre gbe emewho esese, a tẹ jẹ rọ ere wha ovuẹ Uvie na te ahwo oma evaọ ekwotọ ekpokpọ efa. A rẹ sai dhesẹ ọrọ “Eureka X” nọ u wo edo ikporakporo ọvo na evaọ aso hayo uvo. Yọ a rẹ sae rehọ ukpẹ nọ a rẹ rọ ekabade tu dhesẹ ọrọ “Eureka Y” na nọ ikpẹ ẹlẹtriki e gbẹ riẹ hẹ. Iyẹrẹ nọ i no uwou ogha obọ Finland ze e ta nọ: “Ma rẹ sai dhesẹ ifimu nana evaọ enwene oria kpobi.” Avro ọ rrọ ẹme yena ha.

Ukpenọ Emọ-Uwuhrẹ Ebaibol na a rẹ haya egwa isinima ilogbo, a jẹ ruẹ eria dhesẹ ifimu na ababọ ugho nọ a re mi ai. Eria wọhọ iwou isukulu, iwou ekọto, eria nọ itreni e rẹ kpahe, gbe otuwou ahwo nọ iwou rai e rrọ ruaro. Ẹsibuobu otafe a jẹ hae jọ dhesẹ ifimu na, a re thuru omohọ nọ a re ro rri ifimu na fihọ ehru agbada nọ a vi be rọ rawo ekakọ. Brọda Anthony Hambuch o kere nọ: “Ewhẹrẹ na a rẹ ruẹrẹ ite-ire họ udhu rai nọ ahwo a rẹ sae keria rri ifimu na.” Utu inievo nọ e jẹ hai dhesẹ “Eureka Drama” na kẹ ahwo a jẹ hae rọ akẹkẹ wha ekwakwa ikporakporo rai, ekpa, eware nọ a re ro kiẹzẹ gbe enọ a re ro there emu.

Ahwo nọ a jẹ hai rri “Eureka Drama” na a je dhe ebuebu. Evaọ ẹwho ọsese America jọ nọ ahwo udhuhrẹ gbe ikpe (150) a rrọ, ahwo nọ a kokohọ uwou isukulu ẹwho yena jọ je rri ifimu na a bu te egba ene (400). Evaọ eria efa, otu jọ ọ rẹ nya emaele isoi kpohọ oria nọ a be jọ dhesẹ ifimu na. Ahwo nọ a jẹ rria kẹle oniọvo obọ Sweden jọ nọ a re se Charlotte Ahlberg a kokohọ uwou riẹ rri ifimu na, yọ evuẹ nọ a rekọdo fihọ iẹe “i duobọte ae gaga.” Ahwo nọ a bu te odu ọvo gbe egba isoi (1,500) a kpohọ ẹwho jọ nọ a rẹ jọ tọ igoru evaọ Australia nyai rri ifimu na. Uwou-Eroro na o niyẹrẹ nọ evaọ isukulu ikpehru gbe ekọleji nọ a jọ dhesẹ ifimu na, “iwoho ifimu na gbe evuẹ nọ a rọ egramafonu kporo na e were profẹsọ gbe emọ isukulu na gaga.” Ahwo a riẹ ifimu “Eureka” na gaga, makọ evaọ eria nọ a rẹ jọ dhesẹ ifimu efa buobu.

U RU AHWO DUKU UZẸME NA

Emọ-Uwuhrẹ Ebaibol na a jẹ hai dhesẹ ifimu “Eureka” na okenọ a tẹ be kẹ evuẹ nọ a jẹ hai vi inievo sa-sa nyae kẹ, onọ a jẹ hai se “Class Extension Work” (Iruo Eklase na Efa). Ma riẹ unu ahwo kpobi nọ a rri “Eureka Drama” na ha. Itu ahwo nọ a je dhesẹ edrama na a jẹ hai dhesẹ iẹe ẹsikpobi. Ghele na evaọ ukpe 1915, itu 14 ọvo evaọ usu itu 86 a niyẹrẹ nọ a bi dhesẹ edrama na ẹsikpobi. Dede nọ a sae riẹ unu rai kpobi hi, iyẹrẹ urere ẹgbukpe yena i dhesẹ nọ ahwo nọ a rri ifimu na no a bu vrẹ ima ọvo (1,000,000). Yọ ahwo nọ a joma bu te idu ọgba (30,000) a yare nọ a kẹ ae ebe.

Ẹsejọhọ “Eureka Drama” na o rrọ oware nọ ahwo a be nwane kareghẹhọ tere he evaọ ikuigbe, rekọ ima ahwo buobu a rri ifimu nana evaọ Australia, Argentina, South Africa, ikoliko Britain, India, gbe ewho nọ e wariẹ Abade Caribbean họ. Ibuobu ahwo nana a duku uzẹme na nọ o ghare vi igoru, yọ a rẹ sai gine bo nọ, “Eureka!”