ENỌ AHWO NỌ A S’EBE
Kọ ẹme Devidi nọ ọ rrọ Olezi 37:25 gbe ẹme Jesu nọ ọ rrọ Matiu 6:33 na u dhesẹ nọ Jihova ọ rẹ kuvẹ re emu ọ kare Oleleikristi vievie he?
Devidi o kere nọ ọ re “ruẹ okiẹrẹe nọ a se he, hayo kọ emọ riẹ e jẹ yare re a tẹ re he.” Eware nọ e via kẹe i ru rie ta ẹme nana nọ o rẹ sai kiekpahe ohwo kpobi re na. Ọ riẹ nọ Ọghẹnẹ ọ rẹ rẹrote idibo riẹ ẹsikpobi. (Ol. 37:25) Ẹme Devidi na o dhesẹ hẹ inọ uvumọ oware o re kare odibo Ọghẹnẹ ẹdẹvo ho, hayo o te kare iẹe vievie he.
U wo etoke sa-sa nọ Devidi ọ rẹriẹ ovao dhe ebẹbẹ ilogbo. Ojọ rai họ, okenọ ọ jẹ rọ dhẹ fiki Sọl. Evaọ oke nana, emu nọ Devidi ọ wha lele oma ọ joma re no, fikiere ọ tẹ vuẹ Ahimẹlẹk inọ ọ kẹe ebrẹdi nọ ọyomariẹ avọ ahwo riẹ a rẹ re. (1 Sam. 21:1-6) Evaọ oke nana, Devidi ọ jẹ “yare” ebrẹdi nọ ọ rẹ re. Dede na, Devidi ọ riẹ nọ Jihova ọ rrọ kugbei. Evaọ uzẹme, ma re jọ oria ovo se he inọ Devidi ọ gbẹ hae yare emu hu, ohọo o hai ti kpei whu.
Evaọ obe Matiu 6:33, ma ruẹ imuẹro nọ Jesu ọ kẹ omai inọ Ọghẹnẹ ọ te rẹrote ẹgwọlọ idibo riẹ nọ e rehọ iruo Uvie na karo evaọ uzuazọ. Ọ ta nọ: “Wha kake guọlọ Uvie riẹ gbe [ẹrẹreokie] riẹ, eware enana kpobi [te emu, ame, gbe iwu] a reti fi ai họ kẹ owhai.” Dede na, Jesu ọ ta re nọ ukpokpoma o rẹ sai ru nọ ohọo u re ro kpe “imoni” riẹ. (Mat. 25:35, 37, 40) Ere o via kẹ Pọl ukọ na. Emu gbe ame ọ kare riẹ unuẹse buobu.—2 Kọr. 11:27.
Jihova ọ vuẹ omai nọ a te rọ idhere sa-sa kpokpo omai. Ọ sae kuvẹ re eware jọ e kare omai enẹna nọ ma be daoma dhesẹ nọ Setan yọ ọtọrue na. (Job 2:3-5) Wọhọ oriruo, ibe Ileleikristi mai jọ, wọhọ enọ a fihọ ega uye evaọ etoke esuo Nazi na, a ruẹ uye gaga no fiki ukpokpoma. Edhere jọ nọ a jẹ rọ lahiẹ inievo nana re a siobọno ẹrọwọ rai họ, ohọo nọ a je ro kpe ai. Inievo nọ i wo ẹrọwọ a je yoẹme kẹ Jihova ghele, yọ ọ jọ kugbe ai. Ọ kẹ rai uvẹ ruẹ uye yena, wọhọ epanọ ọ be kẹ Ileleikristi kpobi uvẹ ruẹ oghẹrẹ uye sa-sa na. Dede na, Jihova ọ rẹ rọ uketha kẹ idibo riẹ kpobi nọ e be ruẹ uye fiki odẹ riẹ. (1 Kọr. 10:13) Ma rẹ sae kareghẹhọ ẹme nọ ọ rrọ obe Ahwo Filipai 1:29, nọ o ta nọ: “A rehọ eriẹ kẹ owhai no nọ, fiki Kristi orọnikọ wha rẹ rọ ẹro suẹe ọvo ho, rekọ wha rẹ ruẹ uye fiki riẹ re.”
Jihova ọ ya eyaa nọ ọ te jọ kugbe idibo riẹ. Wọhọ oriruo, obe Aizaya 54:17 o ta nọ: “Ekuakua ẹmo ọvo nọ a gali vi owhai nọ i re wo iruo e [rrọ] họ.” Eyaa nana gbe itiena efa e kẹ omai imuẹro nọ Jihova ọ te thọ utu idibo riẹ. Dede na, ebẹbẹ e rẹ sai te omomọvo mai, onọ o rẹ sai su kpohọ uwhu dede.