Rẹro So Ẹzi Ọghẹnẹ Evaọ Eyeri Kugbe Inwene Uzuazọ

“Dawo oma re whọ sai ru oma ra wọhọ ọnọ a jẹrehọ no, obọ aro Ọghẹnẹ.”—2 TIMOTI 2:15.

1. Didi inwene e rrọ use-abọ kẹ emamọ edikihẹ abọ-ẹzi mai?

AKPỌ nọ ọ wariẹ omai họ na o bi dhe enwenwene. Epanọ ahwo a be nyaharo te evaọ otọkiẹ-eriariẹ gbe eware ikuo, ere uruemu ezi u bi kie kpotọ te. Wọhọ epanọ ma wuhrẹ evaọ uzoẹme nọ u kpemu na, Ileleikristi a re mudhe kẹ ẹzi akpọ nana nọ ọ wọso ọrọ Ọghẹnẹ na. Dede na, nọ akpọ na o bi nwene na, ma bi nwene re evaọ idhere buobu. Ma bi no ọmaha kpohọ ọkpako. Ma rẹ sai wo efe, omokpokpọ, gbe ahwo nọ ma you, hayo e rẹ sai vru mi omai. Ma rẹ sae kpọ inwene itieye na buobu hu, yọ e rẹ sae jọ use-abọ ologbo kẹ emamọ edikihẹ abọ-ẹzi mai.

2. Didi inwene Devidi ọ rẹriẹ ovao ku evaọ uzuazọ?

² Ahwo nọ uzuazọ rai u re nwene te orọ Devidi, ọmọ Jẹsi, a bu hu. Devidi o nwene idudhe no ohwo nọ a riẹ hẹ wọhọ othuru-igodẹ kpohọ ọnọ a jọ oria kpobi riẹ wọhọ ọgba orẹwho soso. Uwhremu na o te ti zihe ruọ ọnọ o je ghoro fiki ovie ihrieriọ jọ nọ o je lei no oria ruọ oria. Oyena o vrẹ no, Devidi o te ti zihe ruọ ovie gbe ọnọ o fi kparobọ. O thihakọ uye edada nọ uzioraha ulogbo o wha ze. Ọ ruẹ uye okpẹtu gbe ẹwhọ evaọ uviuwou riẹ. O wo efe, kpako, jẹ ruẹ edada owho. Dede na, ghelọ inwene buobu evaọ uzuazọ riẹ, Devidi o fi eva họ Jihova gbe ẹzi Riẹ rite uwhu. Ọ daoma re ọ jọ ‘ọnọ Ọghẹnẹ ọ rẹ jẹrehọ,’ yọ Ọghẹnẹ ọ ghale riẹ. (2 Timoti 2:15) Dede nọ iyero mai i wo ohẹriẹ no erọ Devidi, ma rẹ sai wuhrẹ no owọ nọ ọ jẹ evaọ otọ iyero sa-sa ze. Oriruo riẹ o sai fi obọ họ k’omai wo otoriẹ epanọ ma rẹ sae rọ ruabọhọ ewo obufihọ ẹzi Ọghẹnẹ nọ ma be rẹriẹ ovao ku inwene evaọ uzuazọ mai na.

Omarokpotọ Devidi—Emamọ Oriruo

3, 4. Ẹvẹ Devidi o ro zihe no othuru-igodẹ nọ a riẹ hẹ ruọ ọgba orẹwho soso?

³ Wọhọ ọmọzae, Devidi ọ viodẹ hẹ makọ evaọ uviuwou riẹ. Okenọ Samuẹle ọruẹaro na ọ ziọ Bẹtlẹhẹm, ọsẹ Devidi ọ rehọ emezae ihrẹ riẹ lahwe. Ọ nya siọ Devidi nọ ọ jọ ọmọzae ọmaha kpobi ba re ọ rẹrote igodẹ na. Ghele na, Jihova ọ salọ Devidi no re ọ jọ ovie obaro ọrọ Izrẹl. A se Devidi no obọ ẹwọ ze. Kẹsena, wọhọ epanọ Ebaibol na e ta: “Samuẹle ọ tẹ rehọ onware ewhri na, o te wholo iei evaọ iraro inievo riẹ na. No umuo ẹdẹ ọyena vrẹ Ẹzi ỌNOWO na ọ tẹ ruọ oma Devidi ruaro.” (1 Samuẹle 16:12, 13) Devidi ọ rẹro so ẹzi ọyena evaọ edẹ uzuazọ riẹ kpobi.

⁴ A te jọ orẹwho na soso riẹ othuru-igodẹ nana obọnana. A zizie i rie re ọ gbodibo kẹ ovie na je kporo ile kẹe. O kpe Goliat ọgbaẹmo na, ọgwara nọ o wo idudu te epanọ makọ egbaẹmo Izrẹl nọ i fiẹmo n’otọ ze a rọ dhozọ riẹ. Okenọ a rehọ iẹe mu uzou egbaẹmo Izrẹl kpobi, Devidi o fi ahwo Filistia na kparobọ. Ahwo a you rie. A so ile nọ a ro jiri ei. Ọkohrẹ jọ ọrọ Sọl Ovie na o dhesẹ Devidi ọmoha na no vẹre orọnikọ wọhọ “ọnọ ọ riẹ ekporo” urete ọvo ho rekọ jẹ wọhọ “ọgba, ohwo ẹmo, [ọnọ] o wo areghẹ ẹme, ohwo nọ o wo eru.”—1 Samuẹle 16:18; 17:23, 24, 45-51; 18:5-7.

5. Eme e hẹ sai ru Devidi wọ oma kpehru, kọ ẹvẹ ma rọ riẹ nnọ o ru ere he?

⁵ Odẹ, erru, uzoge, unutẹmeta, ona ikporakporo, ona ẹmo, aruoriwo Ọghẹnẹ—o wọhọ nnọ Devidi o wo rai gba. Ekwakwa nana e hai ru ei fu uke, rekọ o fu uke he. Muẹrohọ ẹme nọ Devidi ọ kpahe kẹ Sọl Ovie na, ọnọ ọ rehọ ọmọtẹ riẹ kẹ Devidi rọo. Avọ uvi omarokpotọ, Devidi ọ ta nọ: “Eme mẹ rọ, gbe imoni mẹ, gbe uviuwou ọsẹ mẹ eva Izrẹl nọ omẹ jẹ jọ ọgọ ovie?” (1 Samuẹle 18:18) Nọ ọ jẹ t’ẹme kpahe owọ Ebaibol nana, ọwena-isukulu jọ o kere nọ: “Otofa eme Devidi na họ, ọ ruẹ nọ makọ oghẹrẹ ohwo nọ ọ rrọ, hayo epanọ odẹ riẹ u do te, hayo uyẹ nọ o no ze, i ru rie wọ oma kpehru hu nnọ ọye o te ohwo nọ ọ rẹ jọ ọgọ ovie na.”

6. Fikieme ma je wo omarokpotọ?

⁶ Oware nọ o lẹliẹ Devidi wo omarokpotọ họ ọ riẹ inọ Jihova o kpehru gaga vi ahwo-akpọ sebaẹgba evaọ edhere kpobi. U gbe Devidi unu inọ Ọghẹnẹ o bi muẹrohọ ohwo-akpọ. (Olezi 144:3) Devidi ọ tẹ jẹ riẹ inọ oruaro nọ o wo no kpobi i te rie obọ fikinọ Jihova o dhesẹ omarokpotọ, o hrẹ oma kpotọ re ọ sẹro riẹ jẹ thọe. (Olezi 18:35) Ẹvẹ onana o rrọ emamọ uwuhrẹ k’omai te! Ẹgba mai, eware nọ ma le t’obọ no, gbe uvẹ-ọghọ mai i re ru omai fu uke he. Pọl ukọ na o kere nọ: “Eme wha wo nọ orọ oware nọ wha mi hi? Otẹrọnọ wha mi ei, eme wha jẹ be ya oma wọhọ ẹsenọ o rọ okẹ hẹ?” (1 Ahwo Kọrint 4:7) Re ma wo ẹzi ọfuafo Ọghẹnẹ jẹ reawere ọjẹrehọ riẹ, ma re wo jẹ yọrọ omarokpotọ hrọ.—Jemis 4:6.

‘Wha Kioja kẹ Oma Rai Hi’

7. Didi uvẹ nọ o re ro kpe Sọl Ovie na u rovie fihọ kẹ Devidi?

⁷ Dede nọ epanọ a riẹ Devidi te o lẹliẹ e riẹ fu uke he, o lẹliẹ Sọl Ovie na, ọnọ ẹzi Ọghẹnẹ o no oma no, riẹe ihri yoyoma. Dede nọ Devidi o ru uvumọ oware thọ họ, ọ dhẹ kẹ uzuazọ riẹ jẹ rria igbrẹwọ. Evaọ okejọ, nọ o je le Devidi no oria ruọ oria, Sọl Ovie na ọ rueva eghogho jọ, ọ riẹ hẹ inọ Devidi avọ ahwo riẹ a dhere etẹe. Ahwo Devidi a tẹ ta kẹe inọ o wọhọ nnọ Ọghẹnẹ ọ rehọ uzuazọ Sọl họ iẹe obọ no re o kpei. Dai roro epanọ o jọ evaọ ebi nọ a jọ na, nọ a bi se ẹme họ Devidi ezọ nọ: “Nẹnẹ na họ ẹdẹ nọ ỌNOWO na ọ ta kẹ owhẹ nọ, ‘Ri, mẹ rẹ te rehọ ọwegrẹ ra họ obọ ra, who ve ru ei epanọ ujowhẹ.’ ”—1 Samuẹle 24:2-6.

8. Fikieme Devidi ọ rọ gba oma riẹ re ọ se oja ba ẹkiẹ?

⁸ Devidi ọ rọwo inọ ọ rẹ nwa Sọl oma ha. Avọ ẹrọwọ gbe odiri, o vọ riẹ eva re ọ nya siọ eware kpobi ba obọ Jihova. Nọ ovie na o no eghogho na no, Devidi o te bo sei ta nnọ: “Jọ ỌNOWO na ọvo o bruoziẹ mẹ avọ owhẹ, re ỌNOWO na ọvo ọ jẹ kioja mẹ evaọ abọ ra, rekọ mẹ sae rehọ obọ mẹ te owhẹ hẹ.” (1 Samuẹle 24:12) Dede nọ ọ riẹ nnọ Sọl o ruthọ, Devidi ọ kioja kẹ oma riẹ hẹ; yọ ọ kpahe eme iyoma kẹ Sọl hayo ta eme iyoma riẹ evaọ emu hu. Evaọ unuẹse buobu, Devidi ọ gba oma riẹ re ọ se oja ba ẹkiẹ. Ukpoye, ọ rẹro so Jihova re ọ kpọ eware vi.—1 Samuẹle 25:32-34; 26:10, 11.

9. Fikieme ma gbe ro ru kele he nọ ma tẹ nyaku ọkparesuọ hayo ukpokpoma?

⁹ Wọhọ Devidi, whọ rẹ sae ruẹ oma ra evaọ iyero ebẹbẹ. Ẹsejọhọ ibe emọ-isukulu a be wọso owhẹ hayo kpokpo owhẹ dede, ibe enọ wha gbẹ rrọ iruo, ahwo uviuwou, hayo amọfa nọ wha gbẹ rrọ egagọ evona ha. Who ru kele he. Hẹrẹ Jihova, yare ẹzi ọfuafo riẹ re o fi obọ họ k’owhẹ. Ẹsejọhọ uruemu ezi ra o ti duobọ te enọ e rọwo ho na a ve ti kurẹriẹ. (1 Pita 3:1) Epanọ u kie fihọ kpobi, riẹ nọ Jihova ọ be ruẹ uyero ra yọ o ti ru oware jọ kpahe iẹe evaọ ẹruoke riẹ. Pọl ukọ na o kere nọ: “Iyoyou, whai ọvo a kioja kẹ oma rai hi, rekọ wha vueiwa kẹ ofu Ọghẹnẹ; keme a kere nọ, ‘Orukele na ọmẹ, me re ru kele, ere Ọnowo ọ tare.’ ”—Ahwo Rom 12:19.

‘Kezọ kẹ Uthubro’

10. Ẹvẹ Devidi o ro kie ruọ uzioraha, kọ ẹvẹ ọ rọ daoma ruru uzioraha na?

¹⁰ Ikpe buobu e ruọ emu no. Devidi o te ti zihe ruọ ovie oyoyou nọ a riẹ gaga. Edhere uzuazọ riẹ wọhọ ohwo nọ o wo ẹrọwọ ziezi, avọ ilezi iwowoma nọ o kere ro jiri Jihova, e rẹ sai ru omai roro vẹrẹ inọ ọzae nana ọ sai kie ruọ uzioraha ulogbo ho. Ghele na, o kie. Ẹdẹjọ, ovie na ọ jọ ehru uwou riẹ ruẹ aye owowoma jọ nọ ọ be họ. Ọ tẹ nọ kpahe aye na. Nọ o yo nnọ Batshẹba họ aye na gbe nnọ Uraya ọzae riẹ ọ rrọ obọ ẹmo, Devidi o te vi uwou se aye na, o te lele ei wezẹ. Uwhremu na, o te yo nọ aye na o dihọ. Ẹme na o te do lahwe, yọ odẹ riẹ o raha muotọ no! Evaọ otọ Uzi Mosis, a re kpe ahwo nọ a bruẹnwae. Ẹsejọhọ ovie na o roro nọ ọ sai ruru uzioraha na. Fikiere o te vi uwou kpohọ obonọ a bi jo fi ẹmo na, kẹ udu inọ Uraya o zihe ziọ Jerusalẹm. Devidi o roro nọ Uraya ọ te nya i kiẹzẹ kugbe Batshẹba, rekọ o via ere he. Fikinọ oware na o be yagha iẹe asọ no, Devidi o te vi Uraya zihe kpohọ obọ ẹmo na avọ ileta ro se Joab, oletu ẹmo na. Ileta na e ta nnọ a fi Uraya họ oria nọ o re jo whu fihọ ẹmo na. Joab o te ru epanọ a ta kẹe, a te kpe Uraya. Nọ Batshẹba o weri ọzae riẹ no, Devidi ọ tẹ rehọ iẹe.—2 Samuẹle 11:1-27.

11. Didi iku Netan o gbe kẹ Devidi, kọ didi ẹme Devidi ọ kpahe?

¹¹ O wọhọ nọ o fi ẹmo na t’uwou no, dede nnọ Devidi ọ hae riẹ inọ ẹme na kpobi o kpe fihọ kẹ Jihova. (Ahwo Hibru 4:13) Nọ emerae buobu e vrẹ no, aye na o te ti yẹ ọmọ na. Kẹsena Ọghẹnẹ o te vi Netan bru Devidi. Ọruẹaro na o te gbiku ọdafe jọ nọ o wo igodẹ buobu rekọ o te kpe ogodẹ ọvo oyegbere jọ nọ oyogbe na o you gaga. Iku na e nwane lẹliẹ Devidi riẹ nnọ ọdafe na o ru thọ, rekọ ọ riẹ nnọ ẹme na o wo otofa ha. O te brukpe ọdafe na ovavo. Avọ ofu, ọ ta kẹ Netan nọ: “Ohwo nọ o ru oware onana o re whu hrọ.”—2 Samuẹle 12:1-6.

12. Didi oziẹ Jihova o ro brukpe Devidi?

¹² Ọruẹaro na o te yo nọ: “Whẹ họ ohwo na.” Devidi o gu omobọ riẹ ẹdhọ no. Ababọ avro, eva nọ e jẹ dha Devidi na i te zihe ruọ omovuọ gbe uweri ogaga. O te whu dhe oria-ovo jẹ gaviezọ nọ Netan ọ be fodẹ ẹdhoguo Jihova nọ a rẹ dhẹ vabọ no ho na. Ọ fodẹ uvumọ ẹme omosasọ hayo ọbọga ha. Devidi ọ la ẹme Jihova vrẹ ẹkwoma oware uyoma nọ o ru. Kọ ogbẹrọ nọ ọgbọdọ ọwegrẹ o ro kpe Uraya? Ọgbọdọ o re ti no uwou Devidi hi. Kọ ogbẹrọ nọ evaọ idhere ọ jọ lele aye Uraya wezẹ? Oware ovona o te via kẹe, orọnikọ evaọ idhere he, rekọ evaọ ẹgbede.—2 Samuẹle 12:7-12.

13. Didi owọ Devidi ọ jẹ kpahe ọwhọkuo Jihova?

¹³ Oware nọ Devidi ọ riẹ ru họ, ọ gbenu hu. Ọ vare ku Netan ọruẹaro na ha. Ọ fo amọfa hayo gu inoma jọ kpahe oware nọ o ru na ha. Nọ a dhesẹ izieraha riẹ kẹe no, Devidi ọ rọwo oware nọ o ru, ta nọ: “Mẹ raha uzi ỌNOWO na.” (2 Samuẹle 12:13) Olezi avọ 51 o dhesẹ oviẹ nọ ọ viẹ fiki abe-ọriọ riẹ gbe epanọ o kurẹriẹ te. Ọ lẹ Jihova nọ: “Who le omẹ no aro ra ha, who mi omẹ ẹzi ẹri ra gbe he.” Ọ riẹ inọ Jihova, evaọ ohrọoriọ riẹ, o re gbolo ovao kẹ ‘ẹzi nọ ọ rrọ ọkora avọ uweri’ fiki uzioraha ha. (Olezi 51:11, 17) Devidi o gbe je fi eva họ ẹzi Ọghẹnẹ. Dede nọ Jihova ọ ko Devidi dhere no ebẹbẹ nọ i no uzioraha riẹ ze he, ọ rrọ vrẹ riẹ.

14. Ẹvẹ ma rẹ rehọ ọwhọkuo Jihova?

¹⁴ Mai kpobi ma gba ha, mai kpobi ma rẹ raha uzi. (Ahwo Rom 3:23) Ẹsejọ ma rẹ sai kie ruọ uzioraha ulogbo, wọhọ epanọ o via kẹ Devidi na. Wọhọ epanọ ọsẹ oyoyou ọ rẹ whọku emọ riẹ na, ere Jihova ọ rẹ kpọ enọ e be gwọlọ iẹe gọ vi. Dede nọ ọwhọkuo ọ rẹ kẹ erere, o rọ bẹbẹ re a jẹe rehọ. Evaọ uzẹme, ọ rẹ sae wha ‘ọkora’ ze ẹsejọ. (Ahwo Hibru 12:6, 11) Ghele na, ma tẹ ‘kezọ kẹ uthubro,’ ma rẹ sae ruẹrẹhọ kugbe Jihova. (Itẹ 8:33) Re ma gbẹ reawere eghale ẹzi Jihova, ma rẹ jẹ ọkpọvio rehọ jẹ daoma re Ọghẹnẹ ọ jẹ omai rehọ.

Who Fi Eva họ Efe nọ O Muẹro ho Ho

15. (a) Idhere vẹ ahwo jọ a rẹ rọ raha efe rai? (b) Ẹvẹ o jọ Devidi oma nnọ ọ rẹ rọ raha efe riẹ?

¹⁵ Uvumọ oware u dhesẹ hẹ inọ Devidi ọ jọ okpohwo vẹre hayo inọ uviuwou ọdafe o no ze. Dede na, Devidi o fe gaga evaọ okenọ ọ jọ ovie. Wọhọ epanọ whọ riẹ, ahwo buobu a rẹ gba efe rai yaoma, rehọ oriobọ gwọlọ fe viere, hayo keke obọ raha ugho. Amọfa a rẹ rehọ igho rai kẹ omobọ rai orro. (Matiu 6:2) Devidi ọ raha igho riẹ evaọ idhere nana ha. Ọ gwọlọ kẹ Jihova ọghọ. Devidi ọ ta kẹ Netan inọ ọ gwọlọ bọ etẹmpol kẹ Jihova re ọ wọ etehe ọvọ na họ eva riẹ, onọ o jọ “uwou-udhu” evaọ Jerusalẹm. Ẹjiroro Devidi ọ were Jihova, rekọ ọ rehọ ẹkwoma Netan ta kẹe inọ Solomọn, ọmọ Devidi, ọye họ ọnọ ọ te bọ etẹmpol na kẹe.—2 Samuẹle 7:1, 2, 12, 13.

16. Didi eware Devidi ọ ruẹrẹhọ kẹ ebabọ etẹmpol na?

¹⁶ Devidi o koko ekwakwa nọ a te rọ bọ uwou ologbo na họ. Devidi ọ ta kẹ Solomọn nọ: “Eva uye gaga me ro koko eware rọ kẹ uwou Ọnowo na, odu talẹnt udheusoi erọ igoru, ima isiliva eroo gbe itehru nọ a sae wawe ho; keme ije buobu; ire gbe itho me koko kpahe i re. Enana who re kugbe.” Igho nọ Devidi ọ zọhọ no ẹkpa riẹ ze i bu te talẹnti igoru 3,000, talẹnti isiliva 7,000.a (1 Iruẹru-Ivie 22:14; 29:3, 4) Orọnikọ Devidi ọ rehọ eware nọ ọ zọhọ na dhesẹ oma ha, rekọ i dhesẹ ẹrọwọ gbe omarọkẹ Jihova Ọghẹnẹ. Bi dhesẹ nnọ ọ riẹ Ọnọ ọ kẹ riẹ efe, ọ ta kẹ Jihova nọ: “Eware kpobi obọ ra i noze, gbe e rọ obọ ra ma rọ kẹ owhẹ.” (1 Iruẹru-Ivie 29:14) Udu ọghoruo Devidi o wọ riẹ ru utho nọ ọ rẹ sai ru kpobi evaọ ẹwhaharo egagọ efuafo.

17. Ẹvẹ ohrẹ nọ o rrọ 1 Timoti 6:17-19 u ro kie kpahe edafe gbe iyogbere?

¹⁷ Epọvo na re, joma rehọ efe mai ru oware ezi. Ukpenọ ma re yeri uzuazọ ilale efe, o rẹ mai woma re ma gwọlọ ọjẹrehọ Ọghẹnẹ—oye họ uvi areghẹ gbe evawere. Pọl o kere nọ: “Enọ e jọ akpọ fe, vẹvẹ ai unu re a siọ oma ba ẹvia, a siọ ẹro ba ẹrọkpahọ efe nọ o muẹro ho, rekọ a rẹro kpahe Ọghẹnẹ ọnọ ọ be rehọ eware kpobi nọ e rẹ kẹ evawere kẹ omai. U fo re a he ru ewoma re a fe eva iruo iwoma, eva efuafo avọ ọghọ-oruo; ere oruo a re ro fi otọhotọ uwoma họ kẹ oma rai be hẹrẹ obaro, re uzuazọ nọ o ghine rọ uvi uzuazọ o ruẹse te ae obọ.” (1 Timoti 6:17-19) Epanọ ma fe hayo yogbe te kẹhẹ, joma rẹro so ẹzi Ọghẹnẹ je yeri uzuazọ nọ u ti ru omai “fe obọ Ọghẹnẹ.” (Luk 12:21) Uvumọ oware o ghare vi emamọ edikihẹ nọ ma re wo kugbe Ọsẹ oyoyou obọ odhiwu mai hi.

Jọ Ọnọ Ọghẹnẹ Ọ rẹ Jẹrehọ

18. Edhere vẹ Devidi o ro fi emamọ oriruo họ kẹ Ileleikristi?

¹⁸ Evaọ uzuazọ riẹ kpobi, Devidi ọ gwọlọ ọjẹrehọ Jihova. Evaọ ole, ọ so nọ: “Ọghẹnẹ, ohrọ mẹ o re owhẹ, ohrọ mẹ o re owhẹ, keme whẹ họ oria adhẹzọ mẹ.” (Olezi 57:1) Eva nọ o fi họ Jihova e jọ uvrẹvru hu. Devidi ọ who, ‘ọ kpako ziezi.’ (1 Iruẹru-Ivie 23:1) Dede nọ Devidi o ru iruthọ ilogbo, a be kareghẹhọ iẹe wọhọ omọvo isẹri Ọghẹnẹ buobu nọ i dhesẹ obọdẹ ẹrọwọ.—Ahwo Hibru 11:32.

19. Ẹvẹ ma sai ro dhesẹ oma mai wọhọ enọ Ọghẹnẹ ọ jẹrehọ?

¹⁹ Nọ whọ be rẹriẹ ovao ku edawọ ebẹbẹ evaọ uzuazọ na, kareghẹhọ inọ wọhọ epanọ Jihova ọ thọ Devidi, kẹe ẹgba jẹ kpọe vi na, Ọ rẹ sai ru epọvo na k’owhẹ. Wọhọ Devidi, Pọl ukọ na ọ rẹriẹ ovao ku inwene buobu evaọ uzuazọ. Ghele na, o kru ẹrọwọ riẹ re ẹkwoma ẹrorọsuọ ẹzi Ọghẹnẹ. O kere nọ: “Mẹ rẹ sai ru eware kpobi eva ọnọ ọbe kẹ omẹ eri.” (Ahwo Filipai 4:12, 13) Ma tẹ rẹro so Jihova, o ti fi obọ họ k’omai kparobọ. Ọ gwọlọ re ma kparobọ. Ma tẹ gaviezọ kẹe je si kẹle iẹe, ọ te k’omai ẹgba nọ ma re ro ru oreva riẹ. Yọ ma tẹ gbẹ rẹro so ẹzi Ọghẹnẹ, ma te gbẹ ‘sai ru oma mai wọhọ enọ Ọghẹnẹ ọ rẹ jẹrehọ’ enẹna gbe bẹdẹ bẹdẹ.—2 Timoti 2:15.

[Oruvẹ-obotọ]

Ẹvẹ Whọ te k’Uyo?

• Ẹvẹ ma sae rọ yọrọ oma kẹ omoya?

• Fikieme ma gbẹ rọ kioja kẹ oma mai hi?

• Didi eriwo ọwhọkuo u fo nọ ma re wo?

• Fikieme ma re ro fi eva họ Ọghẹnẹ orọnikọ efe he?

[Uwoho nọ o rrọ ẹwẹ-obe avọ 24]

Devidi ọ rẹro so ẹzi Ọghẹnẹ jẹ gwọlọ ọjẹrehọ riẹ. Kọ who bi ru epọvo na?

[Uwoho nọ o rrọ ẹwẹ-obe avọ 26]

“Eware kpobi obọ ra i noze, gbe e rọ obọ ra ma rọ kẹ owhẹ”