Ọ Ruẹ nọ Uyoyou O Da Oria Emuọriọ na Fia

OWARE jọ nọ o be hae kẹ omai evawere gaga evaọ egagọ mai họ, ma tẹ rrọ ikokohọ ilogbo be gaviezọ kẹ iwuhrẹ Ọghẹnẹ. Yọ idibo Jihova a te kokohọ oke utiona kẹ ewuhrẹ ẹme riẹ, ẹsibuobu emu nọ ma rẹ re kugbe u re fiba evawere na.

Evaọ Azie 1919, Emọ-Uwuhrẹ Ebaibol na a ru okokohọ ologbo edẹ eree jọ evaọ Cedar Point, Ohio, obọ America. A ru ọruẹrẹfihotọ kugbe ehọtẹle sa-sa re a kẹ inievo nọ e ziọ okokohọ na iwou je there emu kẹ ae, rekọ inievo nọ e nyaze i bu vi epanọ a rẹro riẹ kpekufiẹ. Fikinọ ogbotu na o bu vrẹta, u ru nọ iruiruo ehọtẹle na buobu nọ e rẹ wọ emu kẹ ahwo a rọ rehọ oma hayo dhẹ fiki ozọ iruo na. Ohwo nọ o wuzou ehọtẹle na ọ tẹ nọ inievo na sọ otu rai jọ nọ e gbẹ rrọ izoge a sae fialoma via re a fiobọhọ, ibuobu inievo na a tẹ ginẹ fialoma via. Oniọvo-ọmọtẹ jọ nọ a re se Sadie Green ọ jọ usu rai. Ọ ta nọ: “Oyena o jọ orọ ọsosuọ nọ me ro ru iruo nana, rekọ ma reawere riẹ gaga.”

Ikpe buobu nọ i lele i rie, ọruẹrẹfihotọ nọ ukoko u ru nọ a jẹ hai ro there emu kẹ inievo na evaọ etoke okokohọ u ru nọ inievo buobu e jẹ hae rọ rehọ evawere fialoma via re a fiobọhọ kẹ inievo rai. Ibe Ileleikristi rai nọ a je ru iruo kugbe na u ru nọ izoge jọ buobu a ro fi itee sa-sa họ kẹ omarai evaọ ukoko na. Gladys Bolton ọ jọ usu inievo nọ i ru iruo evaọ oria emuọriọ ọrọ okokohọ ubrotọ jọ nọ a ru evaọ ukpe 1937. Ọ ta nọ: “Mẹ nyaku inievo nọ i no eria efa sa-sa ze, yọ a jẹ ta kpahe epanọ a be sai ro fi ebẹbẹ rai kparobọ. Ẹsiẹe me ro mu iroro iruo ọkobaro họ ewo.”

Oniọvo-ọmọtẹ jọ nọ a re se Beulah Covey nọ ọ ziọ okokohọ na ọ ta nọ: “Oghẹrẹ nọ inievo na a roma kẹ iruo na te u ru nọ eware na kpobi e jẹ rọ nya kpatiẹ.” Dede na, iruo na i wo ẹkẹ use-abọ rai. Wọhọ oriruo, okenọ a ru okokohọ jọ evaọ ogege arozaha nọ a re se Dodger Stadium, obọ Califonia evaọ ukpe 1969, oniọvo-ọmọzae jọ nọ a re se Angelo Manera nọ a ro mu re ọ rẹrote oria emu na ọ riẹ hẹ inọ a kẹ riẹ iruo nana, ọ nyaze okokohọ na no taure ọ tẹ te riẹ. Ọ ta nọ: “Me whu dikihẹ okenọ a vuẹ omẹ.” Ọkpọ egase nọ a tọ fihọ oria nọ u thabọ te oware wọhọ ubro emaele kpohọ oria ẹbẹ-othere na o jọ abọjọ ọruẹrẹfihotọ nọ a ru taure okokohọ na o te ti muhọ.

Evaọ okokohọ jọ nọ a jọ Sierra Leone ru evaọ ukpe 1982, inievo na a kake gbẹ oria nọ a te jọ ru okokohọ na kẹsena a tẹ bọ oria emuọriọ. Evaọ ukpe 1951, inievo jọ nọ i wo onaa ziezi a haya ẹjini itreni jọ nọ a je ro there ame evaọ ekẹtoro nọ i bu te udhuvẹ ẹsiẹvo evaọ obọ Frankfurt, Germany. Evaọ auwa ọvo, inievo na a wọ emu kẹ ahwo nọ a bu te idu ọgba (30,000) soso. Inievo jọ a wha igẹji gbe emegha obọrai ze re iruo na e dina lọhọ kẹ inievo egba isoi gbe udhosa gbe ikpegbezeza (576) nọ e jẹ wozẹ imidhe na. Evaọ ẹwho Yangon obọ Myanmar, u wo eware sa-sa nọ i re ru emu dha, rekọ ororokẹ o ru nọ inievo nọ i je there emu a je ro fi umutho rai ọvo họ emu na fiki inievo nọ i no erẹwho efa ziọ okokohọ na.

“A BE JỌ EDIKIHẸ RE EMU”

Evaọ okokohọ jọ nọ a jọ America ru evaọ ukpe 1950, oniọvo-ọmọtẹ jọ nọ a re se Annie Poggensee o dikihẹ uhie uthethei evaọ oria nọ a rẹ jọ re emu avọ uvo ogaga nọ o jẹ rowo, yọ onana o wha erere jọ sei. Ọ ta nọ: “Iku nọ inievo-emetẹ ivẹ jọ nọ e ruọ okọ no obọ Europe ze a je gbe kẹ ohwohwo e daruọ omẹ oma.” Aimava na a jẹ ta kpahe epanọ Jihova o ro fiobọhọ kẹ ae ziọ okokohọ na. Annie ọ ta re nọ: “Eva e jẹ were inievo-emetẹ ivẹ nana vi omọfa kpobi nọ ọ jariẹ. A jẹ tubẹ daezọ uvo ogaga nọ o jẹ rowo gbe uhie uthethei nọ a dikihẹ na ha.”

Evaọ ikokohọ ilogbo buobu, iwou nọ a bọ nọ a rẹ jọ re emu i wo emẹjẹ nọ i kpehru gaga, onọ o gwọlọ nọ a rẹ jọ dikihẹ re emu re uvẹ o sai rovie kẹ amọfa vẹrẹ. O gbẹ rrọ ere he, uvẹ o te jariẹ nọ ahwo buobu a te sae rọ re emu evaọ omoke eriosehọ nọ a wo na ha. Ọzae obọ akpọ jọ nọ ọ ziọ okokohọ na ọ ta nọ: “Egagọ nana i gbunu kẹhẹ. A be jọ edikihẹ re emu.”

Oghẹrẹ nọ inievo na a je ru eware kpobi kpatiẹ u je gbe isu isoja gbe ahwo egọmeti unu. Evaọ okokohọ jọ nọ a ru evaọ Yankee Stadium evaọ ẹwho New York, osu ogbaẹmo America jọ ọ romatotọ rri oria nọ a rẹ jọ re emu na kpobi, kẹsena ọ tẹ ta kẹ osu ogbaẹmo England nọ a re se Faulkner inọ ọ nyae ruẹ kẹ omariẹ. Fikiere Faulkner avọ aye riẹ a tẹ ziọ okokohọ nọ a jọ ẹwho Twickenham, obọ England ru evaọ ukpe 1955, yọ uzoẹme okokohọ na họ “Triumphant Kingdom” (Uvie nọ O be Kparobọ). Ọ ta nọ uyoyou nọ inievo na a wo kẹ ohwohwo oye u ru nọ eware kpobi e be rọ riẹ nya kpatiẹ na.

Evaọ etoke ikpe buobu, inievo sa-sa a rọ unevaze fialoma via je there emu kẹ inievo nọ e ziọ okokohọ. Rekọ re a sai ru iruo nana, o rẹ gwọlọ nọ inievo buobu a rẹ fialoma via je ru iruo euwa buobu, yọ ẹsejọ dede a rẹ sae tubẹ reawere abọjọ hayo oma okokohọ na soso ho. Evaọ ubrobọ ekuhọ ikpe 1970, a gbe je there emu bu te epaọ anwẹdẹ hẹ evaọ ikokohọ buobu. Kẹsena, no ukpe 1995 vrẹ, a tẹ ta nọ ohwo kpobi ọ hae wha emu obọriẹ ziọ okokohọ. Onana u ru nọ inievo buobu nọ e jẹ hai there jẹ wọ emu kẹ ahwo e be sae rọ reawere ikokohọ gbe omakugbe ibe Ileleikristi rai.a

Avro ọ riẹ hẹ, inievo yena nọ e jẹ hae ruẹ uye there emu kẹ ibe Ileleikristi rai na a rrọ ghaghae evaọ aro Jihova. Oma o rẹ sae jọ ejọ rai nọ dodokọ a gbe bi ru iruo evawere yena. Dede nọ ọruẹrẹfihotọ yena ọ gbẹ rrọ họ, oware nana u muẹro: Uyoyou o gbẹ rrọ ugogo oware nọ ma be reawere riẹ evaọ ikokohọ mai.—Jọn 13:34, 35.