Ezọgaviẹ kẹ Unuovẹvẹ O rẹ Sai Siwi Uzuazọ Ra!

EVAO edẹ 26 amara Akpegbivẹ evaọ ukpe 2004, otọ u nuhu gaga evaọ ukoliko Simeulue nọ o kẹle ẹwho Indonesia. Ahwo kpobi nọ a jọ akotọ abade Simeulue a tẹ tẹrovi abade na kiọkiọkiọ. Ame abade na ọ jẹ kpọ vẹrẹ vi epanọ ọ rẹ kpọ te vẹre. Ẹsiẹvo na ahwo kpobi a te mu obọ igbehru họ ẹdhẹ kpohọ je bi bo nọ, “Smong! Smong!” koyehọ epanọ a re se ẹkporo ologbo nọ ọ be wọ ze. Oware wọhọ iminiti 30 ọvo, ẹkporo na ọ tẹ wọ ruọ eria kpobi nọ e kẹle abade na jẹ raha iwou gbe iwhre nọ e kẹle oyena.

Ukoliko Simeulue họ oria nọ ẹkporo na ọ kake tehe. Ghele na imahrẹ ọvo a whu evaọ usu ahwo idu udhosa gbe ikpegberee (78,000) nọ e be rria ukoliko na. Fikieme ahwo buobu a rọ zọ?a Ẹme jọ nọ ahwo nọ a be rria ukoliko na a rẹ ta họ: ‘Otọ u te nuhu, ame abade na ọ jẹ kpọ vi epanọ ọ rẹ kpọ te vẹre, dhẹ kpobọ igbehru keme abade na ọ te wọ ze ẹsiẹvo.’ Fikinọ oware nana o via kẹ ahwo Simeulue gaga no, a rẹ rọ ame abade na riẹ nọ ẹkporo ologbo ọ tẹ gwọlọ ze. Unuovẹvẹ nọ a gaviezọ kẹ u siwi uzuazọ rai.

Ebaibol na ọ ta kpahe okpẹtu nọ ọ rrọ obaro tha, koyehọ ‘uye ulogbo nọ o rẹ te via utionọ o re jọ no emuhọ akpọ na ze he, ijo, utioye o gbẹ te via ofa ha.’ (Matiu 24:21) Orọnikọ ahwo-akpọ jọ hayo eware jọ nọ a ti ru eye e te raha otọakpọ na no ho, keme Ọghẹnẹ ọ ma otọakpọ na re o jọ bẹdẹ bẹdẹ. (Ọtausiuwoma Na 1:4) Ukpoye, uye ulogbo na yọ edhere nọ Ọghẹnẹ ọ te “rọ raha enọ e be raha otọakpọ na.” Oye u ti ku emuemu gbe uye-oruẹ kpobi họ. (Eviavia 11:18; Itẹ 2:22) O te wha eghale se ahwo-akpọ.

Ofariẹ, orọnikọ uye ulogbo na u ti kpe ahwo owoma kugbe ahwo oyoma ha wọhọ epanọ ẹkporo abade gbe otọ nọ u re nuhu i re ru na. Ebaibol ọ ta nọ, “Ọghẹnẹ họ uyoyou,” yọ Ọghẹnẹ nọ odẹ riẹ o rrọ Jihova na ọ ya eyaa nọ “ikiẹrẹe e rẹ te rehọ otọ na reuku, a vẹ jẹ ria ae bẹdẹ.” (1 Jọn 4:8; Olezi 37:29) Ẹvẹ whọ sae rọ zọ evaọ uye ulogbo na jẹ reawere eghale nọ e rrọ obaro na? Oware nọ who re ru họ: Gaviezọ kẹ unuovẹvẹ!

HAE MUẸROHỌ INWENE NỌ E BE ROMAVIA

Ma riẹ uzedhe ẹdẹ nọ emuemu gbe uye-oruẹ kpobi u ti ro kuhọ họ, keme Jesu ọ ta nọ: “Rọ kpahe ẹdẹ gbe auwa yena ohwo ọvo ọ riẹ hẹ, makọ ikọ-odhiwu hayo Ọmọ na dede rekọ Ọsẹ na ọvo.” Ghele na, Jesu ọ vẹvẹ omai unu nọ, “wha ruabọhọ erou.” (Matiu 24:36; 25:13) Fikieme? Ebaibol na ọ ta kpahe oghẹrẹ eware sa-sa nọ e te via evaọ akpọ na taure urere na o tẹ te ze. Wọhọ epanọ ame abade nọ ọ rẹ kpọ vrẹta ọ rẹ vẹvẹ ahwo Simeulue unu inọ ẹkporo ọ be te tha na, ere eware sa-sa nọ e rrọ akpọ na via e be vẹvẹ omai unu inọ urere na o kẹlino no. Ẹkpẹti nọ o lele uzoẹme nana ọ fodẹ eware jọ nọ Ebaibol na ọ ta nọ e te via.

Ma riẹ nọ eware jọ nọ a fodẹ evaọ ẹkpẹti na e via no evaọ okenọ u kpemu. Rekọ Jesu ọ ta nọ ma tẹ ruẹ “eware nana kpobi,” ma vẹ riẹ nọ urere na u te otọ no. (Matiu 24:33) Nọ omara nọ, ‘Oke vẹ eware nana nọ a jọ ẹkpẹti na fodẹ na, (1) e be rọ jọ akpọ na soso via, (2) e be rọ via oke ovona, gbe (3) i bi ro no eyoma ruọ onọ o mai yoma?’ Ababọ avro, oke oyena ma rrọ na.

OGHẸRẸ NỌ ỌGHẸNẸ O BI RO DHESẸ UYOYOU KẸ AHWO

Osu America jọ ọ ta nọ, “Unuovẹvẹ ẹruoke . . . u re siwi uzuazọ ahwo.” Nọ ẹkporo ologbo ukpe 2004 na ọ nwane via no, a te fi okwakwa jọ nọ o rẹ vẹvẹ ahwo unu họ ofẹ abade yena nọ o jọ via na re o vẹvẹ ahwo unu nọ ẹkporo otiọye ọ tẹ be ze. Ere ọvona re, Ọghẹnẹ o ru ọruẹrẹfihotọ re a vẹvẹ ahwo unu taure urere na o tẹ te ze. Ebaibol na ọ ta nọ: “A rẹ te ta usi uwoma Uvie na evaọ akpọ na soso re o jọ isẹri kẹ erẹwho na kpobi, kẹsena urere na o vẹ te ze.”—Matiu 24:14.

Evaọ ukpe nọ ukpo, Isẹri Jihova a rehọ euwa nọ i bu vi ima-odu ọvo, gbe ima egba izii (1, 900 000 000) ta usiuwoma evaọ erẹwho egba ivẹ gbe udhuvẹ (240) evaọ evẹrẹ nọ i bu vi egba ihrẹ (700). Onana o kẹ imuẹro inọ urere na u te otọ no. Uyoyou nọ Isẹri Jihova a wo kẹ erivẹ rai họ oware nọ o be wọ ae vẹvẹ amọfa unu kpahe ẹdẹ ẹdhoguo Jihova nọ o te otọ no na. (Matiu 22:39) Emagazini nana nọ who bi se na yọ edhere jọ nọ Jihova o bi ro dhesẹ uyoyou riẹ kẹ owhẹ. Riẹ nọ, “[Ọghẹnẹ] ọ gwọlọ nọ a raha ohwo ọvo ho rekọ ọ gwọlọ nọ ahwo kpobi a wo uvẹ nọ a re ro kurẹriẹ.” (2 Pita 3:9) Kọ whọ te jẹ unuovẹvẹ nana nọ Ọghẹnẹ ọ be rọ edhere oyoyou kẹ owhẹ na rehọ?

DHẸ KPOHỌ ORIA ADHẸZỌ!

Kareghẹhọ nọ ahwo Simeulue a dhẹ kpobọ igbehru re a sae zọ nọ a ruẹ nọ ame na ọ be kpọ vrẹta, a hẹrẹ bẹsenọ ame na o re zihe ze re a tẹ dhẹ hẹ. Ẹdhẹ nọ a dhẹ ababọ oke oraha na, oye u siwi uzuazọ rai. Re whọ sae zọ nọ uye ulogbo na o be tha na, o gwọlọ nọ whọ rẹ dhẹ kpohọ oria adhẹzọ enẹna nọ oke o gbẹ riẹ na. Evaọ oghẹrẹ vẹ? Aizaya ọruẹaro na ọ ruẹaro kpahe uzizie nọ u ti te ohwo kpobi obọ inọ, “edẹ e te tha,” koyehọ edẹ nana nọ ma rrọ na, nọ ahwo a te ta nọ, “Wha nyaze ma kpohọ ugbehru ỌNOWO na . . . re o wuhrẹ omai edhere riẹ, re ma nya evaọ idhere riẹ.”—Aizaya 2:2, 3.

Nọ ohwo ọ tẹ gadiẹ kpohọ ehru ugbehru, ọ rẹ sae zọ yọ ọ rẹ ruẹ eware kpobi nọ e rrọ obotọ. Epọvo na re, Ebaibol na nọ ahwo buobu a be jọ wuhrẹ kpahe Ọghẹnẹ nẹnẹ, u bi fiobọhọ kẹ ai ru inwene nọ e be wha erere se ai evaọ uzuazọ. (2 Timoti 3:16, 17) Ẹkwoma ere ze, a ve ti muhọ ‘ẹnya evaọ idhere’ Ọghẹnẹ, jẹ reawere ọthọwẹ riẹ.

Kọ whọ te jẹ uzizie nana nọ Ọghẹnẹ ọ be kẹ owhẹ evaọ edẹ urere nana rehọ? Ma be tuduhọ owhẹ awọ nọ whọ nabe romatotọ se kpahe eware nọ Ebaibol na ọ ta nọ e te via evaọ “edẹ urere” nana nọ e rrọ ẹkpẹti nọ o lele uzoẹme nana. Eva e te were Isẹri Jihova nọ e rrọ okegbe ra re a fiobọhọ kẹ owhẹ wo otoriẹ eware nọ Ebaibol na ọ ta gbe epanọ whọ sai ro fi ai họ iruo. Hayo whọ sai kpohọ oria evuẹ Itanẹte mai, www.jw.org/iso. Rri otọ IWUHRẸ EBAIBOL > ENỌ NỌ EBAIBOL Ọ KẸ IYO RAI.