‘Ọnọ O re Ru Ọghọ, O re Wo Oghale’

U KRI no nọ idibo Ọghẹnẹ a be hai ro dheidhe hayo ru akpẹwẹ. Ahwo Izrẹl a jẹ hae rọ erao dheidhe, yọ makọ enẹna, Ileleikristi a be hai “dhe idhe ajiri.” Dede na, u wo oghẹrẹ idhe efa nọ e rẹ were Ọghẹnẹ gaga. (Hib. 13:15, 16) Oghẹrẹ idhe itienana e rẹ wha evawere gbe eghale se ohwo. Joma ta kpahe iriruo jọ.

Hana nọ a gbiku riẹ fihọ Ebaibol na ọ jẹ gwọlọ ọmọ, rekọ o je yẹ hẹ. Ọ tẹ lẹ se Jihova inọ ọ tẹ sai yẹ ọmọzae, ọ te “rehọ iẹe kẹ ỌNOWO na evaọ edẹ uzuazọ riẹ kpobi.” (1 Sam. 1:10, 11) U kri hi, Hana o te dihọ je yẹ ọmọzae, o te sei Samuẹle. Nọ o bru Samuẹle evie no, ọ tẹ rehọ iẹe kpobọ uwou-udhu egagọ Ọghẹnẹ wọhọ epanọ ọ ya eyaa riẹ. Jihova ọ ghale Hana kẹ ọghọ-oruo riẹ. O yẹ emọ isoi efa, yọ Samuẹle ọ jọ ọruẹaro nọ ọ rro no, ọ tẹ jẹ jọ usu ahwo nọ Ọghẹnẹ o ro kere Ebaibol na.—1 Sam. 2:21.

Wọhọ Hana avọ Samuẹle, Ileleikristi a wo uvẹ nọ a rẹ rọ rehọ uzuazọ rai kpobi gọ Ọghẹnẹ nẹnẹ. Jesu ọ ya eyaa nọ oware kpobi nọ ma siobọno fiki egagọ Ọghẹnẹ, a te rehọ iẹe ghale omai ẹko udhusoi.—Mak 10:28-30.

Oleleikristi jọ nọ a re se Dọkas evaọ ikpe-udhusoi ọsosuọ ọ jẹ hai ru ọghọ je fiobọhọ kẹ amọfa, “ewoma oruo gbe ekẹ ohrọ nọ ọ jẹ kẹ e da riẹ oma fia.” Rekọ “ẹyao o te ti kru rie, o te ti whu,” onana o tẹ wha uweri fihọ ukoko na soso. Nọ ilele na a yo nọ Pita ọ jọ okegbe yena, a tẹ lẹe nọ jọ ọ nyaze kpata kpata. Dai roro epanọ eva e were rae te nọ Pita ọ nyaze jẹ kpare Dọkas no uwhu ze! Onana o jọ ẹkparomatha ọsosuọ nọ ukọ Jesu o ru nọ a gbiku riẹ fihọ Ebaibol na. (Iruẹru 9:36-41) Iruo Dọkas e thọrọ Ọghẹnẹ ẹro ho. (Hib. 6:10) A gbiku ọghọ-oruo riẹ fihọ Ebaibol na wọhọ emamọ oriruo nọ ma rẹ rọ aro kele.

Pọl ukọ na yọ omọfa nọ o fi emamọ oriruo hotọ kẹ omai evaọ oghẹrẹ nọ ọ rọ rehọ oke riẹ fiobọhọ kẹ amọfa. Pọl ọ jọ ileta nọ o kere se inievo obọ Kọrint ta nọ: “Rọkẹ omẹ, mẹ rẹ rọ evawere rehọ eware mẹ kpobi gbe uzuazọ mẹ gbodibo fiki uzuazọ rai.” (2 Kọr. 12:15) Eware nọ Pọl ọ rọ ẹro ruẹ e kẹ riẹ imuẹro nọ ohwo ọ tẹ be gbodibo kẹ amọfa o re wo evawere, yọ maero na o re wo eghale Jihova gbe ọjẹrehọ riẹ.—Iruẹru 20:24, 35.

O rrọ vevẹ nọ o rẹ were Jihova nọ ma tẹ be rọ oke gbe ẹgba mai ru iruo Uvie na je fiobọhọ kẹ ibe Ileleikristi mai. Kọ idhere efa jọ e riẹ nọ ma sae rọ tha iruo usiuwoma ota na uke? Ee! U te no iruo nọ uyoyou o be wọ omai ru no, ma rẹ sai je ru okẹ unevaze rọ kẹ Ọghẹnẹ orro. A rẹ rọ ekẹ unevaze itiena wha iruo usiuwoma ota na haro, nọ u kugbe imishọnare gbe inievo efa nọ e rrọ iruo odibọgba oke-kpobi ọrọ obọdẹ nọ a rẹ rẹrote. U te no ere no, ebe gbe ividio nọ a be fa fihọ evẹrẹ sa-sa, inievo nọ okpẹtu o te oma nọ a rẹ dhogbo bru, gbe Egwa Uvie ekpokpọ nọ a be bọ yọ eware efa nọ a be rọ ekẹ unevaze mai ru. Avro ọ riẹ hẹ, ‘ọnọ o re ru ọghọ, o re wo oghale.’ Maero na, o rẹ wha ujiro se Jihova nọ ma te be hae rọ eyero mai ru okẹ unevaze.—Itẹ 3:9; 22:9.

Idhere Nọ Otujọ A Bi Ro Ru Unevaze Kẹ Iruo Akpọ-soso

Wọhọ epanọ o jọ evaọ oke Pọl ukọ na, ahwo buobu nẹnẹ a rẹ “ruẹrẹ oware jọ fihọ,” hayo ma omaa ugho nọ a re fihọ ẹkpẹti unevaze ukoko na nọ a kere fihọ nọ “Worldwide Work” (Iruo Akpọ-Soso). (1 Kọr. 16:2) Kamara kamara, ikoko sa-sa a re vi ugho nana se uwou ogha Isẹri Jihova nọ o be rẹrote iruo usiuwoma ota evaọ orẹwho rai. Omomọvo ọ rẹ sai je vi ugho unevaze se uwou ogha Isẹri Jihova nọ o rrọ orẹwho rai. Re whọ sae riẹ epanọ who re ro ru onana, iviena se hayo kere se uwou ogha Isẹri Jihova nọ o rrọ orẹwho ra. Whọ rẹ sae ruẹ adrẹse uwou ogha nọ o rrọ orẹwho ra evaọ oria evuẹ Itanẹte na www.jw.org. Idhere sa-sa nọ whọ sai ro ru unevaze ena:

OKẸ NỌ A RẸ KẸ OVAVO

A rẹ sae rehọ ẹkwoma ekade ebanke nọ a re se debit card gbe credit card hayo mobile money transfer ru unevaze ugho fihọ ẹkpa-ugho ukoko. Evaọ iwou ogha jọ, a rẹ sae rọ ẹkwoma oria evuẹ itanẹte jw.org mai hayo oria evuẹ itanẹte ofa kpobi nọ ukoko na o fodẹ ru unevaze fihọ ẹkpa-ugho ukoko.
Ugho, ivie gbe ifiare, hayo eware eghaghae efa. Kere ileta lele ugho hayo okẹ na ro dhesẹ nọ onana yọ okẹ unevaze.

UGHO NỌ A RỌ KẸ UKOKO NỌ A RẸ SAI MI ZIH

Ohwo ọ rẹ sae kẹ okẹ ugho avọ ẹjiroro inọ a re zihe iei kẹe evaọ okenọ ọ gwọlọ e riẹ.
Kere ileta lele iei ro dhesẹ nọ onana yọ ugho nọ who ti mi zihe oke ofa.

OMAA ỌGHORUO

U te no ugho gbe eware eghaghae nọ ohwo ọ sae rọ kẹ okẹ no, idhere efa e riẹ nọ a re ro ru azọhọ unevaze nọ a rẹ rọ wha iruo Uvie na haro evaọ akpọ-soso. Ejọ rai e rrọ obotọ na. Oghẹrẹ kpobi nọ whọ gwọlọ rọ kẹ okẹ ra, iviena kere se uwou ogha nọ o rrọ orẹwho ra sọ a rẹ sae rọ oghẹrẹ utioye kẹ okẹ. Nọ orọnọ izi erẹwho sa-sa i wo ohẹriẹ no ohwohwo na, u wuzou re whọ nọ mi eriẹ-izi nọ e rrọ orẹwho ra re whọ sae riẹ edhere nọ ọ mai woma nọ whọ rẹ rọ kẹ okẹ ra.

Insurance [Azọhọ kẹ Okpẹtu Idudhe]: Ahwo jọ a rẹ hwa igho fihọ ekọmpene Insurance n’oke t’oke, re nọ a te whu ekọmpene na e vẹ hwa unuigho nọ a ta mu kẹ ohwo nọ a kere nọ a hwa igho na kẹ. Ahwo jọ a rẹ sai kere inọ jọ a hwa igho na kẹ Watch Tower. Amọfa a rẹ sai je kere inọ jọ a hwa igho arutẹriọ rai kẹ Watch Tower.

Igho nọ A Fihọ Ebanke: Ahwo jọ a re kere inọ a te whu, a hwa igho jọ nọ a wo evaọ ebanke hayo erere nọ o bi no igho rai jọ ze kẹ Watch Tower.

Stocks gbe Bonds: Ahwo jọ a rẹ jẹ igho fihọ ebanke, ekọmpene, hayo iruẹru egọmeti jọ nọ ebanke hayo ekọmpene itieye a re kugbe rọ thueki rai, a ve kere inọ a hwa erere nọ o ti te ai kẹ Watch Tower hayo a rẹ sae ta inọ a te whu, jọ a hwa erere rai kẹ Watch Tower.

Etọ Hayo Iwou: A rẹ sae zọhọ etọ hayo iwou nọ a rẹ sae zẹ; o tẹ rrọ otọ nọ a bọ iwou fihọ no, ohwo ọ rẹ sae rehọ iwou na ru unevaze kẹ ukoko na ọ vẹ nya siọ ofẹ nọ ọ gwọlọ rria ba bẹsenọ o re whu, o je whu no a vẹ rehọ uwou nọ ọ jẹ rria na kugbe.

Obe Uku-Oghale gbe Oware nọ A rọ Kẹ Ohwo Kru: Ohwo ọ rẹ sai kere inọ o te whu no, jọ a rehọ igho hayo ekwakwa riẹ jọ kẹ Watch Tower. Ọruẹrẹfihotọ nana o rẹ sai ru nọ osa-uzou nọ egọmeti o re mi fihọ ekwakwa itienana u re ro kpotọ.

Wọhọ epanọ ẹme na “omaa ọghoruo” u dhesẹ na, o gwọlọ nọ ohwo ọ rẹ ma omaa ziezi re ọ tẹ kẹ eghẹrẹ ekẹ itiena kpobi. Re o ruẹsi fiobọhọ kẹ ohwo kpobi nọ ọ gwọlọ ru unevaze rọ tha iruo usiuwoma ota akpọ-soso Isẹri Jihova na uke, ukoko u kere ibroshọ jọ nọ uzoẹme riẹ o ta nọ, Charitable Planning to Benefit Kingdom Service Worldwide evaọ ẹvẹrẹ Oyibo gbe Spanish. Ibroshọ na o ta kpahe idhere sa-sa nọ ohwo ọ sae rọ kẹ okẹ unevaze enẹna, hayo evaọ obaro. Wọhọ oriruo, nọ ọ tẹ gwọlọ nọ ukoko o rehọ okẹ na nọ ọyomariẹ o te whu no. Ẹsejọhọ eware jọ nọ e rrọ ibroshọ na i ti kiekpahe uyero ra ha fiki uzi egọmeti oborai kpahe osa-uzou hayo eware efa. Ahwo buobu a rọ idhere nọ e rrọ ibroshọ na ru unevaze nọ u fiobọhọ evaọ ogbodhẹ gbe iruo usiuwoma ota akpọ-soso mai no, yọ osa-uzou u lele i rai tere he. Otẹrọnọ wha jọ orẹwho rai wo ibroshọ na, whọ rẹ sae nọ mi okere-obe ukoko rai re ọ kẹ owhẹ ọjọ.

Rọkẹ evuẹ efa, kpohọ oria “Ru Unevaze Rọkẹ Usiuwoma Ota Akpọ Soso Na” nọ o rrọ obotọ oria ọsosuọ evaọ jw.org na, whọ rẹ sai je kere se hayo rehọ ifonu se uwou ogha nọ o rrọ orẹwho ra.