“Iruo na E Rẹ Ruaro”

OKE u te no rọkẹ ẹgwae jọ nọ o wuzou gaga evaọ Jerusalẹm. Devidi ovie na o se isu, iruiruo ighẹ ovie na, gbe ọzae kpobi nọ ọ rrọ ọgba kokohọ. Eva e were rai gaga nọ a yo obọdẹ usi jọ nọ Devidi o whowho kẹ ae. Ọ ta nọ Jihova ọ rehọ Solomọn ọmọ riẹ mu no re ọ bọ uwou ulogbo ro mudhe kẹ egagọ Ọghẹnẹ uzẹme na. Ọghẹnẹ ọ rọ edhere igbunu dhesẹ omaa ebabọ na kẹ Devidi ovie Izrẹl nọ ọ kpako no na, yọ Devidi omariẹ ọ rehọ e riẹ kẹ Solomọn no. Devidi ọ ta nọ, ‘Iruo na e rẹ ruaro, keme uwou na o rrọ rọkẹ ohwo ọvo ho, rekọ orọ ỌNOWO Ọghẹnẹ.’—1 Irv. 28:1, 2, 6, 11, 12; 29:1.

Kẹsena Devidi ọ tẹ nọ inọ: “Kọ ono ọ rẹ te rehọ emamọ eva rọ kẹ [Jihova] okẹ?” (1 Irv. 29:5) O hae jọnọ whọ jọ etẹe, eme whọ hai ti ru? Kọ oma o hae te wọ owhẹ tha iruo ilogbo nana uke? Ahwo Izrẹl a fialoma via kẹ iruo na. “Ahwo na a tẹ jẹ ghọghọ epanọ a rehọ eva efuafo kẹ okẹ, keme eva rai kpobi a rọ kẹ ỌNOWO.”—1 Irv. 29:9.

Ikpe buobu nọ i lele i rie, Jihova o te ru ọruẹrẹfihotọ jọ nọ ọ rro vi ọrọ etẹmpol na. Ọ rehọ etẹmpol ẹwoho ologbo ọrọ egagọ riẹ vi, koyehọ ọruẹrẹfihotọ nọ idhe ẹtanigbo Jesu u ru lọhọ re ahwo-akpọ a sae gọ Ọghẹnẹ. (Hib. 9:11, 12) Ẹvẹ Jihova o bi ro fiobọhọ kẹ ahwo wo emamọ usu kugbe ọyomariẹ nẹnẹ? Ẹkwoma iruo usiuwoma ota mai na. (Mat. 28:19, 20) Iruo nana u ru nọ ma bi ro wuhrẹ Ebaibol na kugbe ima ahwo buobu, nọ idu ahwo buobu e be rọ họ-ame, nọ ma be rọ to ikoko ekpokpọ buobu họ kukpe kukpe.

Ẹvi otiọnana u ru nọ o rọ gwọlọ nọ ma fiba ebe nọ ma bi printi, Egwa Uvie nọ ma be bọ jẹ ruẹrẹ, gbe eria ikokohọ nọ ma re wo jẹ rẹrote. Kọ whọ gbẹ ruẹ nọ iruo usiuwoma ota mai na e rrọ ruaro yọ erere ologbo o bi noi ze?—Mat. 24:14.

Uyoyou kẹ Ọghẹnẹ gbe erivẹ jekugbe oghẹrẹ nọ o gwọlọ nọ a ru iruo usiuwoma ota na kpata te o be wọ idibo Ọghẹnẹ buobu “rehọ emamọ eva rọ kẹ [Jihova] okẹ,” okẹ unevaze. O rẹ kẹ evawere gaga nọ ma tẹ be rọ “eyero gbe ibi ọsosuọ [mai] kẹ ỌNOWO na adhẹẹ” jẹ ruẹ epanọ a be rọ rehọ orimuo rọ eware nana ru iruo nọ e mae rro evaọ ikuigbe ohwo-akpọ!—Itẹ 3:9.

Idhere Nọ Otujọ A Bi Ro Ru Unevaze Kẹ Iruo Akpọ-soso

Ahwo buobu nẹnẹ a rẹ “ruẹrẹ oware jọ fihọ,” hayo ma omaa ugho nọ a re fihọ ẹkpẹti unevaze ukoko na nọ a kere fihọ nọ “Worldwide Work” (Iruo Akpọ-Soso). (1 Kọr. 16:2) Kamara kamara, ikoko sa-sa a re vi ugho nana se uwou ogha Isẹri Jihova nọ o be rẹrote iruo usiuwoma ota evaọ orẹwho rai. Omomọvo ọ rẹ sai je vi ugho unevaze se uwou ogha Isẹri Jihova nọ o rrọ orẹwho rai. Re whọ sae riẹ epanọ who re ro ru onana, iviena se hayo kere se uwou ogha Isẹri Jihova nọ o rrọ orẹwho ra. Whọ rẹ sae ruẹ adrẹse uwou ogha nọ o rrọ orẹwho ra evaọ oria evuẹ Itanẹte na www.jw.org. Idhere sa-sa nọ whọ sai ro ru unevaze ena:

OKẸ NỌ A RẸ KẸ OVAVO

A rẹ sae rehọ ẹkwoma ekade ebanke nọ a re se debit card gbe credit card hayo mobile money transfer ru unevaze ugho fihọ ẹkpa-ugho ukoko. Evaọ iwou ogha jọ, a rẹ sae rọ ẹkwoma oria evuẹ itanẹte jw.org mai hayo oria evuẹ itanẹte ofa kpobi nọ ukoko na o fodẹ ru unevaze fihọ ẹkpa-ugho ukoko.
Ugho, ivie gbe ifiare, hayo eware eghaghae efa. Kere ileta lele ugho hayo okẹ na ro dhesẹ nọ onana yọ okẹ unevaze.

UGHO NỌ A RỌ KẸ UKOKO NỌ A RẸ SAI MI ZIHE

Ohwo ọ rẹ sae kẹ okẹ ugho avọ ẹjiroro inọ a re zihe iei kẹe evaọ okenọ ọ gwọlọ e riẹ.
Kere ileta lele iei ro dhesẹ nọ onana yọ ugho nọ who ti mi zihe oke ofa..

OMAA ỌGHORUO

U te no ugho gbe eware eghaghae nọ ohwo ọ sae rọ kẹ okẹ no, idhere efa e riẹ nọ a re ro ru azọhọ unevaze nọ a rẹ rọ wha iruo Uvie na haro evaọ akpọ-soso. Ejọ rai e rrọ obotọ na. Oghẹrẹ kpobi nọ whọ gwọlọ rọ kẹ okẹ ra, iviena kere se uwou ogha nọ o rrọ orẹwho ra sọ a rẹ sae rọ oghẹrẹ utioye kẹ okẹ. Nọ orọnọ izi erẹwho sa-sa i wo ohẹriẹ no ohwohwo na, u wuzou re whọ nọ mi eriẹ-izi nọ e rrọ orẹwho ra re whọ sae riẹ edhere nọ ọ mai woma nọ whọ rẹ rọ kẹ okẹ ra.

Insurance [Azọhọ kẹ Okpẹtu Idudhe]: Ahwo jọ a rẹ hwa igho fihọ ekọmpene Insurance n’oke t’oke, re nọ a te whu ekọmpene na e vẹ hwa unuigho nọ a ta mu kẹ ohwo nọ a kere nọ a hwa igho na kẹ. Ahwo jọ a rẹ sai kere inọ jọ a hwa igho na kẹ Watch Tower. Amọfa a rẹ sai je kere inọ jọ a hwa igho arutẹriọ rai kẹ Watch Tower.

Igho nọ A Fihọ Ebanke: Ahwo jọ a re kere inọ a te whu, a hwa igho jọ nọ a wo evaọ ebanke hayo erere nọ o bi no igho rai jọ ze kẹ Watch Tower.

Shares, Debenture Stocks, gbe Bonds: Ahwo jọ a rẹ jẹ igho fihọ ebanke, ekọmpene, hayo iruẹru egọmeti jọ nọ ebanke hayo ekọmpene itieye a re kugbe rọ thueki rai, a ve kere inọ a hwa erere nọ o ti te ai kẹ Watch Tower hayo a rẹ sae ta inọ a te whu, jọ a hwa erere rai kẹ Watch Tower.

Etọ Hayo Iwou: A rẹ sae zọhọ etọ hayo iwou nọ a rẹ sae zẹ; o tẹ rrọ otọ nọ a bọ iwou fihọ no, ohwo ọ rẹ sae rehọ iwou na ru unevaze kẹ ukoko na ọ vẹ nya siọ ofẹ nọ ọ gwọlọ rria ba bẹsenọ o re whu, o je whu no a vẹ rehọ uwou nọ ọ jẹ rria na kugbe.

Obe Uku-Oghale gbe Oware nọ A rọ Kẹ Ohwo Kru: Ohwo ọ rẹ sai kere inọ o te whu no, jọ a rehọ igho hayo ekwakwa riẹ jọ kẹ Watch Tower.

Wọhọ epanọ ẹme na “omaa ọghoruo” u dhesẹ na, o gwọlọ nọ ohwo ọ rẹ ma omaa ziezi re ọ tẹ kẹ eghẹrẹ ekẹ itiena kpobi.

Rọkẹ evuẹ efa, kpohọ oria “Ru Unevaze Rọkẹ Usiuwoma Ota Akpọ Soso Na” nọ o rrọ obotọ oria ọsosuọ evaọ jw.org na, whọ rẹ sai je kere se hayo rehọ ifonu se uwou ogha nọ o rrọ orẹwho ra.