Epanọ Ma Sai ro Fi Obọ Họ kẹ Amọfa nọ Ẹbẹbẹ O te Oma

FRANÇOIS, nọ ọ rrọ ọkpako ukoko evaọ orẹwho jọ ọ ta nọ: “Nọ a ru ivotu no, ozighi o te du lahwe nọ o lẹliẹ Isẹri Jihova buobu dhẹ no iwou rai. Emuore gbe imu nọ a rẹ lọ e jariẹ tere he, umutho nọ e jariẹ e ghare thesiwa. Uvumọ ebanke o rovie he, yọ emashini nọ ohwo ọ rẹ sae jọ rehọ ugho nọ o fihọ ebanke i je ru iruo ho.”

Inievo nọ e rrọ uwou ogha orẹwho na bi ru iruo a te koko ekwakwa gbe ugho họ re a nyai ro fi obọ họ kẹ Isẹri Jihova nọ e dhẹ kpohọ Egwa Uvie sa-sa evaọ orẹwho na. Itu ivẹ nọ e be họre ohwohwo na a te di idhere orẹwho na sa-sa, rekọ a jẹ kẹ imoto uwou ogha uvẹ re a dhẹ vrẹ fikinọ a riẹ nọ Isẹri Jihova a re dhomahọ abọvo evaọ ẹme isuẹsu hu.

François ọ ta nọ: “Nọ ma jẹ dhẹ kpohọ Ọgwa Uvie jọ, ahwo jọ nọ a dhere a tẹ sa omoto mai. Rekọ egbọlọ na e nya udevie mai vrẹ. Nọ ma kparo ruẹ isoja jọ nọ ọ be dhẹ bru omai ze avọ ugbeke nọ o kru, ma te ku omoto mai rẹriẹ ovovẹrẹ dhẹ zihe kpobọ uwou ogha. Ma yere Jihova nọ ma dhẹ te uwou ọkọkọ. Okiokiọ riẹ, inievo nọ i bu te udhozeza gbe ikpe (130) nọ e jọ Ọgwa Uvie nọ ma jẹ nya na a tẹ dhẹ no etẹe kpohọ oria nọ o fọ oma. Ejọ e dhẹ ze obọ uwou ogha, yọ ma rẹrote ai jẹ rọ ẹme Ọghẹnẹ bọ ae ga bẹsenọ ozighi na o ro notọ.”

François ọ ta re nọ: “Uwhremu na, inievo nọ e rrọ eria sa-sa evaọ orẹwho na a te kere ileta se uwou ogha bi ro yere ai kẹ obufihọ rai. Ogbo nana nọ a dhẹ bru ai ze na, u ru nọ a bi ro gine fievahọ Jihova gaga.”

Nọ okpẹtu ọ tẹ romavia, orọnikọ ma rẹ ta kẹ inievo mai nọ e gwọlọ obufihọ nọ, “wha kpo tou, wha sasa oma jẹ re eva vọ” họ. (Jem. 2:15, 16) Ukpoye, ma rẹ daoma fi obọ họ kẹ ae. Okenọ Ileleikristi ikpe-udhusoi ọsosuọ a yo nọ ohọo u ti muẹ, “ilele na, duohwo duepanọ omomọvo ọ rẹ sai ruẹ, a te roro nọ, a re kpeze uko obufihọ se imoni nọ e rọ obọ Judia ria.”—Iruẹru 11:28-30.

Mai idibo Jihova, ma gwọlọ rọ ugho gbe ekwakwa mai fi obọ họ kẹ ahwo nọ ẹbẹbẹ o te oma. U te no ere no, ahwo a gwọlọ obufihọ re evaọ usu rai kugbe Ọghẹnẹ. (Mat. 5:3) Onana u ru nọ Jesu o ro vi ilele riẹ nọ a nyai wuhrẹ ahwo ẹme Ọghẹnẹ je fi obọ họ kẹ ae zihe ruọ ilele riẹ. (Mat. 28:19, 20) Mai omomọvo Ileleikristi ma be rọ oke, ẹgba gbe ekwakwa mai wha iruo usiuwoma ota na haro. Ukoko na o rẹ rọ abọjọ igho nọ a ro ru unevaze fi obọ họ kẹ ahwo nọ ẹbẹbẹ o te oma, dede na iruo usiuwoma ota Uvie na a be mae rọ igho na ru. Enẹ ma bi ro dhesẹ uyoyou nọ ma wo kẹ Ọghẹnẹ gbe erivẹ mai via.—Mat. 22:37-39.

Jọ u mu ahwo nọ a bi ru unevaze ẹro nọ ukoko o be ginẹ rọ ugho rai wha iruo usiuwoma ota akpọ-soso na haro. Kọ whọ sai fi obọ họ kẹ inievo ra nọ ẹbẹbẹ o te oma? Kọ whọ gwọlọ tha iruo usiuwoma ota na uke? O tẹ rrọ ere, “whọ se ewoma ba e ru kẹ enọ u te he, okenọ who wo ogaga nọ who re ro ru ei.”—Itẹ 3:27.

IDHERE NỌ OTUJỌ A BI RO RU UNEVAZE KẸ IRUO AKPỌ-SOSO

Wọhọ epanọ o jọ evaọ oke Pọl ukọ na, ahwo buobu nẹnẹ a rẹ ruẹrẹ “oware jọ kpahe,” hayo ma omaa ugho nọ a re fihọ ẹkpẹti unevaze ukoko na nọ a kere fihọ nọ “Worldwide Work” (Iruo Akpọ-Soso). (1 Kọr. 16:2) Ikoko sa-sa a re vi ugho nana se uwou ogha Isẹri Jihova nọ o be rẹrote iruo usiuwoma ota orẹwho rai kamara kamara. Omomọvo ọ rẹ sai vi ugho unevaze se uwou ogha Isẹri Jihova nọ o rrọ orẹwho rai re. Re whọ sae riẹ epanọ who re ro ru onana, iviena se hayo kere se uwou ogha Isẹri Jihova nọ o rrọ orẹwho ra. Whọ rẹ sae ruẹ adrẹse uwou ogha nọ o rrọ orẹwho ra evaọ oria evuẹ Itanẹte na www.jw.org. Oghẹrẹ sa-sa nọ whọ sai ro ru unevaze ena:

OKẸ NỌ A RẸ KẸ OVAVO
- Ugho, ivie gbe ifiare, hayo eware eghaghae efa.
- Kere ileta lele ugho hayo okẹ na ro dhesẹ nọ onana yọ okẹ unevaze.
UGHO NỌ A RỌ KẸ UKOKO NỌ A RẸ SAI MI ZIHE
- Ohwo ọ rẹ sae kẹ okẹ ugho avọ ẹjiroro inọ a re zihe iei kẹe evaọ okenọ ọ gwọlọ e riẹ.
- Kere ileta lele iei ro dhesẹ nọ onana yọ ugho nọ who ti mi zihe oke ofa.
OMAA ỌGHORUO

U te no ugho gbe eware eghaghae nọ ohwo ọ sae rọ kẹ okẹ no, idhere efa e riẹ nọ a re ro ru azọhọ unevaze nọ a rẹ rọ wha iruo Uvie na haro evaọ akpọ-soso. Ejọ rai e rrọ obotọ na. Oghẹrẹ kpobi nọ whọ gwọlọ rọ kẹ okẹ ra, iviena kere se uwou ogha nọ o rrọ orẹwho ra sọ a rẹ sae rọ oghẹrẹ utioye kẹ okẹ. Nọ orọnọ izi erẹwho sa-sa i wo ohẹriẹ no ohwohwo na, u wuzou re whọ nọ mi eriẹ-izi nọ e rrọ orẹwho ra re whọ sae riẹ edhere nọ ọ mai woma nọ whọ rẹ rọ kẹ okẹ ra.

Insurance [Azọhọ kẹ Okpẹtu Idudhe]: Ahwo jọ a rẹ hwa igho fihọ ekọmpene Insurance n’oke t’oke, re nọ a te whu ekọmpene na e vẹ hwa unuigho nọ a ta mu kẹ ohwo nọ a kere nọ a hwa igho na kẹ. Ahwo jọ a rẹ sai kere inọ jọ a hwa igho na kẹ Watch Tower. Amọfa a rẹ sai je kere inọ jọ a hwa igho arutẹriọ rai kẹ Watch Tower.

Igho nọ A Fihọ Ebanke: Ahwo jọ a re kere inọ a te whu a hwa igho jọ nọ a wo fihọ ebanke hayo erere nọ o bi no igho rai jọ ze kẹ Watch Tower.

Shares, Stocks gbe Bonds: Ahwo jọ a rẹ jẹ igho fihọ ebanke, ekọmpene, hayo iruẹru egọmeti jọ nọ ebanke hayo ekọmpene itieye a re kugbe rọ thueki rai, a ve kere inọ a hwa erere nọ o ti te ai kẹ Watch Tower hayo a rẹ sae ta inọ a te whu, jọ a hwa erere rai kẹ Watch Tower.

Etọ Hayo Iwou: A rẹ sae zọhọ etọ hayo iwou nọ a rẹ sae zẹ; kpahe otọ nọ a bọ iwou fihọ no, ohwo ọ rẹ sae rehọ iwou na ru unevaze kẹ ukoko na ọ vẹ nya siọ ofẹ nọ ọ gwọlọ rria ba bẹsenọ o re whu, o je whu no a vẹ rehọ uwou nọ ọ jẹ rria na kugbe.

Obe Uku-Oghale gbe Oware nọ A Rọ Kẹ Ohwo Kru: Ohwo ọ rẹ sai kere inọ o te whu no, jọ a rehọ igho hayo ekwakwa riẹ jọ kẹ Watch Tower.

Wọhọ epanọ ẹme na “omaa ọghoruo” u dhesẹ na, o gwọlọ nọ ohwo ọ rẹ ma omaa ziezi re ọ tẹ kẹ eghẹrẹ ekẹ itiena kpobi.

Rọkẹ evuẹ efa, whọ rẹ sae rehọ adrẹse nọ ọ rrọ obotọ na kere se uwou ogha Isẹri Jihova nọ o rrọ Nigeria hayo rehọ ifonu lele ai t’ẹme hayo kere se uwou ogha nọ o rrọ orẹwho ra.

JEHOVAH’S WITNESSES

P.M.B. 1090,

Benin City 300001,

Edo State, Nigeria.

Telephone: 07080662020