Kọ Ọghẹnẹ O bi Muẹrohọ Owhẹ?

OWARE NỌ MA WUHRẸ NO EMAMA ZE

Nọ a te yẹ ọmọ ze obọ, auwa ọsosuọ nọ a ro yẹe na o wuzou gaga. Fikieme? Keme oware kpobi nọ oniọmọ o ru evaọ oke nana u re kpomahọ ọmọ na gaga. Emọ nọ ini rai a bi gboma je tete e rẹ riẹ rro ziezi je wo emamọ oma.a

Kọ eme o rẹ wọ oniọmọ rẹrote je tete ọmọ nọ o yẹ obọ ziezi? Prọfẹsọ jọ nọ a re se Jeannette Crenshawa o kere fihọ obe na The Journal of Perinatal Education inọ u wo oware jọ evaọ “oma oni nọ o yẹ obọ nọ o rẹ lẹliẹe wo isiuru nọ o re ro dhobọte ọmọboba na, tẹrovi iei, jẹ kẹe evie.” Yọ u wo oware ofa jọ evaọ ugboma na nọ u re “fiobọhọ kẹ oni na riẹ oware nọ ọmọ na ọ gwọlọ je ru ei kẹe.” Onana u re fiobọhọ kẹ oni na wọ ọmọ na, ta ẹme kẹe, je lele iei zaharo. Kọ onana u gbe gbunu?

Gheghe gheghe usu okpekpe o rọ rrọ udevie oniọmọ avọ ọmọ nọ o yẹ ze obọ họ. Jihova họ ọnọ ọ ma ahwo-akpọ fihọ ere.b Devidi ovie na ọ ta nọ Ọghẹnẹ họ ọnọ ọ rehọ e riẹ no ‘edhede oni’ riẹ ze jẹ sẹro riẹ evaọ igbama oni riẹ nọ ọ gbẹ jọ ọmọ unuevie. Ọ lẹ se Ọghẹnẹ nọ: ‘No umuo okenọ a ro yẹ omẹ ze a se omẹ ba owhẹ obọ, no edhede oni mẹ ze whọ rrọ Ọghẹnẹ mẹ.’​—Olezi 22:9, 10.

DAI RORO IEI: Otẹrọnọ Ọghẹnẹ ọ ma oware utioye fihọ oma oni nọ u re fiobọhọ kẹe muẹrohọ ọmọboba riẹ jẹ rẹrote ẹgwọlọ riẹ, kọ oyena o gbẹ kẹ omai imuẹro nọ Ọghẹnẹ ọ be daezọ mai omomọvo, nọ orọnọ mai yọ “emọ Ọghẹnẹ na”?​—Iruẹru Ikọ 17:29.

EBAIBOL NA O DHESẸ NỌ ỌGHẸNẸ O BI MUẸROHỌ OMAI

Jesu Kristi nọ ọ mae kẹle Ọghẹnẹ ọ ta nọ: “Ubiugho osese a be hae zẹ imuedi ivẹ, o gbẹ rrọ ere? Ghele na, ọvuọvo rai o re kie fihọ otọ ababọ Ọsẹ rai nọ ọ rẹ riẹ hẹ. Rekọ rọkẹ owhai, ọ riẹ unu ibieto kpobi nọ e rrọ uzou rai. Fikiere, ozọ u mu owhai hi; wha ghare vi imuedi buobu.”​—Matiu 10:29-31.

Ahwo buobu a re muẹrohọ emevra esese he, kabikọ nọ ọjọ rai o te kie fihọ otọ dede. Rekọ Jihova Ọsẹ mai nọ ọ rrọ obọ odhiwu na o re muẹrohọ ọvuọvo rai! Ghele na, o rri ahwo-akpọ ghare vi evra, yọ omọvo dede ọ tubẹ ghare vi evra buobu. Onana u wuhrẹ omai nọ Ọghẹnẹ o bi muẹrohọ omai omomọvo, fikiere u fo re “ozọ u mu” owhẹ hẹ. Jọ u mu owhẹ ẹro nọ Ọghẹnẹ ọ be daezọ ra!

Ebaibol na ọ kẹ omai imuẹro inọ

• “Ibiaro ỌNOWO na e rọ eria kpobi, [bi] roro iyoma gbe iwoma.”​—ITẸ 15:3.

• ‘Ibiaro ỌNOWO na i bi rri ikiẹrẹe, ezọ riẹ i bi yo oviẹ rai.’​—OLEZI 34:15.

• “Mẹ rẹ te wereva ghọghọ fiki uvi uyoyou ra, keme whọ ruẹ ẹbẹbẹ mẹ, who ghine vuhu uye mẹ na mu.”​—OLEZI 31:7.

“ME JE RORO NỌ JIHOVA O YOU OMẸ HẸ”

Ẹvẹ uzuazọ mai o rẹ jọ nọ ma tẹ riẹ nọ Ọghẹnẹ o you omai yọ o bi muẹrohọ omai re o fiobọhọ kẹ omai? U re nwene uzuazọ mai dẹẹ. Aye jọ nọ a re se Hannahc nọ ọ rrọ ohwo England ọ ta nọ:

“Ẹsibuobu, mẹ jẹ hai roro nọ Jihova o you omẹ hẹ, yọ o bi yo elẹ mẹ gbe he. Me je roro nọ ẹsejọhọ fikinọ me wo ẹrọwọ te he. Me te je roro nọ Ọghẹnẹ o bi gboja kẹ omẹ keme me fioka ohwo ho. U ru nọ me ro ku ei họ nọ Ọghẹnẹ ọ be daezọ mẹ hẹ.”

Rekọ eriwo Hannah o nwene no, o gbe wo avro evaọ udu riẹ hẹ inọ Ọghẹnẹ ọ be daezọ riẹ hẹ. Eme o fiobọhọ kẹe nwene eriwo riẹ? Ọ ta nọ: “Enwene na ọ romavia asohẹrioke he. Mẹ kareghẹhọ ovuẹ Ebaibol jọ nọ mẹ gaviezọ kẹ ikpe buobu nọ i kpemu. A jọ ovuẹ na ta kpahe idhe ẹtanigbo Jesu Kristi, yọ u duobọte omẹ udu gaga. Ovuẹ na o kẹ omẹ imuẹro inọ Jihova o you omẹ. Nọ me te muẹrohọ nọ Jihova ọ kuyo olẹ mẹ jọ, irui-oviẹ i re su no omẹ aro ze keme u mu omẹ ẹro no inọ Jihova o gine you omẹ. Ofariẹ, Ebaibol na nọ me bi se, gbe iwuhrẹ Isẹri Jihova nọ mẹ be hae nya i wuhrẹ omẹ eware buobu kpahe Jihova no, wọhọ iruemu aghae riẹ gbe oghẹrẹ nọ o rri omai ahwo-akpọ. Obọnana, me vuhumu no inọ Jihova ọ be tha omai uke, o you omai kpobi, yọ o rrọ isiuru riẹ re ọ rẹrote omai omomọvo.”

Iku Hannah na e rẹ tuduhọ ohwo awọ. Rekọ ẹvẹ o sai ro mu owhẹ ẹro nọ Ọghẹnẹ ọ riẹ epanọ eware e rrọ kẹ owhẹ dẹẹ? Uzoẹme nọ o rrọ aro na o te kẹ uyo onọ nana.