Nọ Ọzae Hayo Aye Mai O te Bruẹnwae

“Mẹ jẹ gwọlọ nọ me re whu no nọ ọzae mẹ ọ vuẹ omẹ nọ ọ be se omẹ re ọ rehọ aye nọ ọ maha vi omẹ. Nọ mẹ tẹ kareghẹhọ uye nọ mẹ ruẹ no fiki riẹ, oware nọ o ru na o rẹ da omẹ gaga.”—Maria, Spain.

“Nọ aye mẹ ọ dhẹ siọ omẹ ba idudhe, o jọ wọhọ ẹsenọ oware jọ u whu evaọ oma mẹ. Itee gbe omaa nọ ma wo kpobi i gbe wo iruo ho. Ẹsejọ o rẹ jọ omẹ oma nọ mẹ kpairoro vrẹ oware nọ o via na no, rekọ mẹ rẹ riẹ oke nọ mẹ rẹ rọ wariẹ mu iroro họ eroro ho.”—Bill, Spain.

O RẸ da gaga nọ ohwo ọ tẹ riẹ nọ ọzae hayo aye riẹ o bi lele omọfa. Ahwo jọ a sae rọvrẹ ọzae hayo aye rai nọ o bruẹnwae jẹ wariẹ ruẹrẹhọ kugbei.a Dede na, te a wariẹ kugbe hayo a kugbe he, o rẹ da wumuo ho nọ ohwo ọ tẹ riẹ nọ ọzae hayo aye riẹ o bruẹnwae. Eme o rẹ sai fiobọhọ kẹ ohwo nọ orivẹ riẹ o bruẹnwae thihakọ?

ERIA IKERE NỌ E RẸ SAI FIOBỌHỌ

Dede nọ o rẹ da gaga nọ ọzae hayo aye ohwo o te bruẹnwae, Ikereakere na e kẹ ahwo buobu omosasọ no. A jọ Ebaibol na wuhrẹ no inọ Ọghẹnẹ ọ be ruẹ irui-oviẹ rai yọ o be dae gaga.—Malakae 2:13-16.

“Okenọ awaọruọ ọ da omẹ oma fia, whọ sasa omẹ oma je ru udu te omẹ otọ.”—Olezi 94:19.

Bill ọ ta nọ: “Nọ me je se owọ ikere yena, mẹ tẹ be jọ iroro mẹ ruẹ Jihova nọ o bi ru udu te omẹ otọ wọhọ epanọ ọsọmọ o re ru.”

“Whọ rẹ talamu ohwo nọ ọ talamu owhẹ.”—Olezi 18:25.

Carmen nọ ọzae riẹ o lele aye ọfa evaọ emerae buobu ọ ta nọ: “Ọzae mẹ ọ talamu omẹ hẹ, rekọ mẹ riẹ nọ Jihova ọ te talamu omẹ. Ọ te siọ omẹ ba vievie he.”

“Wha ruawa kpahe oware ovo ho, rekọ evaọ oware kpobi wha rọ olẹ avọ olẹ ayare-ọgaga . . . ta ayare rai via kẹ Ọghẹnẹ; udhedhẹ Ọghẹnẹ nọ u vi otoriẹ kpobi o vẹ te sẹro udu rai.”—Ahwo Filipai 4:6, 7.

Aye jọ nọ a re se Sasha ọ ta nọ: “Me je dhe oria ikere nana esese. Yọ ere me je dhe ẹlẹlẹ re, Ọghẹnẹ o te gine ru omẹ wo udhedhẹ.”

Ẹsejọ ahwo nọ ma fodẹ evaọ obehru na a je roro nọ o mai woma re a tube whu. Rekọ fikinọ a fievahọ Jihova yọ a je se Ebaibol na, a wo ẹgba nọ a sai ro thihakọ. Bill ọ ta nọ: “Dede nọ o jọ wọhọ ẹsenọ eware kpobi e raha ku omẹ no, ẹrọwọ mẹ ọ kẹ omẹ ẹgba nọ me je ro yeri uzuazọ mẹ vrẹ keme me wo ẹruore. Mẹ jẹ ‘nya evaọ ukiekpotọ ebi ọlala’ evaọ etoke jọ, rekọ Ọghẹnẹ ọ jọ kugbe omẹ.”—Olezi 23:4.

a Re whọ riẹ sọ whọ rẹ rọvrẹ hayo whọ rẹ rọvrẹ hẹ, se uzoẹme na, “When a Mate Is Unfaithful” (Nọ Ọzae Hayo Aye Ohwo O te Bruẹnwae) evaọ Awake! Ane 22, 1999.

Eware nọ I Fiobọhọ kẹ Ahwo Jọ No

Roro kpahe eria ikere nọ e rẹ sasa ohwo oma.

Bill ọ ta nọ: “Me se obe Job gbe obe Olezi, yọ me je kpe oka họ oria kpobi nọ u kiehọ uyero mẹ. Mẹ ruẹ nọ ahwo nọ a kere ebe Ebaibol nana a rẹriẹ ovao dhe ọkpọ edada gbe awaọruọ nọ ọ jọ omẹ oma na.”

Jọ ile e kẹ owhẹ omosasọ.

Carmen ọ ta nọ: “Evaọ aso nọ mẹ gbẹ be sae wezẹ hẹ, mẹ rẹ gaviezọ kẹ ile. Onana o kẹ omẹ omosasọ gaga.” Daniel ọ ta nọ: “Me wuhrẹ epanọ a re kporo agita, yọ ile nọ mẹ jẹ hai kporo i fiobọhọ je ru udu te omẹ otọ.”

Vuẹ omọfa epanọ o rrọ owhẹ oma.

Daniel ọ ta nọ: “Vẹre vẹre, mẹ rẹ kake vuẹ omọfa oware nọ o be kẹ omẹ uye he, rekọ me wo egbẹnyusu ekpekpe jọ, yọ mẹ jẹ hae vuẹ ae epanọ o jọ omẹ oma kẹdẹ kẹdẹ. Ẹsejọ dede, me re kere epanọ o rrọ omẹ oma fihọ ileta se ai. Onana u fiobọhọ kẹ omẹ gaga.” Sasha ọ ta nọ: “Ahwo uviuwou mẹ a fiobọhọ kẹ omẹ gaga. Oni mẹ ọ jẹ hae nabe gaviezọ kẹ omẹ ẹsikpobi. Ọsẹ mẹ o ru udu kie omẹ vi je fiobọhọ kẹ omẹ riẹ nọ a you omẹ. Yọ o fiobọhọ kẹ omẹ wariẹ wo omamẹ zihe ẹmẹrera.”

Hae lẹ ẹsikpobi.

Carmen ọ ta nọ: “Mẹ jẹ hae lẹ ẹsikpobi. O jọ omẹ oma inọ Ọghẹnẹ ọ kẹle omẹ, be gaviezọ kẹ omẹ, je fiobọhọ kẹ omẹ. Evaọ oke yena nọ eware e rọ tahaku na, me si kẹle Ọghẹnẹ vi epaọ anwẹdẹ.”