Nọ Ma te Wo Iroro Uwhu

Adriana evaọ Brazil ọ ta nọ: “Awaọruọ mẹ ọ jẹ rọwo kpotọ họ. Fikiere me te roro nọ o mai woma re me tube whu.”

KỌ O jọ owhẹ oma no ẹdẹjọ inọ o mai woma re who whu? O tẹ rrọ ere, kiyọ whọ te riẹ oghẹrẹ nọ o jọ Adriana oma. Fikinọ ọ jẹ hae ruawa vrẹta, u ru nọ eva e gbẹ jẹ rọ were iẹe he, yọ ọ jẹ hai roro nọ u re kẹe no. Kẹsena edọkita ọ tẹ vuẹ Adriana nọ o wo ẹyao nọ ọ rẹ wha ọkora fihọ ohwo oma ẹsikpobi.

Ọzae jọ nọ a re se Kaoru nọ ọ rrọ ohwo Japan, ọ jẹ rẹrote ọsẹgboni riẹ nọ a jẹ mọ yọ a kpako no. Kaoru ọ ta nọ: “Evaọ oke yena, iruo nọ me je ru e jẹ kẹ omẹ ẹbẹbẹ gaga. No oke o be nyaharo na, emu ọ gbẹ jẹ ruọ omẹ oma ha, yọ mẹ gbẹ jẹ sae wezẹ ziezi hi. Me te je roro nọ o mai woma re me whu, keme yọ uye na kpobi u kuhọ no.”

Ọzae ọfa nọ a re se Ojebode nọ ọ rrọ ohwo Nigeria ọ ta nọ: “Eva e jẹ hae were omẹ vievie he, yọ u te epanọ mẹ jẹ hae rọ viẹ. Fikiere mẹ tẹ jẹ gwọlọ epanọ me re ro kpe omamẹ no.” Eva e were omai gaga inọ Ojebode, Kaoru, gbe Adriana a kpe omarai no ho. Rekọ kukpe kukpe, ahwo buobu a be hai thuru whu.

OWARE NỌ O RẸ SAI FIOBỌHỌ

Ahwo buobu nọ a re thuru whu yọ ezae, enọ e sae yare obufihọ họ fiki omovuọ. Jesu ọ ta nọ ahwo nọ a be mọ a gwọlọ ọbo-imu. (Luk 5:31) Fikiere otẹrọnọ who bi wo iroro uwhu, jọ oma o vuọ owhẹ hẹ, yare obufihọ. Ahwo buobu nọ a wo ẹyao iroro a ruẹ nọ usiwo-imu u re fiobọhọ kẹ ai thihakọ. Usiwo-imu u fiobọhọ kẹ Ojebode, Kaoru, gbe Adriana nọ a be sai ro thihakọ ẹbẹbẹ nana nọ a wo na.

Edọkita ọ sae rọ imu hayo ta ẹme uduotahawọ kẹ ohwo nọ o wo ẹyao iroro ro fiobọhọ kẹe. O gwọlọ nọ ahwo uviuwou gbe egbẹnyusu ohwo otioye a rẹ rọ ithihakọ fiobọhọ kẹe re. Ogbẹnyusu nọ o mai woma nọ ohwo o re wo họ Jihova Ọghẹnẹ, ọnọ ọ rẹ rọ Ebaibol na fiobọhọ kẹ omai.

KỌ ẸYAO O TI NO OTỌ ẸDẸJỌ?

Usiwo-imu nọ a rẹ kẹ ahwo nọ a wo ẹyao iroro o rẹ rehọ oke lelehie, yọ o sae gwọlọ nọ a rẹ whaha eware jọ nọ a je ru, je mu eware ekpokpọ jọ họ eru. Rekọ otẹrọnọ who wo ẹyao iroro, whọ sai roro kpahe okenọ eware kpobi i ti woma evaọ obaro, wọhọ epanọ Ojebode o ru. Ọ ta nọ: “Me bi rẹro okenọ eme nọ e rrọ obe Aizaya 33:24 i ti ro rugba, enọ e ta kpahe okenọ ohwo ọvuọvo evaọ otọakpọ na nọ ọ te ta nọ ‘mẹ be mọ ọ te jariẹ hẹ.’” Wọhọ Ojebode, jọ eyaa Ọghẹnẹ kpahe “otọakpọ ọkpokpọ” nọ “edada” e te jọ họ na, e kẹ owhẹ omosasọ. (Eviavia 21:1, 4) Eyaa yena i dhesẹ nọ ma gbe ti wo edada ọvuọvo vievie he, makọ edada ẹyao iroro dede. Whọ “gbẹ te kareghẹhọ” ọkora nọ iroro egaga e be wha se owhẹ hẹ, “yọ e te gbẹ ruọ udu [ra] gbe he.”—Aizaya 65:17.

Eria Ikere nọ E rẹ Sai Fiobọhọ

Ọghẹnẹ ọ riẹ epanọ o rrọ owhẹ oma.

“Mẹ Jihova Ọghẹnẹ ra, me bi kru obọze ra kekeke, . . . be ta kẹ owhẹ nọ, ‘Jọ ozọ u mu owhẹ hẹ. Me ti fiobọhọ kẹ owhẹ.’”—Aizaya 41:13.

Jihova ọ riẹ epanọ eware e rrọ omai oma vi omọfa kpobi, yọ ọ gwọlọ fiobọhọ kẹ omai.

Roro didi kpahe Ẹme Ọghẹnẹ.

Elaejah ọ “yare nọ jọ o whu. Ọ ta nọ: ‘ . . Rehọ uzuazọ mẹ no obọnana, O Jihova.’”—1 Ivie 19:4.

Ojebode ọ ta nọ: “Ẹme Ọghẹnẹ nọ me je roro kpahe o fiobọhọ kẹ omẹ. Mẹ ruẹ nọ u wo oke jọ nọ o jọ Elaejah oma wọhọ epanọ o jọ omẹ oma na.”

Wuhrẹ no iriruo Ebaibol ze.

“Mẹ [Jesu ọ] lẹ olẹ ayare-ọgaga kpahe owhẹ [Pita] no re ẹrọwọ ra ọ seba ewhrehe.”—Luk 22:32.

Nọ Pita ukọ na ọ vro Jesu isiasa no, o da riẹ yoyoma, ọ tẹ viẹ gaga. Kaoru ọ ta nọ: “Oware nọ o via kẹ Pita na u fiobọhọ kẹ omẹ ruẹ nọ Jihova avọ Jesu a riẹ epanọ o jọ Pita oma. Onana o tuduhọ omẹ awọ gaga.”

Whọ “gbẹ te kareghẹhọ” ọkora nọ iroro egaga e be wha se owhẹ hẹ, “yọ e te gbẹ ruọ udu [ra] gbe he.”—Aizaya 65:17.