Okokohọ Ubrotọ O Do Edo Awere!—Jiri Jihova Avọ Oghọghọ no Ẹdẹ te Ẹdẹ!
1 “Kọ otẹrọnọ a kporo onwae yọ edo riẹ o wo otọ họ, ono ọ rẹ wọ owọ ẹmo?” erei Pọl ukọ na ọ nọ. (1 Kor. 14:8) Kọ use nọ u do via evaọ Okokohọ Ubrotọ “Enọ I bi Jiri avọ Oghọghọ” na u do lahwe jẹ rọ vevẹ? Ẹhẹ, ghinọ erei. ‘Jiri Jihova avọ oghọghọ kẹdẹ kẹdẹ’ họ ovuẹ owhawha na! Kọ use onana o wọ udu ra kẹ iruo? Ọruẹrẹfihotọ okokohọ na ọ vọ avọ eware nọ e ghinẹ suẹe ze nọ ma re ro jiri Ovie ebẹdẹ bẹdẹ na, Jihova.—Ol. 35:27, 28.
2 Idhiwu iride na i bi jiri oruaro Jihova “no ẹdẹ te ẹdẹ.” (Ol. 19:1-3) Otẹrọnọ emama nọ i wo urru hu, nọ i wo uzuazọ họ i re jiri Jihova kẹse kẹse, u gbe fo re oma o w’omai ahwo-akpọ nọ i wo ereghẹ re ma rehọ urru mai jiri ei evaọ oke kpobi fiki ekwakwa-aghae riẹ nọ i wo ibe he gbe iruẹru riẹ? Ono o fo ujiro oghọghọ mai vi Ọnọma omai nọ ọ mai kpehru na?—Ol. 145:3, 7.
3 No Ẹdẹ te Ẹdẹ: Ọnọ ọ so ilezi nọ a kẹ ẹgba na o kere nọ: “Ta eme usiwo riẹ kẹdẹ kẹdẹ. ỌNOWO ọ rẹ ruaro, a rẹ rehọ ujiro ulogbo kẹ e.” (Ol. 96:2, 4) Kọ ekobaro evo onana u kie kpahe? Ijo! Kọ onana u dhesẹ nọ mai kpobi a rẹ t’ẹme kẹ amọfa kpahe Jihova evaọ oke kpobi gbe oria kpobi nọ ma sae jọ ru erei, makọ evaọ edẹ nọ ma rọ odibọgba ọ n’uwou ruọ uwou ha? E! Ẹgwọlọ nọ a re ro jiri Jihova kẹdẹ kẹdẹ jẹ ta kẹ amọfa kpahe edhere usiwo riẹ o rọ kpatakpata. Ahwo a rẹ riẹ hrọ inọ Jihova họ Ovie Ebẹdẹ Bẹdẹ gbe nnọ Ọ rehọ isuẹsu akpọ kẹ Ọmọ oruaro Riẹ no, Jesu Kristi. Uyoyou kẹ Jihova gbe ahwo u re ru omai gbẹ ta kẹ ahwo evaọ oria nọ a jẹ rue rai kpobi kpahe ovuẹ onana jẹ kpahe eware nọ o ru re ahwo a wo esiwo.—Ol. 71:15.
4 Kẹdẹ kẹdẹ evaọ odibọgba otọakpọ riẹ, Jesu Kristi o fi oriruo nọ o mai woma hotọ wọhọ ọnọ o re jiri Jihova ovavo. Ọ ta nọ: “Ọsẹ Ọnowo odhiwu gbe akpọ, me yere owhẹ.” (Mat. 11:25) Evaọ uzẹme ẹme riẹ, oria kpobi nọ Jesu ọ jọ, o je jiri Jihova evaọ ẹgbede. Yọ oria kpobi nọ ogbotu a koko họ—jọ evaọ uwou egagọ, evaọ etẹmpol Jerusalẹm, evaọ ehru ugbehru, hayo akotọ ethẹ—o jiri Jihova. Otẹrọnọ ma nya lele ithihi-awọ Jesu kpekpekpe ẹkwoma ẹkpare kpehru Jihova kẹdẹ kẹdẹ evaọ ogbotu, ma ti wo iyẹrẹ evawere oghọghọ.
5 Ẹjẹrehọ Uzizie Na: Kọ whọ te k’uyo kẹ uzizie na re who jiri Jihova kẹdẹ kẹdẹ evaọ ẹgbede? Kareghẹhọ, ẹkpako ọ rẹ whaha ohwo ho. Olezi 148:12 u zizie emoha, ighele emetẹ, ekpọkuezae, gbe emezae re a jiri Jihova. Emaha na, kọ wha ti jiri Jihova evaọ udevie ibe-isukulu gbe iwuhrẹ evaọ etoke enukpe isukulu ọnana? Ekpako, kọ ahwo nọ who bi ruiruo kugbe evaọ oria iruo ra a bi yo kpahe Jihova gbe ẹjiroro riẹ, okenọ uvẹ nọ a rẹ rọ t’ẹme kugbe o tẹ rehọ oma via? Mai kpobi a re ru ẹmeọta kpahe Jihova họ abọ uzuazọ mai wọhọ epanọ emuore gbe ẹwẹ e rọ na. Makọ otẹrọnọ ahwo nọ e kare ọdawẹ a gaviezọ kẹ ẹme nọ ma be ta ha, Ohwo jọ ọ riẹ nọ ọ be gaviezọ, ọ te hwa omai osa.—Mal. 3:16.
6 Nọ urere eyero na o bi sikẹle na, use na o be nya via kpohọ oka akpọ na: “Jiri Jah, whai ahwo!” (Ol. 106:1, NW ) Jọ ubo ujiro mai u gbe do ga viere epanọ okpẹdẹ ọvuọvo ọ be nya vrẹ na re ahwo kpobi a riẹ nọ Ọnọ odẹ riẹ ọ rọ Jihova ọye Ọmai Kpehru vi akpọ kpobi.—Ol. 83:18.