Rehọ Emagazini Mai ru Emamọ Iruo
1 Okenọ whọ tẹ nya kẹle oria ebe awhusi, eme whọ rẹ ruẹ? Emagazini. Evaọ obọ ohwo nọ ọ rẹ zẹ ebe awhusi, eme who re gbẹro kuẹ? Emagazini. Ahwo, te emaha te ekpako, a muọ emagazini họ e se no. Emagazini e rọ akpọ na iroro.
2 Kọ ma sai ru ahwo udu-oruọzewọ re a wo Uwou-Eroro gbe Awake! họ iroro? Ẹhẹ, otẹrọnọ Uwou-Eroro gbe Awake! e rọ OMAI iroro. Eme o rẹ sae fiobọhọ k’omai? Roro kpahe ezọhọfihọ enana:
◼ Se Emagazini Na: Ọsẹro ọnyawariẹ jọ ọ n’iyẹrẹ nọ, evaọ ẹghale riẹ, owhowho-uvie 1 evaọ 3 evaọ okogho riẹ ọye o bi se uvitha Uwou-Eroro Na gbe Awake! kpobi no emuhọ te ekuhọ. Kọ who bi ru erei? Nọ who bi se uzoẹme kpobi na, nọ omobọ ra nọ, ‘Kọ ono o ti wo ovuhumuo ovuẹ onana—oni, ọthueki, uzoge?’ Evaọ ọrọ obọ ra, kp’oka họ ugogo-ẹme ọvo hayo ivẹ nọ whọ sae ro ruiruo okenọ who ti fi emagazini na họ ada. Roro kpahe epanọ whọ sae rọ kpare isiuru ohwo na fihọ ẹme na evaọ uye-ẹme ọvo hayo ivẹ.
◼ Wo Unu Emagazini nọ A re Vi se Owhẹ k’Amara k’Amara: Fodẹ unu nọ u kiehọ k’owhẹ kẹ oniọvo nọ ọ be rẹro te emagazini na kpahe unu emagazini evaọ ukere kpobi. Evi ọ emagazini enana u re kugbe erọ ẹvẹrẹ Oyibo jegbe evẹrẹ amọfa nọ erọ ẹkwotọ ra.
◼ Ma-Oma Ẹdẹ Iruo Emagazini Ekẹse Kẹse: Ikoko buobu a fi ẹdẹ jọ họ otọ kẹ ewhowho emagazini ọvo. Kọ whọ sae tha Ẹdẹ Iruo Emagazini ukoko na uke? Ogbẹ rọ ere he, daoma rehọ oke ra jọ ru ewhowho emagazini iyẹrẹ gbe ẹghale emagazini omobọ ra, te n’uwou ruọ uwou gbe evaọ ejẹ emagazini.
◼ Jọ “Uwou-Eroro” gbe “Awake!” E jọ Owhẹ Iroro: Wha emagazini na okenọ who te bi kpohọ erẹ hayo nọ whọ tẹ be dẹ eware. Fi ai họ ada nọ whọ tẹ be t’ẹme kugbe otu-iruo, erivẹ, ibe isukulu, hayo iwuhrẹ. Imava-orọo jọ nọ a rẹ rehọ arupre kpohọ erẹ ẹsibuobu a rehọ emagazini ekpokpọ mu ẹmeọta họ kugbe ọnọ ọ keria kẹle ae. A reawere irere buobu no. Emoha jọ a rẹ wha izoeme nọ a roro nọ i ti si iwuhrẹ hayo ibe isukulu rai urru kpohọ isukulu kẹse kẹse. Wha ejọ lele oma nọ a te vi owhẹ kpohọ oria ekẹloma nyae dẹ eware, re who fi ai họ ada kẹ ihreki na nọ whọ tẹ dẹ eware re no. Ahwo mai jọ buobu a rẹ dẹ epẹtiro kẹse kẹse; keme jabọ who gbe fi emagazini na họ ada kẹ ọnọ ọ be zẹ epẹtiro na ha? Fi ai họ eria nọ i je te owhẹ obọ vẹrẹ okenọ imoni ra i te weze ze, okenọ who te bi kpohọ erẹ, hayo nọ whọ tẹ be hẹrẹ ohwo jọ. Kọ whọ sai roro oria ọfa nọ u fo?
◼ Ruẹrẹ oma kpahe kẹ Odhesẹvia Emagazini Ọkpẹkpẹ: Ma-oma re whọ ta umutho ẹme, rekọ ta ae ziezi. Jọ jajaja. Te udu ohwo na. Ta umutho ẹme. Rehọ iroro jọ no izoẹme jọ ze, fi ei họ umutho eme, re who fi emagazini na họ ada. Odhesẹvia nọ ọ mai woma họ onọ whọ rẹ nọ kpahe ẹme ọ isiuru jọ whọ vẹ riobọ kpohọ izoẹme nọ e k’uyo Ikereakere na. Roro kpahe iriruo epanọ a sae ro ru onana:
3 Otẹrọnọ who bi ru uzoẹme jọ vevẹ kpahe epanọ emuemu o bi ro vihọ, whọ sae nọ inọ:
◼ “Eme o gwọlọ re a ru ei lọhọ re ma sae wezẹ evaọ aso ababọ ozọ emuemu?” Ọnọ o wo uwou na ọ sae wo avro rọ kpahe ẹwariẹ woma eware. Whọ rẹ sae k’uyo inọ orọ ere ahwo buobu oma who ve fibae nọ who wo evuẹ jọ nọ who roro nọ e te jọ isiuru kẹe. Okioye who ve rovie kpohọ ugogo ẹme nọ u fo evaọ izoẹme na.
4 Okenọ whọ be t’ẹme te uzoẹme kpahe uzuazọ uviuwou, whọ rẹ sae ta nọ:
◼ “Ahwo buobu a ruẹ nọ ghinọ use-abọ o rọ re a sae rria uzuazọ jẹ ko uviuwou evaọ edẹ mai enana. A kere ebe buobu kpahe ẹme ọnana no, rekọ makọ ewena na dede a wo ọrọwokugbe evaọ ifue kẹ ebẹbẹ mai hi. Kọ oria jọ o riẹ nọ ma rẹ sae kpohọ nọ a rẹ jọ wo ọkpọvio evaifihọ?” Okioye whọ vẹ riobọhọ uzedhe ẹme jọ evaọ emagazini na nọ u dhesẹ areghẹ nọ a rẹ ruẹ evaọ Ebaibol na.
5 Whọ rẹ sae rehọ edhere ọnana ro ruiruo nọ who te bi dhesẹ izoẹme kpahe ẹbẹbẹ uyerakpọ:
◼ “Ahwo buobu a rọ otọ otunyẹ nẹnẹ. Ojọ ẹjiroro Ọghẹnẹ oke ovo inọ ma rria uzuazọ enẹ hẹ.” Who ve dhesẹ ẹme nọ ọrọ izoẹme na nọ o sae fiobọhọ k’omai yeri kugbe ebẹbẹ uzuazọ enẹna jẹ wha ẹruore ifue nọ e rẹ tọ ze evaọ obaro.
6 Isẹri Ise Iyẹrẹ I re w’Ẹgba: Evaọ ukere ọ January 1940 ọrọ Informant (Odibọgba Uvie Mai) a jọ tudu họ iwhowho-uvie awọ inọ a ma-oma ẹdẹ obọdẹ koka koka re a rehọ emagazini na ruiruo isẹi ise iyẹrẹ. Kọ who re ruiruo isẹi ise iyẹrẹ noke ruoke? Who te bi ru erei, kọ oghẹrẹ nọ who bi ro ruiruo u ghine w’ẹgba? A ruẹ iwhowho-uvie jọ nọ i re dikihẹ akotọ iyẹrẹ nọ ọrọ vighivighi, nọ e rẹ t’ẹme kẹ ohwohwo yọ ahwo buobu a be nya vrẹ nọ a bi muẹrohọ họ. Ukpenọ a re dikihẹ kẹle omoma rai avọ emagazini na, o rẹ mai w’ẹgba re a hẹriẹ jẹ nya bru ahwo. Erara e rẹ sae domaji jẹ gaviezọ kpẹkpẹ otẹrọnọ omọvo ọ nya bru rai, rekọ umutho ahwo ọvo a rẹ sae rehọ udu obọ rai nya bru ahwo nọ e be t’ẹme kugbe omoma rai. Nọ ibiaro ahwo kpobi i re riwi omai evaọ iyẹrẹ na, u wuzou gaga re ma gọ emamọ ẹgọ nọ ọ rọ kpatiẹ onọ u fo egbodibo Ọghẹnẹ.—1 Tim. 2:9, 10.
7 Ejẹ Emagazini: Ahwo nọ a wo ejẹ emagazini a re fi emagazini buobu họ ada dede nọ a bi ru ẹkuotọ na kẹse kẹse. Ejẹ emagazini yọ emamọ ehri o rẹ lẹliẹ ohwo wo irẹro obe uwuhrẹ Ebaibol.
8 Okenọ who te bi ru ozihebro kẹse kẹse re whọ kẹ emagazini, whọ te ruẹ nọ ẹruọruọ gbe usu nọ o rọ udevie ra avọ ọnọ o wo uwou na ọ te rro. Epanọ wha riẹ oma te, erei o rẹ lọhọ te re wha t’ẹme Ikereakere kugbe. Onana u re su kpohọ emuhọ obe uwuhrẹ Ebaibol nọ u re wo ẹvi. Evaọ oria ozihebro nọ a je bi dhesẹ ovuhumuo kẹ emagazini, ru ai re a vi emagazini. Kareghẹhọ re, inọ oke kpobi nọ whọ nyabru ọnọ o wo uwou na whọ sae niyẹrẹ ozihebro.
9 Oniọvo ọmọtẹ jọ ọ rẹ rehọ emagazini se aye jọ nọ o re dede ai rehọ kẹse kẹse rekọ ọ ta nọ: “Mẹ rọwo oware nọ whọ be hae vuẹ omẹ na ha.” Evaọ iweze oke ọfa, oniọvo ọmọtẹ na o te di ọzae riẹ họ uwou. Nọ a t’ẹme kugbe whẹtiẹwhẹtiẹ no, a te ru ọruẹrẹfihọ re a mu ewuhrẹ Ebaibol họ. Oniọvo ọmọtẹ na o te mu ogbẹnyusu kugbe emezae esa rai nọ e nyaze ti kuomagbe uwuhrẹ na. Ukuhọ riẹ, oni na gbe emezae riẹ a tẹ rehọ izuazọ rai mudhe kẹ Jihova jẹ họ-ame. Rite inẹnẹ na, ahwo 35 evaọ uviuwou na a jẹ uzẹme na rehọ no. Enana kpobi na fikinọ oniọvo ọmọtẹ na ọ nya lele ejẹ emagazini riẹ!
10 Idhere buobu e riẹ nọ a re ro mu ejẹ emagazini họ. Whọ sae mu ejẹ họ ẹkwoma ekere fihọ otọ enọ who fihọ ada jẹ ruẹrẹhọ re whọ rehọ ukere okpokpọ zihe evaọ etoke ekpoka ivẹ kpobi. Edhere ọvo jọ họ ẹrehọ ruiruo ovuẹ nọ o rọ otọ uzoẹme ọ “Evaọ Ukere n’Otha.” Okenọ who te zihe, vuẹ ọnọ o wo uwou na nọ who wo izoẹme nọ whọ kake fodẹ vẹre na. Hayo, okenọ who bi ru ozihebro na, whọ sae ta nọ: “Okenọ me se uzoẹme onana, me roro nọ u ti si owhẹ urru . . .” Whọ vẹ ta umutho eme kpẹkpẹ kpahe uzoẹme na je fi ei họ ada. Nọ who te ru ozihebro na re no, muẹrohọ igogo eme isoi evaọ okerefihotọ ọ n’uwou ruọ uwou ra: (1) odẹ ọnọ o wo uwou na, (2) adrẹse ohwo nọ o wo uwou na, (3) ẹdẹ ozihebro na, (4) ukere nọ who fihọ ada, gbe (5) uzoẹme nọ whọ t’ẹme te. Iwhowho-uvie jọ a wo obọkparọ ziezi no evaọ ejẹ emagazini o ruo, nọ a bi koko izihebro nọ i bu te 40 hayo viere evaọ obe okerefihotọ rai!
11 Ẹkuotọ nọ A jẹ be Thueki: Iwhowho-uvie nọ i re ru ẹkuotọ nọ a jẹ be thueki a re fi emagazini buobu họ ada. Kọ whọ dawo iruo ọ n’uye-eki ruọ uye-eki no? Iyẹrẹ i dhesẹ nọ evaọ ikoko jọ ofẹ iruo onana a bi ru ei tere he. Oke ọsosuọ, o rẹ jọ ahwo jọ oma ozozọ kpahe ẹnyabru ahwo nọ a be thueki, rekọ nọ a dae riẹe umutho oke jọ no, a tẹ rue riẹ nọ o vọ avọ awere gbe erere. Keme jabọ whọ gbẹ nọ owhowho-uvie hayo ọkobaro nọ o wo eriariẹ re o fiobọhọ k’owhẹ muhọ ha?
12 Irere buobu e riẹ nọ a je ruiruo n’uye-eki ruọ uye-eki. Ahwo nọ a rẹ jọ uwou ho e rẹ jọ kakao gaga, o tẹ make kao evaọ etoke nọ a be rọ thueki na! Ihreki e rẹ jọ whẹtiẹwhẹtiẹ a gbẹ maki wo isiuru kpahe Ebaibol na ha. Kaki muhọ; ẹsejọhọ a ti dede owhẹ rehọ ziezi. Nọ who te dhesẹ oma ra no, whọ sae ta nọ whọ rẹ kaki diọ ihreki họ uwou ho, fikiere whọ be rehọ umutho oke kakao weze bru rai evaọ oria iruo rai re whọ rehọ ukere okpokpọ ọ Uwou-Eroro Na gbe Awake! rọ kẹ ae. Dhesẹ nọ ihreki buobu a vuhu emagazini mai mu no keme a gwọlọ nọ a rẹ riẹ kpahe eware ekpokpọ nọ e be via evaọ akpọ rekọ umutho oke kakao ọvo a wo kẹ isase. Emagazini na ọ rẹ rehọ evuẹ nọ i re dhobọ te iroro evaọ edhere ọsasa, ababọ orithọ egagọ, esuo, hayo ekiọthuọ. A rẹ sae ru ejẹ emagazini kugbe ahwo nọ a wo isiuru nọ a ruẹ evaọ ẹkuotọ ekiọthuọ.
13 Ruẹrẹ Oma Kpahe Wọhọ Uviuwou: A rẹ sae fi oke jọ họ evaọ etoke ewuhrẹ uviuwou re a t’ẹme te izoeme evaọ emagazini ekpokpọ nọ i fo kẹ iruo evaọ ẹkuotọ ra. Ahwo uviuwou—kugbe emọ na—a sae rehọ ọvuọ uvẹ riẹ wuhrẹ odhesẹvia rai gbe epanọ a sai ro fi inoma gheghe kparobọ nọ e rẹ rehọ oma via, wọhọ: “Obọ mẹ o rọ oware,” “Ma wo egagọ obọ mai,” hayo “Me wo isiuru hu.” Emamọ iruo o ru kugbe o sae ru ei lọhọ kẹ uviuwou na re a wo obọ ẹghale emagazini kẹse kẹse.
14 Iwuhrẹ Obe Ukoko E Sae Fiobọhọ: Oria nọ o jẹ lọhọ, ma-oma iruo odibọgba Ẹdẹ Iruo Emagazini fihọ eria obe uwuhrẹ na ukpenọ ahwo ukoko na kpobi a re kpohọ obọ Ọgwa Uvie na. U fo nọ ahwo nọ a be rẹro te iruo usiuwoma ota na a rẹ ruẹrẹ oma họ ziezi avọ igogo iroro rọ kẹ utu na. Enana e sae kugbe odhesẹvia oriruo gbe ugogo-ẹme ọvo hayo ivẹ no ukere okpokpọ na ze nọ a rẹ sae ro ruiruo re e kpare isiuru evaọ okogho na. Ẹgwa usiuwoma ota—ukugbe ẹghale ahwo na—o rẹ jọ kpẹkpẹe, o rẹ raha oke viọ iminiti 10 hayo 15 ho. U re mu ahwo nọ i bi ru iwuhrẹ obe ukoko na ẹro nọ ẹkuotọ nọ u re te otu na ru evaọ etoke usiuwoma ota na ọ riẹ re iruo e jọ kẹ ahwo na kpobi. A rẹ sae lẹ olẹ taure a tẹ ghale iwhowho-uvie nọ i ti ruiruo kugbe hayo nọ a tẹ ghale ae no.
15 Dhesẹ Ovuhumuo kẹ Emagazini Na: Uzoẹme na “Rehọ Uwou-Eroro Na gbe Awake! ro ru Emamọ Iruo” nọ a kporo evaọ ukere July 1993 ọrọ Odibọgba Uvie Mai (ọrọ Oyibo) o ru ugogo-ẹme ọnana: “Aghare Uwou-Eroro Na gbe Awake! ọ rẹ hiẹ hẹ, makinọ a gbe fi ai họ ada evaọ udevie amara ọvo hayo ivẹ no umuo ẹdẹ ukere rai ze dede he. Ẹgba evuẹ nọ erọ eva rai i re re he . . . Re a vu emagazini anwae wa re i vihọ ababọ iruo nọ a rẹ rehọ ae ru u dhesẹ ababọ ovuhumuo kẹ ekwakwa aghae enana. . . . Ukpenọ a re go ukere anwae h’emu jẹ kpare iroro vrẹ rai, kọ o gbẹ mai woma re a ru obọdẹ omodawọ re a fi ai họ ada rọ kẹ ahwo nọ i wo isiuru?”
16 Nẹnẹ na ahwo udu oruọzewọ buobu a riẹ nọ e be gwọlọ uzẹme na. O sae jọ nọ evuẹ nọ e rọ emagazini ọvo jọ họ oware nọ a gwọlọ re u su ai kpohọ uzẹme na! Jihova ọ k’omai usi evawere nọ ma whowho, yọ emagazini mai i bi ru abọ nọ u wuzou re evuẹ enana i te amọfa obọ. Kọ who ti muẹro họ otọ ziezi kpahe ẹghale emagazini evaọ obaro? Kọ whọ te rehọ iroro enana jọ ruiruo evaọ ekuhọ oka onana? Who ti wo eghale buobu nọ who te ru erei.
Ezọhọfihọ nọ I re Fiobọhọ:
◼ Kaki se emagazini na, re whọ riẹ izoeme na.
◼ Salọ uzoẹme nọ o t’ẹme kpahe ẹme isiuru ahwo buobu evaọ okogho ra.
◼ Ruẹrẹ odhesẹvia nọ u re fo oghoghẹrẹ ahwo, jọ ezae, eyae, hayo izoge. Dhesẹ epanọ emagazini na o kie kpahe ọnọ o wo uwou na gbe epanọ uviuwou na kpobi a te rọ reawere riẹ.
◼ Ma-oma re who ruiruo usiuwoma ota ra evaọ okenọ ahwo buobu a rẹ jọ uwou. Ikoko jọ a ru ọruẹrẹfihotọ usiuwoma ota owọwọ avọ emagazini na nọ a re kugbe ro ruiruo.
◼ Ru odhesẹvia ra kpẹkpẹe je duobọ họ ẹme na.
◼ Whọ t’ẹme kpatakpata ga hrọ họ. Otẹrọnọ ọnọ ọ be gaviezọ k’owhẹ o gbe wo isiuru hu, ẹme ọkpakpata ọ ta u re fiobọhọ họ. Daoma r’udu kpotọ, jẹ kẹ ọnọ o wo uwou na uvẹ re ọ t’ẹme.
◼ Wo emagazini ẹvẹrẹ efa h’obọ kẹ ahwo nọ a sae gwọlọ ai.
Emagazini I Fihọ Ada Evaọ n’Uwou ruọ Uwou:
◼ Wo oma ehwẹ ọruọruọ gbe urru uwowolẹ.
◼ Jọ jajaja kpahe emagazini na.
◼ T’ẹme ẹmẹrera jẹ jọ vevẹ.
◼ T’ẹme kpahe uzouẹme ọvo; kpare isiuru ohwo na, je dhesẹ aghare riẹ kẹ ọnọ o wo uwou na.
◼ Ru uzoẹme ọvo vẹ.
◼ Dhesẹ emagazini ọvo, who ve fi enọ ikiọkọ kugbei họ ada.
◼ Rehọ emagazini na kẹ ọnọ o wo uwou na.
◼ Jọ ọnọ o wo uwou na riẹ nọ whọ ma-oma inọ who ti zihe ze.
◼ Jọ ẹme ekuhọ ra ọ jọ ruọruọruọ, avọ irẹro-ewoma a tẹ make siọ emagazini na.
◼ Kere ahwo nọ i wo isiuru gbe ebe nọ a fihọ ada kpobi họ obe n’uwou ruọ uwou na.
Uvẹ nọ A re ro Fi Emagazini họ Ada:
◼ Isẹi ise ọ n’uwou ruọ uwou
◼ Isẹi ise iyẹrẹ
◼ Iruo ọ n’uye-eki ruọ uye-eki
◼ Ejẹ emagazini
◼ Isẹi ise owọwọ
◼ Okenọ a te bi ru ozihebro
◼ Nọ ma tẹ be nya bru emọ-uwuhrẹ Ebaibol mai vẹre
◼ Okenọ ma bi kpohọ erẹ, be dẹ eware
◼ Nọ ma be t’ẹme kugbe imoni, otu-iruo, erivẹ, ibe isukulu, iwuhrẹ
◼ Nọ ma bi kpohọ erẹ, evaọ eria ẹhẹrẹ