Jọ Odibọgba Ra Fi Emagazini họ Ada
1 “U siuru kẹhẹ, o nyaze ẹruoke, jẹ vọ avọ uduotahawọ.” “Eye họ ebe nọ e rẹ mae kẹ uduotahawọ evaọ usu ebe kpobi nọ me se no.” Eme nana e nwani dhesẹ eme nọ isisase wariẹ akpọ na soso a rẹ ta nọ a te se Uwou-Eroro Na gbe Awake! no. Uzẹme, emagazini mai e ginẹ rrọ obọdẹ ekwakwa aghae nọ ma be rọ wha emamọ usi na se ‘oghẹrẹ ahwo kpobi.’—1 Tim. 2:4.
2 Ọzae jọ nọ ọ rẹ thueki gaga o mi Awake! jọ nọ o wo uzoẹme jọ nọ o were riẹ gaga. Okeofa riẹ, o te se uvitha Uwou-Eroro nọ a rọ kẹe kugbe na, onọ u wo uzoẹme jọ nọ o kpakpa e riẹ kiẹ orọwọ nọ o wo no emaha ze kpahe uwuhrẹ Esanerọvo na riwi. Onana o tẹ kpare isiuru riẹ. Emerae ezeza nọ i lele i rie ọ tẹ họ-ame. Ọzae ọfa jọ ọ riẹ nọ emagazini na i re te obọ ẹsikpobi rekiyọ o re se ai hi. Whaọ aye riẹ ọ rẹ gwọlọ nọ Isẹri Jihova a ta ẹme kẹe he, rekiyọ o re se emagazini nọ a rọ kẹ ọzae riẹ na. Eyaa Ebaibol nọ e ta kpahe aparadase nọ ahwo okiẹrẹe ọvo a te jọ u te duobọte aye na udu. Ukuhọ riẹ, aye na omariẹ, ọmọ riẹ, gbe oniọvo-ọmọtẹ riẹ a te zihe ruọ idibo Jihova.
3 Fi Ae Ivẹ na họ Ada Kugbe: Wọhọ epanọ iriruo obehru na i dhesẹ na, ma rẹ sae riẹ ahwo nọ a ti se emagazini mai hi hayo riẹ oware nọ o rẹ sae kpare isiuru rai hi. (Ọtausi. 11:6) Fikiere, o rẹ kẹ erere re ma fi Uwou-Eroro Na gbe Awake! họ ada kugbe, o tẹ make rọnọ emagazini ọvo ma te ta ẹme kpahe. Evaọ iyero jọ, u re fo re ma fi uvitha emagazini sa-sa họ ada evaọ iweze ọvo.
4 U re woma re ma wo omaa ẹdẹ jọ nọ ma re ro wobọ evaọ efihada emagazini na eva ẹkpoka kpobi. Eva 2005 Calendar of Jehovah’s Witnesses, a kpoka họ Ẹdẹ-Ọmaha kpobi wọhọ “Ẹdẹ Emagazini.” Nọ iyero omobọ ohwo gbe erọ okegbe rai e rrọ oghoghẹrẹ na, ahwo jọ a rẹ sai fi ẹdẹ ọfa họ nọ a re ro fi emagazini họ ada. Kọ onana o rrọ abọjọ omaa ẹkpoka ra?
5 Fi Utee họ kẹ Oma Ra: Utee omobọ mai nọ ma re fihọ evaọ amara re ma fi unu emagazini jọ họ ada u re fiobọhọ k’omai wo ajọwha efihada emagazini. Kọ who wo ejẹ emagazini? Kọ who bi fi emagazini họ ada kẹ ahwo nọ whọ nyaku evaọ odibọgba na? Kọ whọ sai fi emagazini họ ada evaọ usiuwoma ota iyẹrẹ, evaọ ẹkwotọ ekiọthuọ, gbe evaọ eria ẹgbede? Kọ whọ rẹ wha emagazini lele oma nọ who te bi kpohọ erẹ, okenọ who bi kpohọ eki, gbe okenọ who bi kpohọ eria efa? Rehọ uvẹ kpobi nọ u rovie fihọ ro fiobọhọ kẹ amọfa wo erere no Uwou-Eroro Na gbe Awake! ze.
6 Ma rẹ sai ru ei fihọ utee mai re ma fi uvitha emagazini nọ i kri no nọ ma wo họ ada. O tẹ make rọnọ ma gbe fi emagazini jọ họ ada evaọ etoke amara ọvo hayo ivẹ nọ e rrọ ideti uvitha na ha, eme nọ e riẹe eva na i gbe wo iruo ghele. Fi emagazini na họ ada kẹ ahwo nọ a dhesẹ isiuru. Rọkẹ ima ahwo buobu, emagazini Uwou-Eroro gbe Awake! na yọ “ẹme nọ a ta evaọ ẹruoke.” (Itẹ 25:11) Joma rehọ ae fiobọhọ kẹ ima ahwo buobu efa re a riẹ jẹ gọ Jihova.
[Study Questions]
1, 2. Ẹvẹ Uwou-Eroro Na gbe Awake! i ro duobọte uzuazọ ahwo no?
3. Erere vẹ o re noi ze nọ ma te fi Uwou-Eroro Na gbe Awake! họ ada kugbe?
4. Ẹvẹ ma sae rọ ma omaa fihọ kẹ iruo emagazini?
5. Didi uvẹ nọ a re ro fi emagazini họ ada ma re muẹrohotọ kẹ, kọ eme o re fiobọhọ k’omai ru ere?
6. Ẹvẹ ma sae rọ rehọ emagazini mai nọ i kri no ro ruiruo ziezi?