Salọ Izoẹme nọ Whọ rẹ rọ Kpare Ugogo Isiuru Ahwo Na
1 Wọhọ izuẹ-uzei nọ e rẹ dabe rọ ese rai ma arao na, iwhowho-uvie gbe ekobaro ukoko buobu a be reawere obọdẹ obokparọ evaọ izoẹme Uwou-Eroro Na gbe Awake! nọ a be salọ re a kpare ugogo isiuru ahwo evaọ ẹkwotọ rai. A re roro ohwo nọ ọ te mae gwọlọ se izoẹme emagazini na jọ. Ẹvẹ a bi ro ru onana?
2 Orọ ọsosuọ a re se uvitha kpobi n’oka t’oka. Kẹsena a vẹ nọ oma rai nnọ, Didi oghẹrẹ ohwo uzoẹme ovuovo u ti siuru? A vẹ daoma re a weze bru ahwo nọ a roro nọ a te gwọlọ se izoẹme yena. Nọ a te bi rẹro nnọ ẹsejọhọ uvitha emagazini jọ o te were ahwo buobu evaọ ẹkwotọ rai, a ve fiba unu nọ a re vi vẹre.
3 A be kẹ Emagazini Mai Adhẹẹ Ziezi: Ohwo jọ nọ o fi obe họ kẹ emagazini mai nọ o bi ruiruo kẹ emagazini ọ Nigeria nọ a rẹ mai se evaọ akpọ soso ọ ta kpahe Awake! nọ: “Mẹ ghọghọ kẹ emagazini nọ o mai wo isiuru kẹ ahwo kpobi evaọ akpọ na.” Ohwo jọ nọ o wo ọwhọ kẹ ese emagazini mai o muẹrohọ nọ: “Ereghẹ eghaghae nana i gbunu kẹhẹ! Ẹsikpobi mẹ rẹ ruẹ uzoẹme nọ u re si omẹ urru nọ a rẹ t’ẹme kpahe evaọ oria [obe] onana jọ.”
4 Emagazini na e rẹ t’ẹme kpahe izoẹme buobu, te Ebaibol na, eware nọ e be jọ akpọ via, ẹgwọlọ uviuwou, ebẹbẹ uyerakpọ, ikuigbe, otokiẹ-eriariẹ, uzuazọ erao gbe ekakọ, gbe eware efa buobu. Evaọ uzẹme o rẹ mae si ohwo urru re o se oware nọ u kiekpahe ẹgwọlọ, uyero, hayo okọ riẹ. Nọ ma rẹ t’ẹme kẹ ahwo buobu na, avọ oghẹrẹ eware nọ e rẹ were ae gbe ebẹbẹ rai na, ẹsalọ ugogo izoẹme nọ i re si ahwo nọ ma nya ku urru u re ruiruo gaga.
5 Muẹrohọ oware nọ o via evaọ okenọ Isẹri ivẹ jọ a fi uvitha ọ Awake! ọrọ September 8, 1996, họ ada kẹ okere obeusi jọ. O kere nọ: “Epanọ mẹ be te rọ ta nọ mẹ gwọlọ họ na, omọvo rai jọ o te fibae nọ: ‘Uzoẹme jọ o riẹ kpahe ahwo America nọ a no India ze. Ma riẹ nọ wha be hai kere kpahe uzoẹme na gaga.’ ” Ọ rehọ emagazini na yọ, evaọ oke emu-ohiohiẹ, o te se kpahe ahwo India na, ọ tẹ te rọwo nnọ “onana obọdẹ riẹ” yọ “eme riẹ kpobi uzẹme.”
6 Eme O re Si Ahwo Urru Evaọ Ẹkwotọ Ra? Eme whọ jọ emagazini na ruẹ evaọ umutho emerae nọ e vrẹ na nọ e rẹ sai si enọ e rẹ zẹ eki gbe ahwo akiruo jọ evaọ ẹkwotọ ra hayo erivẹ ra urru, ibe-iruiruo, gbe ibe-isukulu? Eme ọ te mai si elọya urru, iwuhrẹ, ekohrẹ isukulu, enọ i re ruiruo kẹ ẹgbede, gbe edọkita? Nọ who te fi ahwo nọ whọ be ta usiuwoma kẹ họ iroro nọ whọ be kiẹ uvitha kpobi riwi na o rẹ k’owhẹ obọdẹ idhere nọ whọ rẹ rọ vaha uzẹme na.
7 Nọ whọ tẹ nya ku ohwo nọ o dhesẹ obọdẹ isiuru kẹ uzoẹme Uwou-Eroro hayo Awake! jọ, ọ tẹ jẹ rehọ emagazini na, whọ sae ta nọ: “Nọ mẹ tẹ ruẹ uzoẹme nọ me roro nọ u ti si owhẹ urru okiofa, o te were omẹ re mẹ rehọ ojọ se owhẹ.” Whọ rẹ sai ku ohwo na gbe usu ọ ejẹ emagazini ra, whọ vẹ hae rehọ emagazini ekpokpọ ro sei kẹse kẹse. Oghẹrẹ utioye a bi ro ru ei nọ ahwo nọ a wo isiuru kẹ ugogo uzoẹme emagazini jọ a jẹ be kẹ uzizie re a zihe bru rai.
8 Wo Ẹjiroro Abọ-Ẹzi: Ikpe kakao jọ nọ e vrẹ no, ọzae jọ nọ o je le ute jọ ọ tẹ rehọ emagazini ọ Awake! nọ o ta kpahe uzoẹme nọ u si rie urru. Dede na, ọzae ọgba-egagọ ọnana o te se uvitha Uwou-Eroro Na re, onọ u wo uzoẹme jọ nọ o lẹliẹ e riẹ kiẹ orọwọ nọ o wo no emaha ze riwi kpahe Esanerọvo. Emerae ezeza nọ i lele i rie ọ tẹ họ-ame! Fikiere, whọ siọ eme abọ-ẹzi ba ẹta kugbe ahwo nọ a re se emagazini mai na ha. Whọ sai dhesẹ ibroshọ na Eme Ọghẹnẹ Ọ Gwọlọ Mi Omai? rọ kẹ ae whọ vẹ ta nọ whọ te hae rehọ iminiti kakao jọ t’ẹme kpahe uzoẹme ovo oke kpobi nọ whọ rehọ emagazini ọkpokpọ nya.
9 Evaọ udevie ahwo nọ who re zihe bru gbe enọ wha gbe ruiruo kugbe na, roro ohwo nọ o sae were re ọ hai wo uvitha ọ Uwou-Eroro Na gbe Awake! ọkpokpọ kpobi. Whọ vẹ daoma re whọ nya te ai oma. Rehọ ebe enana kẹ ahwo te epanọ ẹgba ra o te kpobi. Yọ o thọrọ owhẹ ẹro ho inọ nọ whọ be daoma re who fiobọhọ kẹ amọfa buobu re a se emagazini mai na, yọ who bi “gbolo ebrẹdi ra fihọ evaọ ame.” Evaọ obaro, whọ sai wo obokparọ evaọ eduku ahwo nọ a te jọ ibe ilele.—Ọtausi. 11:1, 6.