Emagazini I re Whowho Uvie Na

¹ Wọhọ Isẹri Jihova, a riẹ omai ziezi rọkẹ usiuwoma ota ajọwha mai kpahe Uvie Ọghẹnẹ. Emagazini Uwou-Eroro Na gbe Awake! nọ ma be ghale na i bi ru abọ ologbo evaọ obufihọ kẹ ima ahwo re a wuhrẹ kpahe ẹjiroro Ọghẹnẹ. Ovuẹ nọ o rọ eva rai ghinọ emamọ usi, keme u bi whowho Uvie obọ odhiwu Ọghẹnẹ wọhọ ẹruore ọvuọvo rọkẹ ohwo-akpọ.

² Emagazini na i re duobọ te uzedhe ẹgwọlọ ahwo—abọ-iroro, uyero-akpọ, gbe abọ-ẹzi. Nọ aghare uruemu gbe uviuwou u bi kie evaọ eria kpobi na, Uwou-Eroro Na gbe Awake! i bi fiobọhọ kẹ ahwo ru izuazọ rai wo aghare ẹkwoma edhesẹ oghẹrẹ nọ a re ro fiọ ehri-izi Ebaibol họ iruo. O te were omai eva re ma ru ahwo vi emagazini na evaọ etoke April gbe May.

³ I re Ghine Siuru: A re duku Uwou-Eroro Na gbe Awake! evaọ evẹrẹ enwenọ ahwo nọ a rọ akpọ soso. Fiki onana, ahwo a riẹ emagazini mai na ziezi. Eware jọ nọ e rẹ lẹliẹ ai si ahwo urru ena:

◼ Wọhọ ebe oruọzewọ gbe uzẹme, i re dhesẹ ẹhẹriẹ nọ ọ rọ ewoma gbe eyoma vevẹ.

◼ E rẹ kẹ ẹruore aparadase okiẹrẹe nọ ọ be tha, nọ a si no eyaa Ọghẹnẹ ze inọ ọ te rehọ otọakpọ na ziọ otọ esuo Uvie riẹ.

◼ E rẹ kẹ oghẹrẹ izoẹme ẹruoke sa-sa, nọ i re si ahwo oghẹrẹ uyero gbe iruemu-ewho kpobi urru.

◼ Izoẹme na e rẹ kpẹkpẹe, i re wuhrẹ, e rọ uzẹme, jẹ kare oziẹbro-emu gbe obusino oware ezi.

◼ Iwoho nọ e rẹ were ibiaro e rẹ wha isiuru ẹsiẹsiẹ ze, yọ oghẹrẹ ekere-eme ivevẹ na i re ru emagazini na lọhọ ese.

⁴ Ghale Ae Kẹkẹe: Ẹghale emagazini nọ o re ruiruo o rẹro so osegboja evaọ ẹmeọta nọ ma rẹ ruẹrẹhọ, oke mai nọ ma rẹ m’oma riẹ fihotọ, gbe iruẹru usiuwoma ota mai nọ ma rẹ ruẹrẹhọ. A kẹ ẹjiroro nọ i re ruiruo fihọ ukere ọ September 1995 (ọrọ Oyibo) gbe October 1996 ọrọ Odibọgba Uvie Mai, nọ u fo re a kiẹ riwi je fihọ iruo.

⁵ Riẹ Kpahe Emagazini na Ziezi: Okenọ who bi se ukere kpobi, roro kpahe ohwo jọ nọ ọ te gwọlọ rehọ ojọ. Gwọlọ ugogo eme hayo ikereakere jọ nọ whọ rẹ sae t’ẹme fodẹ evaọ ẹmeọta ra. Roro kpahe onọ jọ nọ whọ rẹ sae nọ ro mu ẹmeọta họ jẹ kpare isiuru fihọ uzoẹme na.

⁶ Ruẹrẹ Ẹme na Kiehọ Ohwo Na: Ruẹrẹ ẹmeọta ọlọlọhọ, ọliọliọ fihọ nọ a rẹ sai nwene kiehọ ọzae, aye, ọkpako, hayo uzoge, makọ egbẹrioma hayo ọrara.

⁷ Hai Wo Isiuru Uwou-Eroro Na gbe Awake!: Nọ emagazini na e rẹ gba ẹkpa, ẹmẹkpa, hayo ẹkpa-ewu lọlọhọ na, ma rẹ sae wha ibuobu lele oma evaọ okenọ ma te bi kpohọ erẹ hayo bi kpohọ eki. Rehọ ae kẹ imoni ra okenọ whọ tẹ be t’ẹme kugbe ai, erivẹ ra, ibe-iruiruo ra, ibe-isukulu ra, hayo iticha ra. Ruẹrẹ ẹdẹ họ koka koka rọkẹ isẹri-ise emagazini.

⁸ Dhesẹ Ovuhumuo kẹ Emagazini Na: Aghare rai ọ rẹ hiẹ hẹ. O tẹ maki lehie no aghare ovuẹ nọ o rọ eva rai na u re gbe w’iruo. Uzẹme, otẹrọnọ ma daoma gaga re ma fiọ emagazini nọ ma wo kpobi họ ada no, erọ anwae i re gbe vihọ evaọ orawo ebe mai hi.

⁹ Isẹri-Ise Iyẹrẹ U re w’Iruo: Onana họ edhere jọ nọ ọ mai woma nọ a re ro fi emagazini na họ ada kẹ ahwo buobu. Iwhowho-uvie jọ a re ruiruo evaọ iyẹrẹ nọ i re zurie kẹse kẹse evaọ edẹ ọ eki.

¹⁰ Ẹkwotọ Iruo O bi w’Ẹvi: Okenọ ma te bi se-isẹri n’uhie-eki ruọ uhie-eki, umutho ahwo jọ ọvo a rẹ jọ uwou hu. Ahwo buobu nọ i re ruiruo a wo adhẹẹ, yọ ibuobu e rẹ rehọ emagazini na. Dhesẹ izoẹme nọ i fo kẹ uzedhe iruo nọ whọ be jọ t’ẹme na.

¹¹ Ẹruore Ọ rọ Ejẹ Emagazini: Nọ a bi kporo emagazini mai k’amara k’amara na, u fo re a zihe bru ahwo nọ a bi se ai jẹ rehọ ekpokpọ ro se ai. Ma re zihe bru ai kẹse kẹse, orọnikọ re ma fi emagazini họ ada ọvo ho, rekọ re ma kpare isiuru ohwo na kpahe Ebaibol na. Ijẹ emagazini yọ obọdẹ ehri ọrọ iwuhrẹ Ebaibol evaọ obaro.

¹² Ruiruo Buobu Evaọ April gbe May: Uwou-Eroro Na gbe Awake! i wo evafihọ ima ahwo ovuhumuo nọ i bi se ai. I wo ẹgba evaọ ewhowho Uvie na te epanọ ma rẹ rọ rehọ iẹ wọhọ owha-iruo re ma hae whai lele oma je ru ahwo vi ai evaọ uvẹ kpobi. Jọ emerae ọ April gbe May na e jọ erọ obọdẹ rọkẹ ahwo nọ ma re ru vi emagazini na!