Fi Emagazini nọ I bi Se Isẹi kẹ Uzẹme na họ Ada

1. Iruo vẹ Uwou-Eroro Na gbe Awake! i wo?

¹ Uwou-Eroro Na Nọ U Bi Whowho Uvie Jihova gbe Awake! e gbẹ rrọ ebe nọ ma be mai ro whowho ovuẹ Uvie na je ru ilele. (Mat. 24:14; 28:19, 20) Ma be hae rọ omaweromẹ ro fi emagazini ivẹ nana họ ada ẹsikpobi evaọ kabọ kabọ odibọgba na.

2. Inwene vẹ ma jọ Uwou-Eroro Na gbe Awake! ruẹ no, kọ fikieme?

² Anwọ ikpe buobu ze na, ma jọ emagazini na ruẹ inwene sa-sa no evaọ oghẹrẹ nọ e rro te gbe eware nọ e rrọ ae eva, jegbe onaa nọ ma bi ro fi ai họ ada. A ru inwene nana avọ ẹjiroro epanọ emagazini na i re ro siuru je w’ẹgba ziezi, re ovuẹ Uvie na o sai duobọte oghẹrẹ ahwo kpobi udu re ‘a wo usiwo, jẹ ze te riẹ uzẹme na.’—1 Tim. 2:4.

3. Ẹvẹ ma te hae rehọ emagazini na ruiruo evaọ odibọgba na?

³ Anwọ January 2006 ze, idhere sa-sa nọ ma bi ro fi uvitha Awake! ẹsiẹvo amara na họ ada o reria omai oma no. Enẹna ere ọvona ma te hae rọ rehọ idhere sa-sa fi uvitha ẹgbede orọ Uwou-Eroro Isoko nọ ma te hai wo ovo evaọ emerae esa na họ ada. Idhere oriruo nọ a re ro fi emagazini na họ ada e be hae r’oma via evaọ ẹwẹ-obe urere Odibọgba Uvie Mai. Idhere oriruo nana e be hae t’ẹme kpahe izoẹme emuhọ nọ e rrọ emagazini na, rekọ ẹsejọ e rẹ ta kpahe izoẹme efa nọ e rẹ sai si ahwo buobu uru. Ma rẹ sae rọ idhere oriruo nana ruiruo ziezi nọ ma tẹ riẹ oware nọ uzoẹme na o ta kpahe jẹ rehọ eme obọmai rọ tae wọhọ epanọ u kiehọ ẹkwotọ mai.

4. U te no idhere oriruo nọ e rrọ Odibọgba Uvie Mai na no, fikieme o sai ro woma re ma rehọ edhere ọfa nọ o kiehọ ro ruiruo?

⁴ Dede nọ idhere sa-sa nọ a re ro fi emagazini ọvona họ ada e rrọ Odibọgba Uvie Mai, whọ sae rọ edhere ọfa nọ o kiehọ ro ruiruo ghele. Ẹjiroro jọ nọ o rọ rrọ ere họ fikinọ uzoẹme jọ evaọ usu izoẹme nọ i kiọkọ na o sae were ahwo ẹkwotọ rai gaga. Hayo o sae jọ nọ who roro inọ whọ sae rehọ uzoẹme jọ nọ o were owhẹ gaga ro fi iei họ ada wowoma.

5. Taure whọ tẹ te ruẹrẹ edhere nọ who re ro fi emagazini họ ada họ, eme who re ru?

⁵ Epanọ Whọ rẹ rọ Ruẹrẹ Ẹmeọta Ra Họ: Orọ ọsosuọ, whọ rẹ riẹ uzoẹme nọ whọ gwọlọ ro fi emagazini na họ ada na ziezi. Orọnikọ ẹsikpobi whọ te sae nwane riẹ oware nọ izoẹme kpobi nọ e rrọ emagazini e ta re who te fi ei họ ada ha. Rekọ, u fo re who dhesẹ isiuru gbe imuẹro kpahe izoẹme nọ whọ salọ nọ whọ rẹ t’ẹme kpahe na. Nọ whọ tẹ riẹ oware nọ whọ be tẹme kpahe ọvo whọ sai ro ru ere.

6. Ẹvẹ ma sae rọ ruẹrẹ edhere ẹmeọta obọmai họ?

⁶ Ofariẹ, rehọ eme elọlọhọ, nọ whọ rẹ sai nwene, rọ ruẹrẹ eme emuhọ ra họ. Whọ sae rehọ onọ nọ u kiekpahe uzoẹme na nọ o rẹ kpahe isiuru ohwo na ro mu ẹme họ. Hae rọ ẹro so ẹgba Ẹme Ọghẹnẹ nọ o re duobọ te ohwo udu. (Hib. 4:12) Salọ ikere nọ e rọwokugbe uzoẹme nọ whọ be tẹme kpahe na, mai woma kọ ikere nọ a fodẹ hayo enọ a kere eme rai lahwe nọ e rrọ uzoẹme nọ who bi ro fi ei họ ada na. Roro epanọ who re ro dhesẹ oghẹrẹ nọ ikere na i ro wobọ kugbe uzoẹme na.

7. Ẹvẹ ma rẹ rọ riẹ sọ edhere nọ ma bi ro fi emagazini họ ada o kiehọ ziezi?

⁷ Eva Uvẹ Kpobi: Re ohwo ọ sae riẹ sọ edhere nọ ọ ma nọ o ti ro fi obe họ ada o kiehọ ziezi, ọ rẹ rehọ iẹe ruiruo tao. Lele ukoko ra kpohọ emagazini fihọ ada evaọ Ẹdẹ-Ọmaha. Fi emagazini na họ ada kẹ ahwo nọ a rehọ ebe efa no vẹre evaọ oke nọ u kpemu. Evaọ ẹsikpobi, hai fi emagazini na họ ada kẹ emọ-uwuhrẹ Ebaibol ra gbe amọfa nọ whọ nyaku evaọ oke ozihebro. Whọ sai fi emagazini họ ada kẹ ahwo nọ who bi lele t’ẹme nọ who te kpohọ eki, nọ who bi kpohọ erẹ, hayo nọ whọ be hẹrẹ edọkita evaọ obọ ẹsipito. Ru onaa nọ who bi ro fi emagazini họ ada woma vi epaọ ọsosuọ nọ whọ be rehọ ai ruiruo evaọ amara na.

8. Evaọ idhere vẹ Uwou-Eroro Na gbe Awake! e rọ rrọ obọdẹ ebe?

⁸ Emagazini Uwou-Eroro gbe Awake! na yọ obọdẹ ebe. E be wha ujiro se Jihova wọhọ Ọnọ ọ mai Kpehru evaọ ehrugbakpọ na. (Iruẹru 4:24) E be rọ emamọ usi Uvie Ọghẹnẹ kẹ ahwo omosasọ, jẹ be tuduhọ ahwo awọ re a fi ẹrọwọ họ Jesu Kristi. (Mat. 24:14; Iruẹru 10:43) Fibae, i bi dhesẹ epanọ eruẹaruẹ Ebaibol i bi ro rugba kpahe uyero akpọ na. (Mat. 25:13) Fiobọhọ kẹ ahwo ẹkwotọ ra re a wo erere no emagazini na ze ẹkwoma uvẹ kpobi nọ u rovie fihọ nọ who re ro fi ai họ ada!

9. Ẹvẹ ma sae rọ to otọhotọ họ kẹ ozihebro?

⁹ Nọ whọ tẹ sai fi emagazini họ ada, hayo makọ who lele ohwo t’ẹme kpahe Ebaibol na, daoma nọe onọ jọ nọ o rẹ lẹliẹe roro nọ o rẹ sai rovie uvẹ ozihebro fihọ re wha gbẹ t’ẹme kpahe Ebaibol na. Ma te wo ajọwha nọ ma rẹ rọ kọ ibi uzẹme na họ amọfa, ma rẹ sai wo irẹro inọ Jihova o ti rovie udu ahwo nọ a ginẹ gwọlọ nọ a rẹ riẹe jẹ gọe.—1 Kọr. 3:6.