Epanọ Ma rẹ rọ Rehọ Idhere Ẹmeọta nọ A rọ kẹ Omai Oriruo ro Ruiruo
1 Oriruo idhere ẹmeọta nọ a re ro fi emagazini mai gbe ebe efa họ ada e be hae roma via ẹsikpobi evaọ Odibọgba Uvie Mai. Nọ ma tẹ be ta usiuwoma, u du gwọlọ nọ ma rẹ wariẹ iroro-ejẹ efihada na wọhọ epanọ a nwani kere ai na ha. A kere ai k’omai re e kpọ omai evaọ ẹme nọ ma rẹ ta. Ẹme mai ọ rẹ mai wo ẹgba nọ ma tẹ rọ eme obọ mai fi obe họ ada. Ẹme nọ ma rẹ ta evaọ ẹkoma mai u re fiobọhọ nọ udu o jẹ jọ ohwo nọ ma be ta ẹme kẹ na wolẹ, u ve je dhesẹ oruọzewọ gbe imuẹro udu omai.—2 Kọr. 2:17; 1 Tẹs. 1:5.
2 Kpọ Ẹmeọta Ra: Iyero obonẹ i re kpomahọ oghẹrẹ nọ ma rẹ ta emamọ usi na gaga. Kọ whọ sai yere ohwo nọ whọ be te ta usiuwoma kẹ na re whọ jẹ rọ ere whrẹrẹ ruọ usiuwoma ota, hayo kọ ahwo ẹkwotọ ra a rẹ gwọlọ nọ who mu usiuwoma ota ra họ ovavo? Oyena u wo ohẹriẹ no oria ruọ oria yọ ẹsejọ dede no ohwo ruọ ohwo. Orimuo ọ roja re evaọ enọ nọ a re ro ruiruo. Enọ nọ i kiehọ ahwo jọ oma evaọ eria jọ e rẹ sai kiehọ amọfa oma evaọ oria ofa ha. Fikiere, o roja re ma rehọ orimuo kpọ ẹmeọta mai lele edhere nọ ọ rẹ were ahwo ẹkwotọ mai.
3 Fibae, u fo nọ ma re roro kpahe iyero gbe iroro ahwo nọ a rrọ ẹkwotọ mai nọ ma tẹ be ruẹrẹ oma kpahe kẹ usiuwoma ota. Wọhọ oriruo, oghẹrẹ nọ whọ rẹ rọ Matiu 6:9, 10 tẹme kugbe ọgba-egagọ Kathọlik u re wo ohẹriẹ no oghẹrẹ nọ who re lele ohwo nọ ọ riẹ olẹ “Ọsẹ mai nọ ọ rọ obọ odhiwu” na ha tẹme. Avọ eroro nọ ma rẹ kaki roro kparo, ma rẹ sai roro kpahe eme nọ ma te ta re ma tae evaọ oghẹrẹ nọ i re ro si ahwo nọ ma nya ku evaọ odibọgba na urru.—1 Kọr. 9:20-23.
4 O tẹ make rọnọ ma jiroro nọ ma rẹ rehọ edhere usiuwoma ota na ruiruo wọhọ epanọ a kere i rie na, o gbẹ gwọlọ nọ ma rẹ ruẹrẹ oma họ ghele. Ma rẹ rọ oma totọ se uwuhrẹ hayo uzoẹme nọ ma jiroro nọ ma te ta ẹme kpahe na, ma vẹ jẹ gwọlọ igogo-eme nọ e rẹ sae kpare isiuru. Kẹsena ma ve fi enana ba ẹmeọta mai. Nọ ma tẹ riẹ evuẹ nọ e rrọ ebe mai na ọvo ma jẹ sae rọ ọwhọ fi ai họ ada.
5 Idhere Ẹmeọta Efa: Kọ iroro-ejẹ nọ a kẹ nọ a re ro mu ẹmeọta họ na ọvo ma re ro ru iruo? Ijo. Otẹrọnọ edhere ẹmeọta ọfa hayo ikereakere efa jọ e riẹ nọ e mai kiehọ k’owhẹ nọ whọ riẹ, rehọ iẹe ruiruo. Maero nọ who te bi fi emagazini họ ada, mu ẹro họ uvẹ nọ whọ rẹ rọ rehọ izoeme nọ e rrọ eva emagazini na nọ e rẹ sai si ahwo ẹkwotọ ra urru ziezi ro ruiruo. Nọ wha te bi ru odhesẹvia usiuwoma ota evaọ Ewuhrẹ Odibọgba na, wha sai ru ọruẹrẹfihotọ re a rehọ edhere nọ ọ mai kiehọ evaọ ẹkwotọ ukoko rai ro ru odhesẹvia na. Evaọ edhere ọnana, a sai fiobọhọ kẹ ahwo kpobi re a rọ edhere nọ o wẹgba ro whowho emamọ usi na.
[Study Questions]
1. Ẹvẹ ma re rri iriruo idhere ẹmeọta nọ a kẹ omai na?
2. Fikieme u je fo nọ ma roro kpahe iyero ẹkwotọ mai nọ ma tẹ be ruẹrẹ ẹmeọta mai họ?
3. Fikieme ma je roro kpahe iyero gbe iroro ahwo nọ ma be ta ẹme kẹ?
4. Fikieme emamọ oma oruẹrẹhọ o jẹ roja?
5. Fikieme ma jẹ ruẹrẹ edhere usiuwoma ota ọfa họ, kọ ẹvẹ ma sai ro ru ere?