Epanọ Ma rẹ rọ Ruẹrẹ Edhere nọ A re ro Fi Emagazini họ Ada
1 Whọ sai roro nọ, ‘Fikieme ma jẹ ruẹrẹ edhere nọ a re ro fi emagazini họ ada, kpakiyọ a be hai dhesẹ epanọ a re ro fi emagazini họ ada evaọ uvitha Odibọgba Uvie Mai kpobi?’ Dede nọ idhere usiuwoma ota oriruo enana i fiobọhọ kẹ ahwo buobu no, omaruẹrẹ kpahe omobọ ohwo o roja ghele. Edhere usiuwoma ota nọ o wiruo evaọ eria jọ o sae jọ nọ u re wiruo evaọ eria efa jọ họ. Fikiere, u fo ho re ma rehọ iẹe nọ o gbomai họ re ma rehọ eme efihọ-ada oriruo na unọjọ utọjọ ro fi emagazini họ ada. O tẹ make rọnọ ma salọ nọ ma be rehọ edhere efihọ-ada oriruo na ruiruo, u re woma re ma rọ eme obọmai rọ tae.
2 Salọ Uzoẹme jọ Evaọ Emagazini na: Nọ who te se emagazini na no, jariẹ salọ uzoẹme jọ nọ o were owhẹ nọ whọ riẹ nọ u fo kẹ ẹkwotọ rai. Oghẹrẹ ọwhọ gbe imuẹro nọ whọ rọ t’ẹme kpahe uzoẹme nọ whọ salọ na, o rẹ sae wọ ohwo na gwọlọ se emagazini na re. Dede nọ uzoẹme nọ o te were ahwo ẹkwotọ ra buobu whọ te t’ẹme kpahe, daoma riẹ oware nọ izoẹme efa nọ e rrọ emagazini na e t’ẹme kpahe re. Onana u ti fiobọhọ k’owhẹ nọ whọ sai ro nwene ẹmeọta ra otẹrọnọ whọ nya ku ohwo jọ nọ uzoẹme ofa o mae were.
3 Nọ Onọ: Ofariẹ, ruẹrẹ eme-emuhọ ra họ ziezi. Eme-emuhọ ra i wuzou gaga. O rẹ sai woma re whọ nọ ohwo nọ whọ be t’ẹme kẹ onọ nọ o rẹ lẹliẹe roro, re o kpare isiuru riẹ kẹ uzoẹme nọ whọ salọ nọ whọ be te t’ẹme kpahe na. Enọ nọ e rẹ lẹliẹ ohwo ta iroro riẹ e rẹ mai woma. Whaha onọ nọ u re ru ohwo na nọ ọ gbẹ riẹ oware nọ ọ rẹ ta ha hayo nọ o rẹ wha ikẹ-isio ze.
4 Se Ikereakere: Orọ urere, salọ ikere nọ who re se otẹrọnọ uyero ohwo na o tẹ kuvẹ, o sae jọ ovo jọ evaọ usu ikere nọ e rrọ uzoẹme nọ whọ te t’ẹme kpahe na. Ikere nọ who re se u ti fiobọhọ kẹ ohwo na ruẹ nọ Ebaibol na ovuẹ mai u no ze. (1 Tẹs. 2:13) Ofariẹ, o tẹ make rọnọ ọ rehọ emagazini na ha, ikereakere nọ who se na yọ usiuwoma whọ ta kẹe no na. Ahwo buobu a rehọ ẹkwoma ikereakere nọ a se rọ kpare isiuru ahwo no taure a tẹ nọ ugogo onọ jọ. Whọ sae rọ eme nana rọ fodẹ ikere na, “O te were omẹ re mẹ riẹ iroro ra kpahe oware nọ a ta evaọ oria Ebaibol nana.” Kẹsena who ve si iroro ohwo na kpohọ ẹme jọ evaọ emagazini na, whọ vẹ t’ẹme kpẹkpẹe kpahiẹe rọ kpare isiuru riẹ taure whọ tẹ te rehọ emagazini na kẹe.
5 Izi ikeke evuọvo e riẹ hẹ kpahe oware nọ whọ rẹ ta nọ who te bi fi emagazini họ ada. Rekọ o rẹ mai woma re ẹmeọta ra ọ jọ vevẹ jẹ jọ kpẹkpẹe. Rehọ edhere nọ o kiehọ k’owhẹ gbe onọ o rẹ wha emamọ iyẹrẹ ze ro ruiruo. Tẹrovi erere nọ ọ rrọ emagazini na, jẹ jọ jajaja. Whọ tẹ ruẹrẹ oma kpahe ziezi, whọ te riẹ ru ziezi evaọ Uwou-Eroro Na gbe Awake! na nọ who re fihọ-ada kẹ ahwo nọ ‘i wo eva ezi kẹ uzuazọ ibẹdẹ bẹdẹ.’—Iruẹru 13:48.
[Study Questions]
1. Fikieme u ro woma re ma ruẹrẹ epanọ ma re ro fi emagazini họ ada kẹ omobọ mai viukpọ erọ oriruo nọ a fihọ Odibọgba Uvie Mai nọ ma re se fihọ uzou?
2. Eme o gwọlọ nọ whọ tẹ be salọ uzoẹme jọ evaọ emagazini nọ whọ rẹ t’ẹme kpahe ro fi emagazini họ ada?
3. Oghẹrẹ eme-emuhọ vẹ who re ro ruiruo nọ o rẹ wha emamọ iyẹrẹ zẹ?
4. Didi irere e rrọ ese nọ ma re se ikere jọ kẹ ohwo nọ ma be t’ẹme kẹ otẹrọnọ uyero na o kuvẹ riẹ?
5. Ugogo eware vẹ u fo nọ who re wo họ iroro nọ whọ tẹ be ruẹrẹ edhere nọ a re ro fi emagazini họ ada?