Ewuhrẹ Ibroshọ Wha Hai Rroro! Na

Ma ti wuhrẹ ibroshọ Wha Hai Rroro! na evaọ eka ọ February 26 rite March 26, 2007, eva Uwuhrẹ Obe Ukoko. Iviena rehọ enọ obotọ na ro ruiruo nọ whọ tẹ be ruẹrẹ oma kpahe gbe okenọ who bi ru uwuhrẹ nana. Eva etoke uwuhrẹ na, se eme na, je se ikere nọ a fodẹ na wọhọ epanọ oke o kuvẹ te.

Oka ọ February 26

◼ Ẹwẹ-obe avọ 3-4: Evaọ usu iyero nọ a jọ etenẹ fodẹ na, ovẹ o mai kpomahọ uzuazọ ra no? Eme u dhesẹ k’owhẹ inọ iyero enana orọnikọ eria jọ ọvo gbe otiẹsejọ ọvo e rẹ roma via ha?

◼ Ẹwẹ-obe avọ 5: Eme ọ k’owhẹ imuẹro inọ Ọghẹnẹ ọ be ginẹ daezọ? Eme ọ rẹ sai dhesẹ epanọ ma bi roro kpahe Ọghẹnẹ te gbe eware nọ o bi ru?

◼ Ẹwẹ-obe avọ 6-8: Eme Matiu 24:1-8, 14 o ta kpahe otofa iyero akpọ inẹnẹ na? Wọhọ epanọ 2 Timoti 3:1-5 u dhesẹ, etoke vẹ ma be rria nẹnẹ na? Eme edẹ urere nana e rrọ kẹ? Eme ọ k’owhẹ imuẹro inọ Ebaibol na ginọ Ẹme Ọghẹnẹ? Eme họ Uvie nọ ma be ta usiuwoma kpahe na?

◼ Ẹwẹ-obe avọ 9-10: Fikieme ma je roro ziezi kpahe iroro nọ ma rẹ jẹ eva okpẹdẹ kpobi gbe eware nọ ma rọ karo evaọ uzuazọ? (Rom 2:6; Gal. 6:7) Nọ whọ be kiẹ enọ nọ e rrọ ẹwẹ-obe avọ 10 riwi na, ikereakere vẹ e ziọ owhẹ iroro nọ u fo nọ e rẹ kpọ oware nọ who re ru?

Oka ọ March 5

◼ Ẹwẹ-obe avọ 11: Fikieme mai omomọvo ma je roro kpahe enọ nọ a nọ evaọ ẹwẹ-obe nana? (1 Kọr. 10:12; Ẹf. 6:10-18) Eme iyo mai kẹ enọ nana i re dhesẹ kpahe epanọ ma se ohrẹ Jesu nọ o rrọ Matiu 24:44 na gboja te?

◼ Ẹwẹ-obe avọ 12-14: Eme họ “oke oziẹobro” nọ a tẹme te evaọ Eviavia 14:6, 7 na? Re a ‘dhozọ Ọghẹnẹ jẹ rehọ oruaro kẹe’ eme u dhesẹ? Eme họ Babilọn Ologbo na, kọ eme ọ te via kẹe? Eme u fo nọ ma re ru kpahe Babilọn Ologbo na enẹna? Eme ọfa a t’ẹme te evaọ oke oziẹobro nọ a ruẹaro riẹ na? Nọ ma riẹ “ẹdẹ na hayo oke” ẹdhoguo Ọghẹnẹ nọ a ruẹaro riẹ hẹ na, ẹvẹ onana u re kpomahọ omai? (Mat. 25:13)

◼ Ẹwẹ-obe avọ 15: Eme họ ẹme-avro esuo okpehru na, kọ ẹvẹ onana u ro kpomahọ omai omomọvo?

◼ Ẹwẹ-obe avọ 16-19: Eme họ ‘idhiwu ekpokpọ’ avọ “akpọ ọkpokpọ” na? (2 Pita 3:13) Ono ọ ya eyaa eware nana? Inwene vẹ idhiwu ekpokpọ avọ akpọ ọkpokpọ na e te wha ze? Kọ mai omamai ma ti wo erere no ai ze?

Oka ọ March 12

◼ Ẹwẹ-obe avọ 20-21: Didi unuovẹvẹ kpahe ẹdhẹ Jesu ọ kẹ ilele ikpe-udhusoi ọsosuọ riẹ? (Luk 21:20, 21) Okevẹ uvẹ ẹdhẹ yena u ro rovie fihọ? Fikieme o jẹ kpata re a dhẹ ababọ oke-raha? (Mat. 24:16-18, 21) Fikieme ahwo buobu a rẹ rọ jẹ unuovẹvẹ fiẹ? Ẹvẹ ahwo nọ a bu te idu buobu evaọ China gbe Philippines a ro wo erere no unuovẹvẹ nọ u muẹro nọ a jẹrehọ ze? Fikieme o jẹ mae kpata enẹna re ma jẹ unuovẹvẹ Ebaibol kpahe urere eyero nana rehọ? Fiki epanọ oke na o kpata te na, didi owha-iruo o rrọ omai uzou? (Itẹ 24:11, 12)

◼ Ẹwẹ-obe avọ 22-23: Evaọ 1974 eva Australia gbe 1985 evaọ Colombia, fikieme ahwo buobu a rọ rehọ oma evevere jẹ unuovẹvẹ kpahe okpẹtu fiẹ, kọ eme o no rie ze? Ẹvẹ who roro nọ whọ hai ru kpahe unuovẹvẹ enana, kọ fikieme? Eme ọ rẹ sai dhesẹ jọ ma hae jẹ unuovẹvẹ edẹ Noa rehọ? Fikieme ahwo a jẹ rọ gwọlọ rria Sọdọm anwae na gbe ewho ekẹloma riẹ? Ẹvẹ ma sai ro wo erere no eroro didi kpahe oware nọ o via evaọ Sọdọm na ze?

Oka ọ March 19

◼ Ẹwẹ-obe avọ 24-27: Rehọ enọ uwuhrẹ nọ e rrọ ẹwẹ-obe avọ 27 na ro ruiruo.

Oka ọ March 26

◼ Ẹwẹ-obe avọ 28-31: Rehọ “Enọ Uwuhrẹ” nọ e rrọ ẹwẹ-obe avọ 31 na ro ruiruo.

Ibroshọ na nọ ma ti wuhrẹ na u ti fiobọhọ k’omai “hai rroro” jẹ ruẹrẹ oma kpahe. Jọ odibọgba ẹgbede mai ọ hai dhesẹ via inọ ma vuhu ovuẹ okpakpata ẹnjẹle na mu: “Dhozọ Ọghẹnẹ jẹ rehọ oruaro kẹ e, keme oke oziẹobro riẹ o te no.”—Mat. 24:42, 44; Evia. 14:7.